ଭୁବନେଶ୍ୱର: ରାତି ପାହିଲେ ବଡ଼ଦିନ। ଭଗବାନ ଯୀଶୁ ଧରାବତରଣ କରିବେ ଶାନ୍ତି, ଐକ୍ୟ ଓ ପ୍ରେମର ବାର୍ତ୍ତା ନେଇ। ସାନ୍ତାକ୍ଲଜ୍ ଆସିବ ଚକୋଲେଟ୍ ଓ ଉପହାର ନେଇ। ଏଥିପାଇଁ କେବେଠାରୁ ରାଜଧାନୀ ତା’ର ସଜବାଜ ସାରିଦେଲାଣି। ଉତ୍ସାହ ବି ବଢ଼ିବାରେ ଲାଗିଛି। ଏ ନେଇ ବଡ଼ ବଡ଼ ସପିଂ ମଲ୍ଠାରୁ ଜୁଏଲାରି ଦୋକାନ ପର୍ଯ୍ୟନ୍ତ ଆଲୋକମାଳାରେ ସଜେଇ ହେବା ସହ ଲାଲ୍ କୁର୍ତ୍ତା, ପ୍ୟାଣ୍ଟ୍ ଓ ଟୋପି ପିନ୍ଧା ବୁଢ଼ା ସାନ୍ତାକ୍ଲଜ୍ ବି ଦୋକାନ ସମ୍ମୁଖରେ ଠିଆ ହୋଇ ଗ୍ରାହକଙ୍କୁ ପାଛୋଟୁଛି। କିଛି ଶିକ୍ଷାନୁଷ୍ଠାନ ଓ ପ୍ଲେ-ସ୍କୁଲ୍ରେ ଉତ୍ସବ ପାଳନ ଜୋର୍ ଚାଲିଛି। ବିଦ୍ୟାଳୟକୁ ସାନ୍ତାକ୍ଲଜ୍ ଆସି ପିଲାମାନଙ୍କ ସହ ନାଚ ଗୀତ କରିବା ସହ ଉପହାର ମଧ୍ୟ ବାଣ୍ଟୁଛି। ଖାଲି ସେତିକି ନୁହେଁ, ଆଜି ସତ୍ୟନଗରସ୍ଥିତ ‘ଭିନ୍ସେଣ୍ଟ କ୍ୟାଥଲିକ୍ ଚର୍ଚ୍ଚ’ରେ ପ୍ରାକ୍-ଖ୍ରୀଷ୍ଟମାସ୍ ଉତ୍ସବ ବେଶ୍ ଧୁମ୍ଧାମ୍ରେ ପାଳିତ ହୋଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚର୍ଚକୁ ଯାଇ କୁନିକୁନି ପିଲା ଓ ଖ୍ରୀଷ୍ଟ ଧର୍ମାବଲମ୍ବୀଙ୍କ ସହ କେକ୍ କାଟି ସମସ୍ତଙ୍କୁ ବଡ଼ଦିନ ଓ ନୂତନ ବର୍ଷର ଶୁଭେଚ୍ଛା ଜଣାଇଥିଲେ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବିଧାୟକ ଦେବାଶିଷ ସାମନ୍ତରାୟ ଓ ଅଭିନେତା ମୁନ୍ନା ଖାନ୍ ପ୍ରମୁଖ ଉପସ୍ଥିତ ଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ କ୍ୟାଥ୍ଲିକ୍ ମଣ୍ଡଳୀ କାରୋଲ୍ ଗାନ କରିଥିଲେ। ସାନ୍ତାକ୍ଲଜ୍ ପିଲାମାନଙ୍କୁ ଚକୋଲେଟ୍ ଓ ଉପହାର ପ୍ରଦାନ କରିଥିଲା। କାର୍ଯ୍ୟକ୍ରମରେ କଟକ-ଭୁବନେଶ୍ୱର ଆର୍ଚବିଶପ୍ ଜନ୍ ବାର୍ଓ୍ଵା, ରେଭ୍ ଏସ୍.ଏନ୍ ନନ୍ଦ, ଫାଦର୍ ପ୍ରସନ୍ନ ପ୍ରଧାନ, ସିଷ୍ଟର୍ ସାମୁଏଲ୍ ପ୍ରମୁଖ ଉପସ୍ଥିତ ଥିଲେ। ଉତ୍ସବରେ ୩୦୦୦ରୁ ଊର୍ଧ୍ୱ ଶ୍ରଦ୍ଧାଳୁ ଯୋଗ ଦେଇଥିଲେ।
‘ବଡ଼ଦିନ ଶାନ୍ତି, ପ୍ରେମ ଓ ଭାଇଚାରାର ବାର୍ତ୍ତା ଦିଏ’
ଖ୍ରୀଷ୍ଟ୍ମାସ୍ ହେଉଛି ଆଶା, ପ୍ରେମ, ଆନନ୍ଦ ଉଲ୍ଲାସ, ଶାନ୍ତି ଓ ଭାଇଚାରାର ପର୍ବ। କ୍ଷମା, ଦୟା ଓ ସହାନୁଭୂତିର ମହତ୍ୱ ବୁଝାଇବା ପାଇଁ ଭଗବାନ ଯୀଶୁ ଧରାବତରଣ କରିଥିଲେ। ଏକତା ଓ ଭାଇଚାରାର ବାର୍ତ୍ତା ବାଣ୍ଟିଥିଲେ। ଏସବୁ ଦିଗରେ କାର୍ଯ୍ୟ କରିବା ପାଇଁ ମୁଁ ଓ ମୋ ସରକାର ସବୁବେଳେ ଚେଷ୍ଟା କରିବୁ ବୋଲି ସତ୍ୟନଗରସ୍ଥିତ ‘ଭିନ୍ସେଣ୍ଟ କ୍ୟାଥଲିକ୍ ଚର୍ଚ୍ଚ’ରେ ଆଜି ଆୟୋଜିତ ପ୍ରାକ୍-ଖ୍ରୀଷ୍ଟମାସ୍ ଉତ୍ସବ ପାଳନ ଅବସରରେ ମୁଖ୍ୟ ଅତିଥି ଭାବେ ଯୋଗ ଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତଙ୍କୁ ସମାନ ସୁବିଧା ଯୋଗାଇ ଦେବା ସହ ସଂଖ୍ୟାଲଘୁ ସମ୍ପ୍ରଦାୟର ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ ଅଧିକ କାର୍ଯ୍ୟ କରିବେ ବୋଲି ଶ୍ରୀ ପଟ୍ଟନାୟକ ଏହି ଅବସରରେ କହିଥିଲେ।