ମାତା-ପିତା ନଥିବାରୁ ସ୍କୁଲର ପିଅନକୁ ବିବାହ କରାଇବା ପାଇଁ ସାହାଯ୍ୟର ହାତ ବଢ଼ାଇଲେ କର୍ମଚାରୀ ଏବଂ ଶିକ୍ଷକ
ପୁଣେ : ପୁଣେର ଏକ ସ୍କୁଲର କର୍ମଚାରୀ ଏବଂ ଶିକ୍ଷକମାନେ ଯେଉଁ କାମ କରିଛନ୍ତି, ତାହା ଏବେ ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଛି । ପୁଣେର ଖଡ୍କୀରେ ଥିବା ଏସ୍ଭିଏସ୍ ହାଇସ୍କୁଲରେ ଜଣେ ପିଅନର ବିବାହ ପାଇଁ ଆର୍ଥିକ ସହାୟତା ଯୋଗାଇ ଏବେ ଚର୍ଚ୍ଚାରେ ରହିଛନ୍ତି ସ୍କୁଲର କର୍ମଚାରୀ । ଦୁଇ ବର୍ଷ ତଳେ ଅଙ୍କୁଶ ଭୋଷଲେ ଏସ୍ଭିଏସ୍ ହାଇସ୍କୁଲରେ ପିଅନ ଭାବରେ କାମ କରିବା ଆରମ୍ଭ କରିଥିଲେ । କିନ୍ତୁ ନିଜର ଆର୍ଥିକ ଅବସ୍ତା ଭଲ ନଥିବାରୁ ସେ କେବେ ବି ବିବାହ କରି ପାରିବେ ନାହିଁ ବୋଲି ଭାବି ନେଇଥିଲେ । ଅନ୍ୟ ପକ୍ଷରେ ଅଙ୍କୁଶଙ୍କ ଅବସ୍ତା ବିଷୟରେ ଜାଣି ଏସ୍ଭିଏସ୍ ହାଇସ୍କୁଲର ପ୍ରଧାନଶିକ୍ଷକ ତାଙ୍କ ବିବାହ କରାଇବା ପାଇଁ ଚିନ୍ତା କରିଥିଲେ । ଯାହା ପରେ ସ୍କୁଲର କର୍ମଚାରୀମାନଙ୍କ ସହାୟତାରେ ସ୍କୁଲ ପରିସରରେ ହିଁ ଅଙ୍କୁଶଙ୍କ ବିବାହ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଅଙ୍କୁଶଙ୍କ ଅନୁଯାୟୀ, ୫ବର୍ଷ ପୂର୍ବେ ବାପାଙ୍କ ଦେହାନ୍ତ ହୋଇ ଯାଇଥିବା ବେଳେ ୮ମାସ ତଳେ ରକ୍ତ କର୍କଟରେ ମା’ ମୃତ୍ୟୁବରଣ କରିଥିଲେ । କିନ୍ତୁ ଯିବା ପୂର୍ବରୁ ମା’ ମୋର ବିବାହ କରାଇବାକୁ ଚାହୁଁଥିଲେ । ଚିକିତ୍ସାରେ ଟଙ୍କା ଖର୍ଚ୍ଚ ହେଉଥିବାରୁ ମୁଁ ବିବାହ କରିବାକୁ ମନା କରି ଦେଇଥିଲି । ମା’ ଯିବା ପରେ ମୋ ପାଖରେ ଅର୍ଥବଳ ନଥିବାରୁ ବିବାହ କରିବି ନାହିଁ ବୋଲି ମନସ୍ତ କରିଥିଲି । କିନ୍ତୁ ସ୍କୁଲର ପ୍ରଧାନଶିକ୍ଷକ ଏ ବିଷୟରେ ଜାଣିବା ପରେ ସେ ମୋତେ ସାହାଯ୍ୟର ହାତ ବଢ଼ାଇଥିଲେ ବୋଲି କହିଛନ୍ତି ଅଙ୍କୁଶ ।