ସରକାରୀ ଚିଠିକୁ ଦଳୀୟ ବିଜ୍ଞାପନରେ ବ୍ୟବହାର କରି ଶାସକ ବିଜେଡି ନିର୍ବାଚନ ଆଚରଣ ବିଦ୍ଧି ଉଲ୍ଲଘଂନ କରୁଛି : ବିଜେପି
ରାଜ୍ୟ ନିର୍ବାଚନ ଅଧିକାରୀଙ୍କ ନିକଟରେ ଅଭିଯୋଗ
ଭୁବନେଶ୍ୱର: ଶାସକ ବିଜେଡି ବିଭିନ୍ନ ଖବରକାଗଜ ମାନଙ୍କରେ ସରକାରୀ ଚିଠି, ଦସ୍ତାବିଜକୁ ନେଇ ନିର୍ବାଚନ ପ୍ରଚାର କରୁଛି । ଚଳିତ ମାସ ୨୧ ଏବଂ ୨୫ ତାରିଖରେ ବିଜେଡି ପକ୍ଷରୁ ବିଭିନ୍ନ ଖବର କାଗଜରେ ୨ ଫୁଲ ପେଜ ବିଜ୍ଞାପନ ମାଧ୍ୟମରେ ସରକାରୀ ତଥ୍ୟ ଏବଂ ଚିଠିକୁ ବିଜେଡି ଦ୍ୱାରା ଅପବ୍ୟବହାର କରାଯାଇଛି । ଏପ୍ରିଲ ୨୧ ତାରିଖରେ ବିଜେଡିର ଏକ ଫୁଲ ପେଜ ବିଜ୍ଞାପନରେ ନାଲକୋ ଫାଉଣ୍ଡେସନ ଏବଂ ବିଏମସି, ରାଉରକେଲା ଷ୍ଟିଲ ପ୍ଲାଂଟ, ଆରଏସଏଫ ମଧ୍ୟରେ ହୋଇଥିବା ୨ ଟି ବୁଝାମଣା ପତ୍ରକୁ ଦର୍ଶାଇଛି । ସେହିଭଳି ଏପ୍ରିଲ ୨୫ ତାରିଖ ଦିନ ମେଡିକାଲ କାଉନସିଲ ଅଫ ଇଣ୍ଡିଆର ଚିଠିକୁ ବିଜ୍ଞାପନରେ ମାଧ୍ୟମରେ ବ୍ୟବହାର କରିଛି ।
Sambad is now on WhatsApp
Join and get latest news updates delivered to you via WhatsApp
ବିଜେପି ଅଭିଯୋଗ ଆଣିଛି ଯେ, ଏହି କାମ କରି ଶାସକ ବିଜେଡି ଆଦର୍ଶ ନିର୍ବାଚନ ଆଚରଣ ବିଦ୍ଧିର ଉଲ୍ଲଘଂନ କରିଛି । ସରକାରୀ କାଗଜ ପତ୍ରକୁ ଦଳୀୟ ବିଜ୍ଞାପନରେ ବ୍ୟବହାର କରିବା ରାଜନୈତିକ ଦଳଙ୍କ ଆଦର୍ଶ ଆଚରଣ ବିଦ୍ଧି ଭାଗ -୭କୁ ଉଲ୍ଲଘଂନ କରୁଛି । ଶାସକ ବିଜେଡି ମେଡିକାଲ କାଉନସିଲ ଅଫ ଇଣ୍ଡିଆ,
ନାଲକୋ, ଆରଏସଏଲକୁ ବ୍ୟବହାର କରି ବିଜେପିକୁ ବଦନାମ କରୁଛି । ଏହା ବିରୁଦ୍ଧରେ ତୁରନ୍ତ ତଦନ୍ତ କରିବା ସହ ବିଜେଡି ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ରାଜ୍ୟ ଉପ ସଭାପତି ସମୀର ମହାନ୍ତିଙ୍କ ନେତୃତ୍ୱରେ ଏକ ପ୍ରତିନିଧି ଦଳ ରାଜ୍ୟ ନିର୍ବାଚନ ଅଧିକାରୀଙ୍କୁ ଭେଟି ଦାବି ଜଣାଇଛି ।
ଏହି ପ୍ରତିନିଧୀ ଦଳରେ ରାଜ୍ୟ ମୁଖପାତ୍ର ଗୋବିନ୍ଦ ଅଗ୍ରୱାଲ, ରାଜ୍ୟ ଯୁବମୋର୍ଚ୍ଚା ସଭାପତି ଟଙ୍କଧର ତ୍ରିପାଠୀ, ରାଜ୍ୟ ନିର୍ବାଚନ ପ୍ରକୋଷ୍ଠ ଆବାହକ ରବିଶଙ୍କର ପଟ୍ଟନାୟକ, ସୋସିଆଲ ମିଡିଆ ସଂଯୋଜକ ମାନସ ବକ୍ସି ପ୍ରମୁଖ ଉପସ୍ଥିତ ଥିଲେ ।