୧୦ଦିନ ଧରି ଅଖିଆ ଅପିଆ ପଡ଼ି ରହିଥିବା ଯୁବକଙ୍କୁ ନୂଆ ଜୀବନ ଦେଲେ ଟ୍ରାଫିକ୍ ପୁଲିସ
ମୁମ୍ବାଇ : ଦୁନିଆରେ ପ୍ରତିଦିନ ଏଭଳି ଅନେକ ଘଟଣା ଘଟୁଛି । ପ୍ରତିଦିନ ଖବର କାଗଜରେ ଦୁଷ୍କର୍ମ ଭଳି ଅମାନବୀୟ କାଣ୍ଡର ବିଭିନ୍ନ ଖବର ପଢ଼ିବାକୁ ମିଳିଥାଏ । ଏହାକୁ ପଢ଼ି ସମାଜରେ ଲୋକମାନଙ୍କ ମଧ୍ୟରେ ଆଉ ମାନବିକତା ନାହିଁ ବୋଲି ମନ ହୋଇଥାଏ । କିନ୍ତୁ ଏତେ ସବୁ ମଧ୍ୟରେ ମୁମ୍ବାଇରେ ଏକ ଏଭଳି ଘଟଣା ଘଟିଛି, ଯାହା ସମାଜରେ ଏବେ ବି ମାନବିକତା ବଞ୍ଚିଥିବା ନେଇ ପ୍ରମାଣ କରିଛି । ମୁମ୍ବାଇର ଜଣେ ଟ୍ରାଫିକ ପୁଲିସ ୧୦ଦିନ ହେଲା ଖାଇ ନ ଥିବା ଯୁବକଙ୍କୁ ଖାଇବାକୁ ଦେଇ ଡ଼ାକ୍ତରଖାନାରେ ଭର୍ତ୍ତି କରାଇବା ଖବର ଏବେ ଚର୍ଚ୍ଚାରେ ରହିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମାରୁତୀ ସିନ୍ଦେ ନାମକ ଜଣେ ଯୁବକ ମୁମ୍ବାଇ କାମ କରିବାକୁ ଆସି ବିଭିନ୍ନ ହୋଟେଲରେ କାମ କରିବା ଆରମ୍ଭ କରିଥିଲେ । କାମ ସାରି ସେ ସବୁ ବେଳେ ରାସ୍ତା କଡ଼ରେ, ବ୍ରିଜ ତଳେ ବା ପାଖରେ ରଖା ଯାଉଥିବା ଅଟୋରେ ଶୋଇ ରାତ୍ରିଯାପନ କରନ୍ତି । କିନ୍ତୁ ୧୦ଦିନ ପୂର୍ବରୁ ସେ କାମ ସାରି ଆସି ଅଚଳ ହୋଇ ପଡ଼ିଥିବା ଏକ ଅଟୋରେ ଶୋଇ ପଡ଼ିଥିଲେ । ପରଦିନ ସକାଳୁ ତାଙ୍କ ଶରୀରରେ ହଠାତ କୌଣସି ସମସ୍ୟା ହେବାରୁ ସେ ଉଠି ବାହାରକୁ ଆସି ପାରି ନଥିଲେ କି କାହାକୁ ଡ଼ାକି ପାରି ନ ଥିଲେ । ମୁମ୍ବାଇରେ ଲଗାଣ ବର୍ଷା ପାଇଁ କେହି ତାଙ୍କ ଆଡକୁ ଧ୍ୟାନ ମଧ୍ୟ ଦେଇ ନଥିଲେ । ଏଭଳି ୧୦ଦିନ ବିତି ଯାଇଥିଲା । ନ ଖାଇ ନ ପିଇ ସେ ଅଟୋ ଭିତରେ ପଡ଼ି ରହିଥିଲେ ।
୧୦ଦିନ ପରେ ଟ୍ରାଫିକ୍ ପୁଲିସ ମେହେବୁବ୍ ତାମ୍ବୋଲେଙ୍କୁ ଦେଖି ମାରୁତୀ ବହୁ କଷ୍ଟରେ ହାତ ହଲାଇ, ମୋତେ ବଞ୍ଚାଇ ଦିଅ, ମୁଁ ବଞ୍ଚିବାକୁ ଚାହେଁ ବୋଲି କହିଥିଲେ । ଏହା ଦେଖି ତୁରନ୍ତ ମଧ୍ୟାହ୍ନ ଭୋଜନ ପାଇଁ ଯାଉଥିବା ତାମ୍ବୋଲେ ଆସି ମାରୁତୀଙ୍କୁ ଖାଦ୍ୟ, ପାଣି ଏବଂ ଜୁସ୍ ଦେବା ପରେ ଡ଼ାକ୍ତରଖାନାରେ ଭର୍ତ୍ତି କରାଇଥିଲେ । ପରେ ତାଙ୍କ ସଂପର୍କୀୟମାନଙ୍କୁ ଡ଼କାଇ ମାରୁତୀଙ୍କୁ ହସ୍ତାନ୍ତର କରିଥିଲେ ତମ୍ବୋଲେ । ଏବେ ମାରୁତୀ ନିଜ ଘରେ ଥିବା ବେଳେ ସୁସ୍ଥ ଥିବା ଜଣା ପଡ଼ିଛି ।