ସାଥୀ ଯବାନମାନେ ସହିଦ୍ ବୋଲି ଭାବି ନେଇଥିବା ବେଳେ ପୁଲଓ୍ଵାମା ଆକ୍ରମଣ ସମୟରେ ଏଭଳି ବଞ୍ଚିଥିଲା ସିଆର୍ପିଏଫ୍ ଯବାନଙ୍କ ଜୀବନ
ନୂଆଦିଲ୍ଲୀ : ଫେବୃଆରି ୧୪ରେ ପୁଲଓ୍ଵାମା ଜିଲ୍ଲାରେ ୨୦ବର୍ଷ ମଧ୍ୟରେ ଘଟି ନ ଥିବା ଭଳି ଅତଙ୍କବାଦୀ ଆକ୍ରମଣ ଘଟିଥିଲା । ଯେଉଁଥିରେ ୪୦ଜଣ ଯବାନ ସହିଦ୍ ହୋଇଥିବା ବେଳେ ଅନେକ ଯବାନ ଆହତ ହୋଇଥିଲେ । ଯେଉଁ ଯବାନମାନେ ଏହି ଦୁର୍ଘଟଣାରୁ ବର୍ତ୍ତି ଯାଇଥିଲେ, ସେମାନଙ୍କୁ ନିଜ ସାଥୀମାନଙ୍କୁ ହରାଇବାର ଦୁଃଖ ସ୍ଥାଣୁ କରି ଦେଇଥିିଲା । କେହି କିଛି ଭାବିବା ଅବସ୍ଥାରେ ନଥିଲେ । କିନ୍ତୁ ହଠାତ୍ ଯବାନମାନେ ଯେଉଁ ସାଥୀଙ୍କୁୁ ମୃତ ବୋଲି ଭାବୁଥିଲେ, ସେ ସାମ୍ନାକୁ ଆସିବା ସହ ନିଜ ଜୀବିତ ରହିବାର କାହାଣୀ ଶୁଣାଇଥିଲେ । କନେଷ୍ଠବଳ ସୁରିନ୍ଦର ଯାଦବଙ୍କୁ ସମସ୍ତେ ସହିଦ୍ ବୋଲି ଭାବୁଥିବା ବେଳେ ପରେ ସେ ଜୀବିତ ବୋଲି ଜଣା ପଡ଼ିଥିଲା । ତାଙ୍କ ଜୀବିତ ଥିବା ଖବର ସମସ୍ତଙ୍କୁ ଖୁସି କରାଇଥିଲା । ଅନ୍ୟ ପକ୍ଷରେ ମୃତ୍ୟୁ ମୁଖକୁ ଯାଉ ଯାଉ ସୁରିନ୍ଦର କିପରି ବଞ୍ଚି ଯାଇଥିଲେ, ସେ ବିଷୟରେ ନିଜ ସାଥୀମାନଙ୍କୁ ଜଣାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଉତ୍ତରପ୍ରଦେଶର ଦେବରିୟା ଜିଲ୍ଲାରେ ରହୁଥିବା ସୁରିନ୍ଦରଙ୍କ ଅନୁଯାୟୀ, ପ୍ରଥମେ ମୁଁ ଯେଉଁ ବସ୍ରେ ବସି ଶ୍ରୀନଗର ଅଭିମୁଖେ ବାହାରିଥିଲି, ସେଥିରେ ମୋର ଅନ୍ୟ ୪ଜଣ ସାଥୀ ଥିଲେ । କିନ୍ତୁ ବସ୍ଟି କାଜୀଗୁଣ୍ଡରେ ପହଞ୍ଚିବା ପରେ ପଛ ବସ୍ରେ ବସିଥିବା ମୋର ଜଣେ ବନ୍ଧୁ ମୋତେ ତାଙ୍କ ପାଖକୁ ଡ଼ାକିବାରୁ ମୁଁ ବସିଥିବା ବସ୍ରୁ ଓହ୍ଲାଇ ପଛ ବସ୍କୁ ଚାଲି ଆସିଥିଲି । କିଛି ବାଟ ଯିବା ପରେ ଯେତେବେଳେ ପୁଲଓ୍ଵାମାରେ ଆତଙ୍କବାଦୀମାନେ ଆକ୍ରମଣ କରିଥିଲେ, ସେତେବେଳେ ଆଗରେ ଥିବା ବସ୍ଟି ଜୋରରେ ଶବ୍ଦ କରି ୩୦ଫୁଟ୍ ଉପରକୁ ଉଠିଯିବା ସହ ଚାରିଆଡ଼ ଧୁଆଁ ହୋଇ ଯାଇଥିଲା । ପରେ ମୁଁ ଯେଉଁ ବସ୍ରେ ବସିଥିଲି, ସେହି ବସ୍କୁ ଆତଙ୍କବାଦୀମାନେ ଆକ୍ରମଣ କରିଥିବା ଜାଣିବାକୁ ପାଇଥିଲି । ପୂର୍ବରୁ ମୁଁ ଆତଙ୍କବାଦୀଙ୍କ ଆକ୍ରମଣର ଶିକାର ହୋଇଥିବା ବସ୍ରେ ବସିଥିବାରୁ ମୋର ସାଥୀମାନେ ମୋତେ ସହିଦ୍ ବୋଲି ଭାବି ନେଇଥିଲେ । କିନ୍ତୁ ପରେ ତାଙ୍କୁ ମୁଁ ସବୁ ଜଣାଇଥିଲି ବୋଲି ସୁରିନ୍ଦର କହିଛନ୍ତି ।