ନିର୍ବାଚନୀ ଇସ୍ତାହାର ‘ହମ୍‌ ନିଭାଏଙ୍ଗେ’ ଜାରି କଲା କଂଗ୍ରେସ : ଏହି ୧୫ଟି ପ୍ରତିଶ୍ରୁତି ଦିଆଯାଇଛି ଏଥିରେ..

1

ନୂଆଦିଲ୍ଲୀ : ଆଗାମୀ ଲୋକସଭା ନିର୍ବାଚନକୁ ଆଖି ଆଗରେ ରଖି ଆଜି କଂଗ୍ରେସ ନିର୍ବାଚନୀ ଇସ୍ତହାର ଜାରି କରିଛି । ଏହି ଇସ୍ତହାରରେ ଜନତାଙ୍କ ହିତ ପାଇଁ ୧୫ଟି ମୁଖ୍ୟ ପ୍ରତିଶ୍ରୁତି ରହିଛି, ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଇସ୍ତହାରର ନାଁ ହମ୍‌ ନିଭାଏଙ୍ଗେ ଥିବା ବେଳେ ଇସ୍ତହାର ଜାରି କରି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ମୋଦୀଙ୍କୁ କଟାକ୍ଷ କରିଥିବା ଦେଖା ଯାଇଥିଲା । ମୋଦି ପ୍ରକୃତ ବିଷୟ ଉପରେ ଆଲୋଚନା କରୁ ନାହାନ୍ତି । ସେ ଚାହିଁଲେ ମୋ ସହ ରାଷ୍ଟ୍ରୀୟ ସୁରକ୍ଷାକୁ ନେଇ ତର୍କ କରି ପାରିବେ ବୋଲି କହି ମୋଦୀଙ୍କୁ ସମାଲୋଚନା କରିଥିଲେ ରାହୁଲ । ଏହା ସହ ଇସ୍ତାହର ବିଷୟରେ କହିବାକୁ ଯାଇ, ଏହା ବନ୍ଦ କୋଠରି ଭିତରେ ତିଆରି କରାଯାଇ ନାହିଁ । ଏହା ଦେଶର ଜନତା ଚାହୁଁଥିବା ଜିନିଷକୁ ନେଇ ତିଆରି କରାଯାଇଥିବା କହିଥିଲେ ରାହୁଲ । ଆସନ୍ତୁ ଜାଣିବା ଇସ୍ତହାରରେ ରାହୁଲ ଗାନ୍ଧୀ କରିଥିବା ୧୫ଟି ପ୍ରତିଶ୍ରୁତି ବିଷୟରେ…

୧. କ୍ଷମତାକୁ ଆସିବା ପରେ ଦେଶରୁ ଦାରିଦ୍ର୍ୟକୁ ହଟାଇବା ପାଇଁ କଂଗ୍ରେସ ନ୍ୟୁନତମ ଆୟ ଯୋଜନା ଲାଗୁ କରିବାର ପ୍ରତିଶ୍ରୁତି ଦେଇଛି । ଏହି ଯୋଜନା ଅନୁଯାୟୀ, ଦେଶରେ ଥିବା ୨୦ପ୍ରତିଶତ ଅତି ଦରିଦ୍ର ଲୋକମାନଙ୍କୁ ପ୍ରତିବର୍ଷ ୭୨,୦୦୦ଟଙ୍କାର ସହାୟତା ଦିଆଯିବ ।

୨. ଦେଶର ଯୁବପିଢ଼ିଙ୍କୁ ସାର୍ବଜନିକ ଏବଂ ଘରୋଇ କ୍ଷେତ୍ରରେ ଚାକିରି ଦେବା ନେଇ କଂଗ୍ରେସ ପ୍ରାଥମିକତା ଦେବ । ନିର୍ବାଚନ ଜିତିବା ପରେ ସାର୍ବଜନିକ କ୍ଷେତ୍ରରେ ଯୁବକ-ଯୁବତୀମାନଙ୍କୁ ୩୪ଲକ୍ଷ ଚାକିରିର ସୁବିଧା ମିଳିବ ।

୩. କୃଷକମାନେ କରିଥିବା ଋଣକୁ ଛାଡ଼ କରି ସେମାନଙ୍କୁ କରଜ ମୁକ୍ତ କରି ଦିଆଯିବ । ପ୍ରତିବର୍ଷ କୃଷି ବଜେଟ୍‌ ଆଣାଯିବ । କୃଷି ବିକାଶ ଏବଂ ଯୋଜନା ପାଇଁ ଏକ ସ୍ଥାୟୀ ରାଷ୍ଟ୍ରୀୟ ଆୟୋଗର ସ୍ଥାପନା କରାଯିବ ।

The Hans India

୪. ସ୍ବାସ୍ଥ୍ୟସୁରକ୍ଷା ଅଧିନିୟମ ଲାଗୁ କରି ସାର୍ବଜନିକ ଡ଼ାକ୍ତରଖାନା ଏବଂ  ଘରୋଇ ଡ଼ାକ୍ତରଖାନା ମାଧ୍ୟମରେ ଲୋକମାନଙ୍କୁ ମାଗଣା ଡାଏଗ୍ନୋସିସ୍‌, ଆଉଟ୍‌-ପେସେଣ୍ଟ କେୟାର, ମାଗଣାରେ ଔଷଧ ଏବଂ ଡ଼ାକ୍ତରଖାନାରେ ଭର୍ତ୍ତି କରାଇବାର ପ୍ରତିଶ୍ରୁତି ଦେଇଛି କଂଗ୍ରେସ ।

୫.ଜିଏସ୍‌ଟିକୁ ସରଳୀକରଣ କରିବା ସହ ସବୁ ଦ୍ରବ୍ୟର ଜିଏସ୍‌ଟି ହାର ସମାନ ରଖାଯିବ ।

୬.ପ୍ରତିରକ୍ଷା ବିଭାଗ ପାଇଁ ଖର୍ଚ୍ଚ ବଢ଼ାଇବା ସହ ବିଭିନ୍ନ ଅସ୍ତ୍ର ଶସ୍ତ୍ରର ଆଧୁନୀକରଣ କରାଯିବ ।

India Today

୭.କ୍ଷମତାକୁ ଆସିଲେ ପ୍ରଥମ ଶ୍ରେଣୀରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଶିକ୍ଷାକୁ ଅନିବାର୍ୟ୍ୟ ଏବଂ ମାଗଣା କରାଯିବ ।

୮.ଲୋକସଭା ଏବଂ ରାଜ୍ୟ ବିଧାନସଭାରେ ମହିଳାମାନଙ୍କ ପାଇଁ ୩୩ ପ୍ରତିଶତ ଆସନ ପ୍ରଦାନ କରିବା ପାଇଁ ମହିଳା ଆରକ୍ଷଣ ବିଲ୍‌ ଏବଂ ସବୁ କେନ୍ଦ୍ର ସରକାରୀ ଚାକିରିରେ ମହିଳାମାନଙ୍କ ପାଇଁ ୩୩ପ୍ରତିଶତ କୋଟା ପ୍ରଦାନ କରିବାର ପ୍ରତିଶ୍ରୁତି  ।

୯.କ୍ଷମତାକୁ ଆସିଲେ ବନ ଅଧିକାର ଅଧିନିୟମ ୨୦୦୬କୁ ଲାଗୁ କରିବା ସହ କୌଣସି ବନବାସୀଙ୍କ ସହ ଅନ୍ୟାୟ ହେବ ନାହିଁ ।

୧୦.କ୍ଷମତାକୁ ଆସିବା ପରେ ଗୃହ ଅଧିକାର ଅଧିନିୟମ ଲାଗୁ କରି ଯେଉଁମାନଙ୍କ ପାଖରେ ନିଜର ଘର ବା ଜମି ନାହିଁ, ସେମାନଙ୍କୁ ଜମି ଦିଆଯିବ ବୋଲି ପ୍ରତିଶ୍ରୁତି ଦେଇଛି କଂଗ୍ରେସ ।

୧୧.ବିଜେପି ସରକାର ଆସିବା ଦ୍ୱାରା ଦଳିତ ଲୋକମାନଙ୍କ ପ୍ରତି ଅତ୍ୟାଚାର ବଢ଼ି ଯାଇଥିବା ବେଳେ ଏହାକୁ ଶେଷ କରିବାର ପ୍ରତିଶ୍ରୁତି ଦେଇଛି କଂଗ୍ରେସ ।

୧୨. ଗୋପନୀୟତା ଉପରେ ଏକ ଆଇନ୍‌ ପ୍ରଣୟନ କରିବା ସହ ଆଧାର ଅଧିନିୟମର ମୂଳ ଉଦ୍ଦେଶ୍ୟ ପାଇଁ ଆଧାରର ବ୍ୟବହାର ଉପରେ ପ୍ରତିବନ୍ଧକ ଲଗାଇବାକୁ ପ୍ରତିଶ୍ରୁତି ଦେଇଛି କଂଗ୍ରେସ ।

୧୩.ସିଧା ନିର୍ବାଚିତ ହୋଇଥିବା ମେୟରମାନଙ୍କ ଦ୍ୱାରା ସହରମାନଙ୍କ ପାଇଁ ଶାସନର ଏକ ନୂଆ ମଡେଲ ଆଣିବା ।

୧୪.ହେଉଥିବା ବାୟୁ ପ୍ରଦୂଷଣକୁ ଆଖି ଆଗରେ ରଖି ରାଷ୍ଟ୍ରୀୟ ସ୍ୱଚ୍ଛ ବାୟୁ କାର୍ଯ୍ୟକ୍ରମକୁ ମଜବୁତ୍‌ କରିବାରେ ପ୍ରତିଶ୍ରୁତି ।

୧୫, ୫ବର୍ଷ  ମଧ୍ୟରେ ଦେଶର ବିଭିନ୍ନ ସଂସ୍ଥାଗୁଡ଼ିକ ଦୁର୍ବଳ ହୋଇଯାଇଥିବା କହିବା ସହ ଆର୍‌ବିଆଇ, ସିବିଆଇ, ଇସିଆଇ, ସିଆଇସି ଇତ୍ୟାଦି ସଂସ୍ଥା ଗୁଡ଼ିକୁ ଅଧିକାର ଏବଂ ସ୍ୱରାଜ୍ୟ ଦେବାର ପ୍ରତିଶ୍ରୁତି ।

ସମ୍ବନ୍ଧିତ ଖବର

Leave A Reply

Your email address will not be published.

1 Comment
  1. Bichitramohan Dash says

    tumhara maa nehi nibhaya , baap nehi ninhaya, dadi nehi nibhaya to tum kya khak nibhaoge ??? paisa ka italy se laoge ??? ab bhi tum poblic ko bewokuf samajhteho ??? abhi bhi time he sudharjao Mr.Rahul Khan