ମହାବିଷୁବ ସଂକ୍ରାନ୍ତିକୁ ପଞ୍ଜାବୀମାନେ ସବୁଠାରୁ ନିଆରା ଢଙ୍ଗରେ ପାଳନ କରିଥାନ୍ତି । ଏହା ପଞ୍ଜାବୀମାନଙ୍କର ନବ ବର୍ଷ ହୋଇଥିବା ହେତୁ ସାରା ଭାରତରେ ଥିବା ପଞ୍ଜାବୀମାନେ ବିଶେଷତଃ ପଞ୍ଜାବ, ଦିଲ୍ଲୀ, ଉତ୍ତର ଓ ମଧ୍ୟ ଭାରତରେ ଏହାକୁ ଧୁମଧାମ୍ରେ ପାଳନ କରିଥାନ୍ତି । ଏପ୍ରିଲ ୧୪କୁ ବୈଶାଖୀ ଦିନ ବୋଲି ମାନନ୍ତି ସେମାନେ ।
Sambad is now on WhatsApp
Join and get latest news updates delivered to you via WhatsApp
ଏହା ଶିଖ୍ମାନଙ୍କ ପାଇଁ ଏକ ଶୁଭଦିନ, କାରଣ ଏହି ଦିନ ଶିଖ୍ମାନଙ୍କର ଦଶମ ଗୁରୁ ଖାଲସା ପନ୍ଥର ପ୍ରତିଷ୍ଠା କରିଥିଲେ । ମହାବିଷୁବ ସଂକ୍ରାନ୍ତିକୁ ବୈଶାଖୀ ଭାବେ ପାଳନ କରିଥାନ୍ତି ପଞ୍ଜାବର ଅଧିବାସୀ ମାନେ । ରବି ଶସ୍ୟ ଅମଳ କରିବାର ଏହା ହେଉଛି ମୁଖ୍ୟ ଉତ୍ସବ ।
ଏହି ଅବସରରେ ପଞ୍ଜାବୀମାନେ ରଙ୍ଗିନ ପୋଷାକ ପିନ୍ଧିଥାନ୍ତି । ସେମାନେ ରଙ୍ଗିନ୍ ପଟିଆଲା, କୁର୍ତା, ଲୁଙ୍ଗି, ପଗଡ଼ି ପିନ୍ଧି ଭାଙ୍ଗଡ଼ା ଓ ଗିଧା ନାଚରେ ମସଗୁଲ୍ ହୋଇ ଥାଆନ୍ତି । ପଞ୍ଜାବର ଅଧିକାଂଶ ଗ୍ରାମରେ ବୈଶାଖୀ ଅବସରରେ ଲୋକନୃତ୍ୟର ଆୟୋଜନ କରାଯାଇଥାଏ, ଯାହାକୁ ଉପଭୋଗ କରିବା ପାଇଁ ଅନ୍ୟ ପ୍ରଦେଶରୁ ବି ଲୋକ ଆସିଥାନ୍ତି । ଯଦି କେହି ପଞ୍ଜାବର ପ୍ରକୃତ ସୁନ୍ଦରତା ଦେଖିବାକୁ ଚାହାଁନ୍ତି, ତେବେ ତାଙ୍କ ପାଇଁ ସବୁଠାରୁ ପ୍ରକୃଷ୍ଟ ସମୟ ହେଉଛି ବୈଶାଖୀ ।
ବୈଶାଖୀ ସମୟରେ ପଞ୍ଜାବୀମାନେ ନୂଆ ଦ୍ରବ୍ୟ କିଣିଲେ ଶୁଭ ବୋଲି ମନେ କରନ୍ତି । ସେମାନେ ନବ ବର୍ଷ ମନାଇବା ସହିତ ଭୋଜିଭାତରେ ବି ମାତିଥାନ୍ତି । ବିଶେଷ କରି ଶିଖ୍ ଧର୍ମାବଲମ୍ବୀମାନେ ଗୁରୁଦ୍ୱାରାକୁ ଯାଇ ନିଜ ପରିବାରର ସୁଖ ଓ ସମୃଦ୍ଧି କାମନା କରି ଗୁରୁଦ୍ୱାରାରେ ମାନସିକ କରିଥାନ୍ତି । ଏହି ଦିନ ଶିଖ୍ମାନେ ପରସ୍ପରକୁ ଅଭିନନ୍ଦନ ଜଣାଇବା ଉଦ୍ଦେଶ୍ୟରେ ପଞ୍ଜାବୀ ଭାଷାରେ କହନ୍ତି, ‘ବୈଶାଖୀ ଦିୟାଁ ଲାଖ୍ ଲାଖ୍ ବଧାଇୟାଁ।’