ଭୁବନେଶ୍ବର: ବିଜେପିରୁ ବିଧାୟକ ଦିଲ୍ଲୀପ ରାୟ ଓ ବରିଷ୍ଠ ନେତା ବିଜୟ ମହାପାତ୍ର ଇସ୍ତଫା ପରେ ଆଜି ପ୍ରଥମ ଥର ପ୍ରତିକ୍ରିୟା ରଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସାମ୍ବାଦିକଙ୍କ ପ୍ରଶ୍ନର ଉତ୍ତର ରଖି ଶ୍ରୀ ପ୍ରଧାନ କହିଛନ୍ତି ଯେ, ରାଜନୀତିରେ କିଏ କେଉଁଠାକୁ ଯିବ ତାହାକୁ କେହି ରୋକିପାରିବେନି । କୌଣସି ବ୍ୟକ୍ତି ବିଶେଷ ଓଡ଼ିଶା ଭଳି ରାଜ୍ୟରେ କେବେ ପ୍ରସଙ୍ଗ ହୁଏନାହିଁ । ନୀତି ଆଦର୍ଶ ରାଜନୀତିରେ ପ୍ରସଙ୍ଗ ହୁଏ ।
Sambad is now on WhatsApp
Join and get latest news updates delivered to you via WhatsApp
ଏହାସହ ସେ ଆହୁରି ମଧ୍ୟ କହିଛନ୍ତି ଯେ, ମତେ କିଏ ବ୍ୟକ୍ତିଗତ ଆକ୍ଷେପ କଲେ ତାହାର ଉତ୍ତର ମୁଁ ରଖିବି ନାହିଁ । ମୋର ସଂସ୍କାର ଓ ଶାଳୀନତା ରହିଛି । ୧୨୦+ ମିଶନ ଉପରେ ଏହାର କୌଣସି ପ୍ରଭାବ ପଡିବନି । ଆମେ ଆମ ଲକ୍ଷ୍ୟରେ ସ୍ପଷ୍ଟ ରହିଛୁ । ତେଣୁ ବିଜେପି ଦଳର ରାଷ୍ଟ୍ରୀୟ ସଭାପତି ଆମକୁ ଯେଉଁ ଲକ୍ଷ୍ୟ ଦେଇଛନ୍ତି ସେଥିରେ ଆମେ ନିଶ୍ଚିତ ରୂପେ ସଫଳ ହେବୁ ବୋଲି ଧର୍ମେନ୍ଦ୍ର କହିଛନ୍ତି । ଏହାପରେ ପୂର୍ବରୁ କେନ୍ଦ୍ରମନ୍ତ୍ରୀ ଜୁଏଲ ଓରାମ ଦେଇଥିବା ପ୍ରତିକ୍ରିୟାର ଉତ୍ତରରେ କହିଛନ୍ତି ଯେ, ଓଡିଶାରେ ଡବଲ ଇଞ୍ଜିନ ଲାଗିଲେ ଉପରକୁ ଯିବ ।
ଉଭୟ କେନ୍ଦ୍ର ଓ ରାଜ୍ୟରେ ବିଜେପି ସରକାର ଆସିଲେ ଏହା ସମ୍ଭବ ହେବ । ଆମ ଦଳରେ କେହି ଘୋଷିତ ମୁଖ୍ୟମନ୍ତ୍ରୀ ପ୍ରାର୍ଥୀ ନାହାନ୍ତି । ଏହାସହ ଓଡ଼ିଶାରେ ଆମେ ପ୍ରମୁଖ ଦଳ ହେଲା ପରେ କିଏ ଓଡ଼ିଶାର ନେତୃତ୍ୱ ନେବ ତାହାର ନିଷ୍ପତ୍ତି ନିଆଯିବ ବୋଲି ଧର୍ମେନ୍ଦ୍ର କହିଛନ୍ତି । ତେଣୁ ବର୍ତମାନ ସମୟରେ ଏ ନେଇ କୌଣସି ବିଚାର ବିମର୍ଶ ହୋଇ ନାହିଁ । କିଏ କେଉଁ ପଦବିରେ ରହିବ ତାହା ଆଲୋଚନା ହୋଇନାହିଁ । ଆଲୋଚନା ହେବା ପରେ ଚିତ୍ର ସ୍ପଷ୍ଟ ହେବ ବୋଲି ଶ୍ରୀ ପ୍ରଧାନ କହିଛନ୍ତି ।
ଏହାର ଜବାବରେ ବିଜେଡି ମୁଖପାତ୍ର ତଥା ରାଜ୍ୟସଭା ସାଂସଦ ପ୍ରଶାନ୍ତ ନନ୍ଦ କରିଛନ୍ତି, ବିଜେପିରୁ କର୍ମୀ ଛାଡ଼ୁଛନ୍ତି। ଦଳ ହତୋତ୍ସାହିତ ହୋଇଗଲାଣି। ଧର୍ମେନ୍ଦ୍ର ବାବୁ ଯେଉଁ ଲଢ଼ିବା କଥା କହୁଛନ୍ତି, ଭଲ କଥା; କିନ୍ତୁ ତାଙ୍କ ପାଦ ତଳୁ ମାଟି ଖସିଗଲାଣି। ଛିଡ଼ା ହେଲେ ସିନା ସେ ଲଢ଼ିବେ ?