ପୁନେ : ଅମ୍ବାତି ରାୟଡୁଙ୍କ ୬୨ ବଲରେ ଶତକ ଫଳରେ ଚେନ୍ନାଇ ସୁପକିଙ୍ଗସ ସନରାଇଜର୍ସ ହାଇଦ୍ରାବାଦକୁ ୮ ଓ୍ଵିକେଟରେ ପରାସ୍ତ କରିଛି । ହାଇଦ୍ରାବାଦର ୧୮୦ ରନ ଟାର୍ଗେଟ କୁ ଚେନ୍ନାଇର ଦୁଇ ଓପନର ରାୟଡୁ ଓ ସେନ ଓ୍ଵାଟସନ ଙ୍କ ଦୃଢ ବ୍ୟାଟିଂ ଫଳରେ ସହଜରେ ହାସଲ କରିନେଇଛି । ରାୟଡୁ ୬୨ ବଲରେ ୭ ଛକା ଓ ୭ ଚୌକା ସହ ୧୦୦ ରନ ଓ ଓ୍ଵାଟସନ ୩୫ ବଲରେ ୫ ଚୌକା ଓ ୩ ଛକା ସହ ୫୭ ରନ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସ୍ଥାନୀୟ ମହାରାଷ୍ଟ୍ର କ୍ରିକେଟ ଆସୋସିଏସନ ଷ୍ଟାଡିୟମଠାରେ ଚାଲିଥିବା ଆଇପିଏଲ ୨୦୧୮ର ୪୬ତମ ଲିଗ ମ୍ୟାଚରେ ଚେନ୍ନାଇର ଅଧିନାୟକ ମହେନ୍ଦ୍ର ସିଂ ଧୋନି ଟସ ଜିଣି ପ୍ରଥମେ ଫିଲଡିଂ କରିବାକୁ ନିଷ୍ପତ୍ତି ନେଇଥିଲେ । ଇନିଂସ ଆରମ୍ଭରୁ ହାଇଦ୍ରାବାଦ ନିଜ ଓପନର ଆଲେକ୍ସ ହେଲ୍ସଙ୍କୁ ହରାଇଥିଲେ ମଧ୍ୟ ଅନ୍ୟତମ ଓପନର ଶିଖର ଧଓ୍ଵନ ଓ କେନ ଓ୍ଵିଲିୟମ୍ସ ଲଢୁଆ ବ୍ୟାଟିଂ କରୁ ଦଳକୁ ବିପଦରୁ ଉଦ୍ଧାର କରିବା ସହ ୧୨୩ ରନର ପାର୍ଟନରସିପ କରିଥିଲେ । ତେବେ ଦଳର ସ୍କୋର ୧୪୧ ହୋଇଥିବା ବେଳେ ଉଭୟ ବ୍ୟାଟ୍ସମ୍ୟାନ ଆଉଟ ହୋଇ ପାଭିଲିୟନ ଫେରିବା ପରେ ଦଳ ପୁଣି ବିପଦରେ ପଡିଯାଇଥିଲା । ତେବେ ଶେଷ ବେଳକୁ ଦିପକ ହୁଦା ଓ ସକିବୁଲ ହସଲ ସତର୍କତାର ସହ ଖେଳିବା ସହ ଦଳର ସ୍କୋରକୁ ୧୭୯ ପର୍ଯ୍ୟନ୍ତ ପହଞ୍ଚାଇଥିଲେ ।
ଚେନ୍ନାଇ ତରଫରୁ ସାର୍ଦ୍ଦୁଳ ଠାକୁର ୨ଟି ଏବଂ ଡେ୍ଵନ ବ୍ରାଭୋ ଓ ଦିପକ ଚହର ଗୋଟିଏ ଲେଖାଏଁ ଓ୍ଵିକେଟ ନେଇଥିଲେ । ହାଇଦ୍ରାବାଦ ଏପର୍ଯ୍ୟନ୍ତ ୧୨ଟି ମ୍ୟାଚ ଖେଳି ୯ ବିଜୟ ଓ ୩ ପରାଜୟ ସହ ୧୮ ପଏଣ୍ଟ ପାଇ ପଏଣ୍ଟ ଟେବୁଲର ଉପରେ ରହିଛି । ସେହିପରି ଚେନ୍ନାଇ ୧୨ଟି ମ୍ୟାଚ ଖେଳି ୮ ବିଜୟ ୪ ପରାଜୟ ସହ ୧୬ ପଏଣ୍ଟ ପାଇ ଦ୍ୱିତୀୟ ସ୍ଥାନରେ ରହିଛି ।