ସାରଜା: ଭାରତ ବିପକ୍ଷରେ ଦିନିକିଆ ଶୃଙ୍ଖଳା ଜିତି ୟୁଏଇ ଗସ୍ତ କରିଥିବା ଅଷ୍ଟ୍ରେଲିଆ ଦଳ ପାକିସ୍ତାନ ବିପକ୍ଷରେ ବିଜୟରୁ ଆଭିଯାନ ଆରମ୍ଭ କରିଛି। ଆରୋନ୍ ଫିଞ୍ଚ୍ଙ୍କ ଶତକ (୧୧୬) ଏବଂ ସନ୍ ମାର୍ସ (୯୧*)ଙ୍କ ଆକର୍ଷଣୀୟ ପାଳି ବଳରେ ଅଷ୍ଟ୍ରେଲିଆ ୨୮୧ ରନ୍ ବିଜୟ ଲକ୍ଷ୍ୟକୁ ଅତି ସହଜରେ ୮ ୱିକେଟ୍ ଏବଂ ୧ ଓଭର ହାତରେ ଥାଇ ଜିତି ନେଇଥିଲା। ଏଥି ସହିତ ଭାରତ ଗସ୍ତରୁ ଆରମ୍ଭ କରି ଲଗାତାର ଚତୁର୍ଥ ବିଜୟ ମଧ୍ୟ ପାଇଛି କଙ୍ଗାରୁ ଦଳ। ଫିଞ୍ଚ୍ଙ୍କ ଦଳ ମଧ୍ୟ ୫ ମ୍ୟାଚ୍ ଶୃଙ୍ଖଳାରେ ୧-୦ରେ ଆଗୁଆ ହୋଇଯାଇଛି। ଟସ୍ ଜିତି ପାକିସ୍ତାନ ବ୍ୟାଟିଂ କରିଥିଲା। ପ୍ରାରମ୍ଭିକ ବ୍ୟାଟସମ୍ୟାନ୍ ସନ୍ ମାସୁଦ୍ (୪୦, ୬୨ ବଲ, ୫ ଚୌକା), ୪ ନମ୍ବର ବ୍ୟାଟସମ୍ୟାନ୍ ଉମର୍ ଆକମଲ (୪୮, ୫୦ ବଲ, ୩ ଛକା)ଙ୍କ ସହିତ ୩ ନମ୍ବର ତାରକା ହାରିସ୍ ସୋହେଲ (୧୦୧*, ୧୧୫ ବଲ, ୬ ଚୌକା, ୧ ଛକା)ଙ୍କ ପ୍ରଥମ ଦିନିକିଆ ଶତକ ବଳରେ ଦଳ ୫୦ ଓଭରରେ ୫ ୱିକେଟ୍ ହରାଇ ୨୮୦ ରନ୍ କରିଥିଲା। ନିମ୍ନକ୍ରମରେ ଫହିଦ୍ ଅସ୍ରଫ (୨୮, ୨୬ ବଲ, ୪ ଚୌକା) ଏବଂ ଇମଦ୍ ୱାସିମ୍ (୨୮*, ୧୩ ବଲ, ୪ ଚୌକା, ୧ ଛକା) ମଧ୍ୟ ଉପଯୋଗୀ ଅବଦାନ ଦେଇଥିଲେ। ଅଷ୍ଟ୍ରେଲିଆ ପକ୍ଷରୁ ନାଥନ୍ କୁଲଟର୍ ନାଇଲ୍ ଦୁଇଟି ଏବଂ ରିଚାର୍ଡସନ, ଲାୟନ, ମ୍ୟାକ୍ସୱେଲ୍ ଗୋଟିଏ ଲେଖାଏଁ ୱିକେଟ୍ ନେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଜବାବରେ ଅଷ୍ଟ୍ରେଲିଆ ୪୯ ଓଭରରେ ୨ ୱିକେଟ୍ ହରାଇ ୨୮୧ ରନ୍ ସଂଗ୍ରହ କରି ନେଇଥିଲା। ଉସ୍ମାନ ଖୱାଜା (୨୪) ଏବଂ ଆରୋନ୍ ଫିଞ୍ଚ୍ (୧୧୬, ୧୩୫ ବଲ, ୮ ଚୌକା, ୨ ଛକା) ଆଉଟ୍ ହୋଇଥିବା ବେଳେ ସନ୍ ମାର୍ସ (୯୧*, ୧୦୨ ବଲ, ୪ଚୌକା, ୨ ଛକା) ଏବଂ ପିଟର୍ ହ୍ୟାଣ୍ଡସ୍କମ୍ଭ (୩୦*, ୨୭ ବଲ, ୨ ଚୌକା) ବିଜୟ ଶେଷ କରିଥିଲେ। ଫିଞ୍ଚ୍ ଓ ମାର୍ସ ଦ୍ବିତୀୟ ୱିକେଟ୍ରେ ୧୭୨ ରନ୍ ଯୋଡ଼ି ବିଜୟ ସହଜ କରିଦେଇଥିଲେ। ଫିଞ୍ଚ୍ଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା। ସଂକ୍ଷିପ୍ତ ସ୍କୋର: ପାକିସ୍ତାନ ୫୦ ଓଭରରେ ୨୮୦/୫ (ହାରିସ୍ ସୋହେଲ-୧୦୧*, କଲଟନ୍ ନାଇଲ୍-୨/୬୨)। ଅଷ୍ଟ୍ରେଲିଆ ୪୯ ଓଭରରେ ୨୮୧/୨ (ଆରୋନ୍ ଫିଞ୍ଚ୍-୧୧୬, ସନ୍ ମାର୍ସ-୯୧*, ଆବାସ-୧/୪୪)।