ଆନ୍ଦୋଳନକୁ ଓହ୍ଲାଇଲେ ମହିଳା

ରାଜଧାନୀରେ ମଦ ଦୋକାନ ଖୋଲିବାକୁ ବିରୋଧ

0

ଭୁବନେଶ୍ୱର: ମଦ ଦୋକାନ ଖୋଲିବାକୁ ନେଇ ନେଇ ରାଜଧାନୀରେ ରାସ୍ତାକୁ ଓହ୍ଲାଇଛନ୍ତି ମହିଳା। ଆଜି ଖଦି ଭବନ ନିକଟରେ ଖୋଲିଥିବା ମଦ ଦୋକାନ ସମ୍ମୁଖରେ ଶତାଧିକ ମହିଳା ଓ ଯୁବତୀ ସାମିଲ ହୋଇ ଏହାକୁ ବିରୋଧ କରିଛନ୍ତି। ଏହି ଦୋକାନକୁ ତୁରନ୍ତ ବନ୍ଦ କରିବା ସହ ସାରା ରାଜ୍ୟକୁ ମଦମୁକ୍ତ କରିବାକୁ ମଦମୁକ୍ତି ଅଭିଯାନ ପକ୍ଷରୁ ଅବକାରୀ ମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରାଯାଇଛି। ମଦମୁକ୍ତି ଅଭିଯାନର ଆବାହକ ସୁଦର୍ଶନ ପ୍ରଧାନଙ୍କ ନେତୃତ୍ୱରେ ଅନୁଷ୍ଠିତ ଏହି ପ୍ରତିବାଦ ଧାରଣାରେ ଆବାହିକା ଆଭାରାଣୀ ଚୌଧୁରୀ ଯୋଗଦେଇ କହିଲେ ମଦର ବହୁଳ ପ୍ରଚଳନ ଯୋଗୁଁ ମହିଳାଙ୍କ ଉପରେ ନିର୍ଯାତନା ବଢ଼ିଚାଲିଛି। ସମାଜରେ ଶୋଷଣ, ଦୁଷ୍କର୍ମ, ହତ୍ୟା ଆଦି ବଢ଼ୁଛି। ବେକାର ଯୁବକମାନେ ଅପରାଧ ମନସ୍କ ହୋଇପଡ଼ୁଛନ୍ତି। ତେଣୁ ତୁରନ୍ତ ମଦ ଦୋକାନ ବନ୍ଦ କରାଯାଉ ବୋଲି ସେ ଦାବି କରିଥିଲେ। ଆନ୍ଦୋଳନକୁ ସମର୍ଥନ ଜଣାଇ ସ୍ୱାଧୀନତା ସଂଗ୍ରାମୀ ତଥା ପୂର୍ବତନ ମନ୍ତ୍ରୀ ଦୋଳଗୋବିନ୍ଦ ପ୍ରଧାନ, ତୃଣମୂଳ କଂଗ୍ରେସ ସଭାପତି ଆର୍ଯ୍ୟକୁମାର ଜ୍ଞାନେନ୍ଦ୍ର, ସମାଜବାଦୀ ପାର୍ଟି ସଭାପତି ରବି ବେହେରା, ଚାଷୀ ନେତା ବିଜୟ ବେହେରା, ଛାତ୍ରନେତା ନାରାୟଣ ଡାକୁଆ, ସରୋଜ ସିଂହ, ସାବିତ୍ରୀ ବେହେରା, ପ୍ରଦୀପ ମିଶ୍ର, ସୁଭ୍ରାଂଶୁ ପାଢ଼ୀ ପ୍ରମୁଖ ଖଦି ଭବନଠାରୁ ମାତ୍ର ୫୦ ମିଟର ଦୂରରେ ମଦ ଦୋକାନ ଖୋଲିବା ଦୁର୍ଭାଗ୍ୟଜନକ ବୋଲି କହିଥିଲେ। ଅପରାହ୍ନରେ ମଦମୁକ୍ତି ଅଭିଯାନର ଏକ ୭ ଜଣିଆ କମିଟି ଅର୍ଥ ତଥା ଅବକାରୀ ମନ୍ତ୍ରୀ ଶଶୀଭୂଷଣ ବେହେରାଙ୍କୁ ସାକ୍ଷାତ କରି ନୂଆ କରି ଖୋଲିଥିବା ମଦ ଦୋକାନକୁ ବନ୍ଦ କରିବା ଲାଗି ଦାବି କରିଥିଲେ। ଏଥିସହ ରାଜ୍ୟରେ ନିଶାର ଅବାଧ ପ୍ରସାରକୁ ନିଷିଦ୍ଧ କରିବାକୁ ସ୍ମାରକପତ୍ରରେ ଉଲ୍ଲେଖ କରିଥିଲେ। ମନ୍ତ୍ରୀ ଶ୍ରୀ ବେହେରା ସ୍ମାରକପତ୍ର ଗ୍ରହଣ କରିବା ସହ ସାଧାରଣ ଲୋକଙ୍କ ସ୍ୱାର୍ଥ ପାଇଁ ନିଶା ଉପରେ ଅଙ୍କୁଶ ଲଗାଇବା ପାଇଁ ସମସ୍ତ ଉଦ୍ୟମ ଜାରି ରହିବ ବୋଲି ପ୍ରତିଶ୍ରୁତି ଦେଇଥିବା ମଦମୁକ୍ତି ଅଭିଯାନ ପକ୍ଷରୁ କୁହାଯାଇଛି।

ସମ୍ବନ୍ଧିତ ଖବର

Leave A Reply

Your email address will not be published.