କର୍କଟ ରୋଗରେ ଗୋଡ଼ ହରାଇ ମଧ୍ୟ ନୃତ୍ୟ ପ୍ରଦର୍ଶନ କରି ଦର୍ଶକଙ୍କ ମନ ମୋହୁଛନ୍ତି ଅଞ୍ଜଳି
କୋଲକାତା : କିଛି କରି ଦେଖାଇବାର ଆଶା ଓ ବିଶ୍ୱାସ ସବୁ ବନ୍ଧନକୁ ଭାଙ୍ଗିବାର ଶକ୍ତି ଦେଇଥାଏ । ହାତ ଗୋଡ଼ ଥାଇ ଲୋକମାନେ ବେକାର ବୁଲୁଥିବା ବେଳେ ବିନା ଅଙ୍ଗରେ ମଧ୍ୟ ଜଣେ ଅନେକ କିଛି କରି ଦେଖାଇପାରେ । ସେଭଳି ଏକ ଅନୁପ୍ରାଣିତ କଲା ପ୍ରେରଣାଦାୟୀ ଘଟଣା ଘଟିଛି କୋଲକାତାରେ ।
Sambad is now on WhatsApp
Join and get latest news updates delivered to you via WhatsApp
ଅସ୍ଥି କର୍କଟ ରୋଗର ଶିକାର ହୋଇ ନିଜର ଗୋଡ଼ ହରାଇଥିବା ସତ୍ତ୍ୱେ ମଧ୍ୟ ନାଚିବା ଛାଡ଼ି ନାହାନ୍ତି କୋଲାକାତାର ଅଞ୍ଜଳି ରାୟ । ବାମ ଗୋଡ଼ ହରାଇ ମଧ୍ୟ ସେ ନିଜ ନୃତ୍ୟ ଦ୍ୱାରା ସବୁ ଲୋକଙ୍କର ଦୃଷ୍ଟି ଆକର୍ଷଣ କରି ପାରିଛନ୍ତି । ୧୧ବର୍ଷ ବୟସରେ ଓଷ୍ଟିଓସାର୍କୋମା ଅସ୍ଥି କର୍କଟ ରୋଗରେ ପୀଡ଼ିତ ହୋଇଥିଲେ ଅଞ୍ଜଳି । ସେ ସମୟରେ ସେ ଭଲ ନାଚୁଥିବା ବେଳେ ତାଙ୍କ ଗୋଡ଼େ କଟା ହେବ ବୋଲି ଶୁଣି ସେ ଭାଙ୍ଗି ପଡ଼ିଥିଲେ । ତାଙ୍କୁ ଚିକିତ୍ସା ପାଇଁ ଡ଼ାକ୍ତରଖାନା ନିଆଯିବା ପରେ ତାଙ୍କୁ ବଞ୍ଚାଇବା ପାଇଁ ଗୋଡ଼ କାଟିବା ନିହାତି ଦରକାର ବୋଲି ଡ଼ାକ୍ତର ଜଣାଇଥିଲେ । ଏ କଥା ଶୁଣି ଅଞ୍ଜଳି ପ୍ରଥମେ ଦୁଃଖୀ ହୋଇଥିବା ବେଳେ ପରେ ସେ ନିଜକୁ ସମ୍ଭାଳି ନେଇଥିଲେ ।
ତାଙ୍କ ମନରେ ଆତ୍ମବିଶ୍ୱାସ ଆଣିବା ପାଇଁ ଚିକିତ୍ସା କରୁଥିବା ଡ଼ାକ୍ତର ସୋମା ଦେ ତାଙ୍କୁ ୧୯୮୬ରେ ଆସିଥିବା ସୁଧା ଚନ୍ଦ୍ରନଙ୍କ ଫିଲ୍ମ ‘ନାଚେ ମୟୁରୀ’ର ଭିଡ଼ିଓ ଦେଖାଉଥିଲେ । ଯେଉଁଥିରେ ସୁଧା ଗୋଟେ ଗୋଡ଼ରେ ନୃତ୍ୟ ପ୍ରଦର୍ଶନ କରିଥିଲେ । ଏହି ଭିଡ଼ିଓ ଦେଖି ଅଞ୍ଜଳୀଙ୍କ ମନରେ ଆତ୍ମବିଶ୍ୱାସ ଆସିବା ସହ ଅସ୍ତ୍ରୋପଚାରର ବର୍ଷେ ପରେ ସେ ପୁଣି ନାଚିବା ଆରମ୍ଭ କରିଥିଲେ । ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇ ନିଜର ନୃତ୍ୟ ଦକ୍ଷତା ଦେଖାଇ ସେ ସମସ୍ତଙ୍କ ମନ ଜିଣୁଥିବା ଜଣାପଡ଼ିଛି ।