ଏସିଆ ବାଳିକା ରଗ୍ବି ସେଭେନ୍ସ ପାଇଁ ୨୦ ବର୍ଷରୁ କମ୍ ଦଳ
ସୁମିତ୍ରାଙ୍କୁ ଭାରତୀୟ ଦଳର ନେତୃତ୍ବ: ଓଡ଼ିଶାରୁ ୫ ସାମିଲ
ଭୁବନେଶ୍ବର: ଲାଓସ୍ର ଭିଏଣ୍ଟିନେଠାରେ ଚଳିତ ମାସ ୨୪ ଓ ୨୫ ତାରିଖ ଦୁଇ ଦିନ ଧରି ଆୟୋଜିତ ହେବ ଏସୀୟ ରଗ୍ବି ସେଭେନ୍ସ ୨୦ ବର୍ଷରୁ କମ୍ ପ୍ରତିଯୋଗିତା। ଏଥିପାଇଁ ମଙ୍ଗଳବାର ରଗ୍ବି ଇଣ୍ଡିଆ ଭାରତୀୟ ବାଳିକା ଦଳ ଘୋଷଣା କରିଛି। ଅଗଷ୍ଟ ୧ରୁ ୨୨ ତାରିଖ ପର୍ଯ୍ୟନ୍ତ ଓଡ଼ିଶା ସରକାରଙ୍କ କ୍ରୀଡ଼ା ଓ ଯୁବ ସେବା ବିଭାଗ ଏବଂ କିଟ୍ର ସହଯୋଗରେ ଭୁବନେଶ୍ବରରେ ଚାଲିଥିବା ୩ ସପ୍ତାହ ବ୍ୟାପୀ ଭାରତୀୟ ଜାତୀୟ ପ୍ରଶିକ୍ଷଣ ଓ ପ୍ରସ୍ତୁତି ଶିବିରରୁ ଏହି ଦଳ ବଛାଯାଇଛି। ଘୋଷିତ ୧୨ ଜଣିଆ ଦଳରେ ଓଡ଼ିଶାରୁ ୫ ଜଣ ସାମିଲ ହୋଇଥିଲା ବେଳେ ଓଡ଼ିଶାର ସୁମିତ୍ରା ନାୟକଙ୍କୁ ଅଧିନାୟିକା ମନୋନୀତ କରାଯାଇଛି। ସୁମିତ୍ରାଙ୍କ ବ୍ୟତୀତ ଦଳରେ ସ୍ଥାନ ପାଇଥିବା ଓଡ଼ିଶାର ଅନ୍ୟ ୪ ହେଲେ ସୋନି ମାନ୍ଦାଙ୍ଗୀ, ଲିଜା ସର୍ଦାର, ରଜନୀ ଶବର ଓ ପାର୍ବତୀ କିସ୍କୁ। ଓଡ଼ିଶାରୁ ୫ ବ୍ୟତୀତ ୧୨ ଜଣିଆ ଦଳରେ ପଶ୍ଚିମବଙ୍ଗ ଓ ଦିଲ୍ଲୀର ୩ ଲେଖାଏଁ ଏବଂ ବିହାରରୁ ଜଣେ ସ୍ଥାନ ପାଇଛନ୍ତି। ଏସିଆରୁ ମୋଟ ୫ ରାଷ୍ଟ୍ର (ଥାଇଲାଣ୍ଡ, ସିଙ୍ଗାପୁର, ହଂକଂ, ଭାରତ ଓ ଆୟୋଜକ ଲାଓସ୍) ଏହି ପ୍ରତିଯୋଗିତାରେ ଭାଗ ନେବେ। ଶିବିରରେ ସହାୟତା ପାଇଁ କ୍ରୀଡ଼ା ଓ ଯୁବ ସେବା ବିଭାଗ ସହିତ କିଟ୍କୁ ଧନ୍ୟବାଦ ଜଣାଇଛନ୍ତି ରଗ୍ବି ଇଣ୍ଡିଆ ମହାସଚିବ ମହେଶ ମାଥାଇ। ଆମ ଝିଅମାନେ ଏବେ ଆନ୍ତର୍ଜାତିକସ୍ତରରେ ବେଶ୍ ଭଲ ପ୍ରଦର୍ଶନ କରିଛନ୍ତି। ଲାଓସ୍ରେ ମଧ୍ୟ ସେହି ସଫଳତା ଦୋହରାଇବେ ବୋଲି ମାଥାଇ ଆଶା ବ୍ୟକ୍ତ କରିଛନ୍ତି।