ରାୟବରେଲୀ : ରାଫେଲ ପ୍ରସଙ୍ଗକୁ ନେଇ ବିଜେପି ଅଧିକ ଆକ୍ରମଣାତ୍ମକ ହୋଇପଡିଛି । ବିଶେଷକରି ଏ ପ୍ରସଙ୍ଗରେ ସୁପ୍ରିମକୋର୍ଟଙ୍କ ରାୟ ଆସିବା ପରେ ବିଜେପି କଂଗ୍ରେସ ଉପରେ ଚାପ ସୃଷ୍ଟି କରିବାକୁ ଆରମ୍ଭ କରିଛି । ଖୋଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଆକ୍ରମଣର ନେତୃତ୍ୱ ନେଇ ଆଜି କହିଛନ୍ତି ଯେ ରାଫେଲ ବିମାନ ପ୍ରସଙ୍ଗରେ କଂଗ୍ରେସ ମିଛ ପରେ ମିଛ କହିଚାଲିଛି । କାରଣ ଏହି ବିମାନ କିଣା ଚୁକ୍ତିରେ କୌଣସି କ୍ୱାଟ୍ରୋଚି ବା ମିସେଲ ମାମୁଁ ନାହାନ୍ତି । ଗାନ୍ଧି ପରିବାରର ଗଡ଼ ରାଏବରେଲିରେ ଅନୁଷ୍ଠିତ ଏକ ସଭାରେ ସେ କହିଛନ୍ତି ଯେ କଂଗ୍ରେସ ଭାରତ ବିରୋଧୀ ଶକ୍ତିଙ୍କ ସହ ହାତମିଳାଇ ଭାରତୀୟ ପ୍ରତିରକ୍ଷା ବାହିନୀକୁ ଦୁର୍ବଳ କରିବାକୁ ଉଦ୍ୟମ କରିଆସିଛି । ସେ କହିଛନ୍ତି ଯେ ଦେଶରେ ଦୁଇ ପ୍ରକାରର ଶକ୍ତି ରହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୋଟିଏ ପ୍ରକାରର ଶକ୍ତି ଦେଶର ସେନାକୁ ମଝବୁତ କରୁଥିବାବେଳେ ଆଉ ଗୋଟିଏ ପକ୍ଷ ଦେଶ ବିରୋଧୀଙ୍କ ସହ ହାତ ମିଳାଇ ସେନାକୁ ଦୁର୍ବଳ କରିବାକୁ ଉଦ୍ୟମ କରିଆସିଛି । ଶ୍ରୀରାମଚରିତମାନସର ଏକ ଚୌପାଇକୁ ଉଦ୍ଧାର କରି ସେ କହିଛନ୍ତି ଯେ କିଛି ଲୋକଙ୍କ ସାରା ଜୀବନ ମିଛକୁ ହିଁ ଗ୍ରହଣ କରନ୍ତି ଓ ମିଛ ହିଁ ପ୍ରଚାର କରନ୍ତି । ଏପରି ଲୋକଙ୍କ ପାଇଁ ଦେଶର ସରକାର, ବାୟୁସେନା, ଫ୍ରାନ୍ସ ସରକାର ଆଦି ସମସ୍ତେ ମିଛୁଆ । ଏବେ ସେମାନଙ୍କୁ ସୁପ୍ରିମକୋର୍ଟ ବି ମିଛୁଆ ଲାଗୁଛନ୍ତି । ନିଜର ପ୍ରାୟୟ ୫୦ ମିନିଟର ଭାଷଣରେ ମୋଦି ରାଫେଲ ପ୍ରସଙ୍ଗରେ ପ୍ରାୟ ୩୦ ମିନିଟ କହିଥିଲେ ।