ଜୟପୁର: କରୋନା ସଂକ୍ରମଣକୁ ରୋକିବା ପାଇଁ ବିଭିନ୍ନ ଜନଗହଳିପୂର୍ଣ୍ଣ ସ୍ଥାନକୁ ବନ୍ଦ ରଖାଯାଇଥିବା ବେଳେ ସ୍କୁଲ-କଲେଜକୁ ମଧ୍ୟ ବନ୍ଦ ରଖାଯାଇଛି | ଏଭଳି ହେବା ଦ୍ୱାରା ଦରମା ନପାଇ କିଛି ଲୋକଙ୍କ ଆର୍ଥିକ ମେରୁଦଣ୍ଡ ଭାଙ୍ଗିଯାଇଥିବା ଖବର ସାମ୍ନାକୁ ଆସୁଛି | ପ୍ରବାସୀ ଶ୍ରମିକଙ୍କ ଦୁଃଖ ଦେଖି କରୋନା ପ୍ରଭାବ କେତେ ମାତ୍ରରେ ପଡିଛି ତାହାର ଆକଳନ କରାଯାଇପାରୁଥିବା ବେଳେ ଏବେ ଜଣେ ଶିକ୍ଷକଙ୍କ ସଂଘର୍ଷର କାହାଣୀ ଚର୍ଚ୍ଚାର ବିଷୟ ପାଲଟିଛି | କରୋନା ପାଇଁ ଫେବୃଆରୀ ମାସରୁ ଦରମା ବନ୍ଦ କରିଦିଆଯିବା ସହ ସ୍କୁଲକୁ ମଧ୍ୟ ବନ୍ଦ କରିଦିଆଯାଇଥିଲା | ମାସକୁ ୧୫,୦୦୦-୨୦,୦୦୦ ଟଙ୍କା ଆୟ କରୁଥିବା ଘରୋଇ ସ୍କୁଲର ଶିକ୍ଷକ ରାମଅବତାର ସିଂ ଦେଓ ଘର ଚଳାଇବା ପାଇଁ ଅନ୍ୟ କିଛି ବାଟ ନପାଇ ଶେଷରେ ଶ୍ରମିକ ଭାବେ କାମ କରିବାକୁ ବାଧ୍ୟ ହୋଇଥିଲେ ବୋଲି ଜଣା ପଡିଛି |
Sambad is now on WhatsApp
Join and get latest news updates delivered to you via WhatsApp
ଲକଡାଉନର ଅବଧି ବଢିବା ସହ ରୋଜଗାର ନଥିବାରୁ ରାମଅବତାର ବାଧ୍ୟ ହୋଇ ଏପ୍ରିଲ ୧୬ରେ ମନରେଗା ଯୋଜନା ସହ ଯୋଡ଼ି ହୋଇଥିଲେ | ମନରେଗା ଯୋଜନାରେ ସେ ଶ୍ରମିକମାନଙ୍କୁ କାମ ଦେବା ପଦରେ ରହିଥିଲେ, ଯାହା ପାଇଁ ତାଙ୍କୁ ଦିନକୁ ୨୩୫ଟଙ୍କା ମିଳୁଥିବା ସେ କହିଛନ୍ତି | ଶିକ୍ଷକ ଭାବେ ମାସକୁ ୧୫,୦୦୦-୨୦,୦୦୦ ଟଙ୍କା ଆୟ କରୁଥିବା ରାମଅବତାର ଏବେ ୭,୦୫୦ ଟଙ୍କା ଆୟ କରୁଛନ୍ତି |
ତାଙ୍କ କହିବା ମୁତାବକ, ଲକଡାଉନ୍ ହେତୁ ଫେବୃଆରୀ ପରେ ଆମକୁ ଦରମା ଦିଆଯାଇନଥିଲା। ଯାହା ପାଇଁ ମୋ ପରିବାରରେ ଆର୍ଥିକ ସଙ୍କଟ ଦେଖାଦେଇଥିଲା | ପରିବହନର କୌଣସି ମାଧ୍ୟମ ନ ଥିବା ସହ ସଂକ୍ରମଣର ଭୟ ଥିବାରୁ ପଢ଼ାଇବା ପାଇଁ ଅନ୍ୟ ସ୍ଥାନକୁ ଯିବା ମଧ୍ୟ ସମ୍ଭବ ନଥିଲା | ଟଙ୍କା ଆୟ କରିବାର ଅନ୍ୟ କିଛି ବାଟ ନଥିବାରୁ ପରିବାର ଚଳାଇବା ପାଇଁ ମୁଁ ମଗନରେଗାରେ କାମ କରିବା ଆରମ୍ଭ କଲି | ପରିବାରରେ ୧୦ଜଣ ସଦସ୍ୟ ଥିବା ବେଳେ ଏବେ ଆୟ କରୁଥିବା ଟଙ୍କା ଘର ଚଳାଇବା ପାଇଁ ଯଥେଷ୍ଟ ନୁହେଁ | କିନ୍ତୁ କିଛି ବାଟ ନଥିବାରୁ ମୋତେ ସ୍ୱଳ୍ପ ଟଙ୍କାରେ ଘର ଚଳାଇବାକୁ ପଡୁଛି |
ରାମଅବତାର ୨୪ବର୍ଷ ହେଲାଣି ଶିକ୍ଷକତା କରିଆସୁଥିବା ବେଳେ ସେ ପିଲାଙ୍କୁ ହିନ୍ଦୀ ପଢ଼ାନ୍ତି ବୋଲି କହିଛନ୍ତି | କେବଳ ସେ ନୁହଁନ୍ତି, ଟଙ୍କା ଭଳି ଅନେକ ଲୋକ ଚାକିରି ହରାଇ ମନରେଗା ସହ ଯୋଡ଼ି ହୋଇଥିବା ଜଣା ପଡିଛି |