ରାୟଗଡାର ସ୍ୱାଧୀନ ବିଧାୟକ ମକରନ୍ଦ ମୁଦୁଲିଙ୍କ ଏହି ମନ୍ତବ୍ୟ ପରେ ବିଜେଡିରେ ମିଶିବା ନେଇ ବଢିଲା ଚର୍ଚ୍ଚା
ରାୟଗଡ଼ା : ଲକ୍ଷ୍ମୀପୁର ଓ ରାୟଗଡା ସୀମାନ୍ତରେ ଆଦିତ୍ୟ ବିର୍ଲା ପକ୍ଷରୁ ଏକ ଆଲୁମିନା ପ୍ଲାଣ୍ଟ ନିର୍ମାଣ ହେଉଥିବା କଥା ମୁଖ୍ୟମନ୍ତ୍ରୀ ଘୋଷଣା କରିଥିବାରୁ ରାୟଗଡ଼ା ବିଧାୟକ ମକରନ୍ଦ ମୁଦୁଲି ଏବଂ ଅଞ୍ଚଳବାସୀ ଆଜି ସକାଳୁ ନବୀନ ନିବାସ ଆସି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଥିଲେ । ଆଉ ନବୀନ ନିବାସରେ ମୁଖ୍ୟମନ୍ତ୍ରୀଙ୍କ ସହ ସ୍ବାଧୀନ ବିଧାୟକ ମକରନ୍ଦ ଛିଡା ହୋଇ ଫଟୋ ମଧ୍ୟ ଉଠାଇଥିଲେ । ତେବେ ନବୀନଙ୍କ ପାଖରେ ମକରନ୍ଦଙ୍କ ଉପସ୍ଥିତିକୁ ନେଇ ରାଜନୈତିକ ମହଲରେ ଚର୍ଚ୍ଚା ହେଉଛି କି ଲୋକଙ୍କ ସ୍ୱାର୍ଥ ଓ ଅଞ୍ଚଳର ବିକାଶ ପାଇଁ କଂଗ୍ରେସ ଛାଡ଼ିଥିବା ନବ ଦାସଙ୍କ ପରି ମକରନ୍ଦ ବି ଶଙ୍ଖ ଫୁଙ୍କିବେ କି ? ଏଥିସହ ନବୀନଙ୍କୁ ଭେଟିବା ପରର ବୟାନ ଏହି ଆକଳନକୁ ହାୱା ଦେଇଛି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀଙ୍କୁ ଭେଟିବା ପରେ ଗଣମାଧ୍ୟମ ଆଗରେ ଚର୍ଚ୍ଚା ନେଇ ମୁହଁ ଖୋଲିଛନ୍ତି ମକରନ୍ଦ । ସେ କହିଛନ୍ତି, ମୁଁ ସରକାରଙ୍କ ସହ ଅଛି , ନବୀନ ପଟ୍ଟନାୟକଙ୍କ ସହ ଅଛି । ନବୀନ ଓଡ଼ିଶାର ମୁଖ୍ୟମନ୍ତ୍ରୀ, ଆମ ମୁଖ୍ୟମନ୍ତ୍ରୀ । ଦୀର୍ଘ ଦିନ ହେବ ସେ ଲୋକଙ୍କ ବିକାଶ ପାଇଁ କାମ କରି ଆସୁଥିବାରୁ ମୁଁ ତାଙ୍କ ସହ ଅଛି । ସରକାର ଯୁଆଡେ, ମୁଁ ସେଆଡେ।’
ତେବେ ସେ ସରକାରଙ୍କ ସହ ଅଛନ୍ତି ମାତ୍ର ବିଜେଡି ସହ ନୁହେଁ ବୋଲି ସ୍ପଷ୍ଟ କରିଛନ୍ତି ମକରନ୍ଦ । ଆଗାମୀ ଦିନରେ କ’ଣ ହେବ ସେ ନେଇ ଆଗକୁ ନିଷ୍ପତ୍ତି ନିଆଯିବ। ମାତ୍ର ଆମେ ସବୁ ସରକାରଙ୍କ ସହ ଅଛୁ ବୋଲି ମକରନ୍ଦ ଜୋର ଦେଇ କହିଛନ୍ତି ।
୨୦୧୯ ନିର୍ବାଚନରେ ବିଜୟୀ ହୋଇ ଚର୍ଚ୍ଚାକୁ ଆସିଥିଲେ ମକରନ୍ଦ । ସବୁଠାରୁ ଗରିବ ବିଧାୟକ ଭାବେ ଅଳ୍ପ ଟଙ୍କା ଖର୍ଚ୍ଚ କରି ବିଜେତା ହୋଇ ସେ ଚର୍ଚ୍ଚିତ ହୋଇଥିଲେ । ଭୋଟ ବେଳେ ନେତା କୋଟି କୋଟି ଟଙ୍କା ଖର୍ଚ୍ଚ କରି ନିର୍ବାଚନ ଜିତିଥିବା ବେଳେ ମକରନ୍ଦ ମାତ୍ର ୧୫ ହଜାର ଟଙ୍କା ଖର୍ଚ୍ଚ କରି ଲୋକଙ୍କ ପାଖରେ ପହଞ୍ଚିଥିଲେ । ସେବା ଉଦ୍ଦେଶ୍ୟ ରଖି ଛିଡା ହୋଇଥିବା ମକରନ୍ଦଙ୍କ ପ୍ରଚାର ପାଇଁ କିଏ ଲିଫଲେଟ ବାଣ୍ଟିଥିଲା ତ ଆଉ କିଏ ଗାଡିରେ ତେଲ ପକାଇ ତାଙ୍କୁ ବୁଥରୁ ବୁଥ ବୁଲାଇଥିଲା । ଆଉ ଶେଷରେ ସେ ଜିତିଥିଲେ । ତେବେ ବିଜୟ ପରେ ଲୋକଙ୍କ ସେବା ପାଇଁ ଅଞ୍ଚଳର ବିକାଶ ପାଇଁ ଆବଶ୍ୟକ ଅର୍ଥ ଆଉ ସରକାରୀ ସହଯୋଗ । ତେଣୁ ସେ ସରକାରଙ୍କ ସହଯୋଗ ଲୋଡୁଥିବା ସହ ତାଙ୍କ ସହ ଅଛନ୍ତି ବୋଲି କହିଛନ୍ତି ।