ଭୁବନେଶ୍ୱର : ମେକ୍ ୟୁ ଓ୍ଵିସ୍ ହେଉ କି ୟାସ୍କୋ। ପିନା ହେଉ କି ଜେସିକା। ଏମାନେ ଚାଲୁଥିଲେ ଜବରଦସ୍ତ ଢଙ୍ଗରେ। ଦମ୍ଦାର ଫିଟ୍ନେସ୍କୁ ପ୍ରମାଣିତ କରୁଥିଲେ ବିଚାରକଙ୍କ ସାମ୍ନାରେ। ତେବେ ମଣିଷ ନୁହେଁ, ଏମାନେ ସମସ୍ତେ ଥିଲେ ପୋଷା କୁକୁର। ରେସ୍ରେ ଗୋଡ଼ ଭାଙ୍ଗି ଠିଆ ହୋଇ ରହିଥିଲେ ମାଲିକର ନିର୍ଦେଶକୁ। ଇସାରା ପାଇବା କ୍ଷଣି ଆରମ୍ଭ ହୋଇଯାଉଥିଲା ରେସ୍। ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟ ଷ୍ଟାଡିୟମ ପରିସରରେ ଓଡ଼ିଶା କେନେଲ୍ କ୍ଲବ୍ ପକ୍ଷରୁ ଆୟୋଜିତ ଜାତୀୟ ଡଗ୍ ସୋ’ରେ ଏମିତି ଏକ ଅବସର ଉପଭୋଗ କରିବାର ଅବସର ଜୁଟିଥିଲା। ଆଜି ଶେଷ ଦିନରେ ସବୁ ପ୍ରଜାତିର ପୋଷାକୁକୁରଙ୍କୁ ନେଇ ପ୍ରତିଯୋଗିତା କରାଯାଇଥିଲା। ରାଜ୍ୟ ଓ ରାଜ୍ୟ ବାହାରୁ ୩୦୦ ପୋଷା କୁକୁର ଏଥିରେ ଅଂଶଗ୍ରହଣ କରି ଚାମ୍ପିଅନ୍ ହେବାକୁ ପରୀକ୍ଷା ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶା କେନେଲ୍ କ୍ଲବ୍ ପକ୍ଷରୁ ଆୟୋଜିତ ଏହି ୫୪ ଓ ୫୫ତମ ସୋ’ରେ ଆମେରିକାନ୍ କକର ସ୍ପାନିଏଲ୍, ଲାବ୍ରାଡର ରେଟ୍ରିଭର, ଫକ୍ସ ଟେରିୟର ସ୍ମଥ୍, ଜର୍ମାନ୍ ସ୍ପିଜ୍, ପମେରିଆନ୍, ଅକିତା, ତାଇବେତାନ ମାଷ୍ଟିଫ୍, ଡୋବରମ୍ୟାନ୍, ଆଲାସ୍କାନ୍ ମାଲାମ୍ୟୁଟ୍, ବାସେଟ୍ ହାଉଣ୍ଡ୍, ଡାଲମେଟିଆନ୍ ଏବଂ ସାଇବେରିଆନ୍ ହସ୍କି ଭଳି ୩୫ ପ୍ରଜାତିର ପୋଷା କୁକୁର ଅଂଶଗ୍ରହଣ କରିଥିଲେ। ମିନି ପମେରିଆନ୍ ସବୁଠୁ ଆକର୍ଷଣ ପାଲଟିଥିଲା। ୫୪ତମ ଅଲ୍ ବ୍ରିଡ୍ ସୋ’ରେ ସେଲ୍ଭା ମୁଥୁ କୁମାରଙ୍କ ଜର୍ମାନ ସେଫର୍ଡ ପ୍ରଥମ, ସୁଦୀପ କୁଣ୍ଡୁଙ୍କ ବିଗିଲ୍ ପୋଷ୍ଟୋ ଦ୍ୱିତୀୟ ଏବଂ କରନ୍ ସିଂହ ଓ୍ଵାଲିଆଙ୍କ ଲାବ୍ରାଡର ତୃତୀୟ ସ୍ଥାନ ଅଧିକାର କରିଥିଲା। ସେହିପରି ୫୫ତମ ଅଲ୍ ବ୍ରିଡ୍ ପ୍ରତିଯୋଗିତାରେ ପଲ୍ଲବ ସାହଙ୍କ ଜେସିକା ପ୍ରଥମ, ସୁଦୀପ୍ତ କୁଣ୍ଡୁଙ୍କ ବିଗିଲ୍ ପୋଷ୍ଟୋ ଦ୍ୱିତୀୟ ଏବଂ ଶୁଭୋଜିତ୍ଙ୍କ ଜର୍ମାନ ସେଫର୍ଡ ତୃତୀୟ ସ୍ଥାନ ଅଧିକାର କରିଥିଲା। ଫିଲପାଇନ୍ସର ମାରିଆ ମାଗାସେସ୍ ଏବଂ ବୁଲ୍ଗେରିଆର ନିକୋଲିନା ବିଚାରକ ଭାବେ ଯୋଗ ଦେଇଥିଲେ। ଓଡ଼ିଶା କେନେଲ୍ କ୍ଲବ୍ର ସମ୍ପାଦକ ସୁବ୍ରତ ରଂଜନ ପୃଷ୍ଟି ଏବଂ କ୍ଳବ୍ର ସମସ୍ତ କର୍ମକର୍ତା ସୋ’ ପରିଚାଳନା କରିଥିଲେ।