ଧ୍ୟାନଚାନ୍ଦ ସ୍ମାରକୀ ମହିଳା ହକି: ପାନପୋଷ କ୍ରୀଡ଼ା ଛାତ୍ରାବାସ ସେମିରେ
ରାଉରକେଲା: ତୃତୀୟ ସର୍ବଭାରତୀୟ ମେଜର୍ ଧ୍ୟାନଚାନ୍ଦ ସ୍ମାରକୀ ମହିଳା ହକି ପ୍ରତିଯୋଗିତାର ଦ୍ୱିତୀୟ ଦିବସରେ ପାନପୋଷ କ୍ରୀଡ଼ା ଛାତ୍ରବାସ ଏବଂ ଉତ୍ତର-କେନ୍ଦ୍ରୀୟ ରେଳବାଇ ଦଳ କ୍ରମାଗତ ଦ୍ୱିତୀୟ ବିଜୟ ସହ ସେମିଫାଇନାଲରେ ସ୍ଥାନ ସୁନିଶ୍ଚିତ କରିଛନ୍ତି। ସ୍ଥାନୀୟ ବିଜୁ ପଟ୍ଟନାୟକ ହକି ଷ୍ଟାଡ଼ିୟମ୍ରେ ଖେଳା ଯାଇଥିବା ପ୍ରଥମ ମ୍ୟାଚ୍ରେ ପାନପୋଷ କ୍ରୀଡ଼ା ଛାତ୍ରାବାସ ଦଳ ଶକ୍ତିଶାଳୀ ଉତ୍ତର-ପୂର୍ବ ରେଳବାଇ ଗୋରଖପୁରକୁ ୪-୨ ଗୋଲ୍ରେ ପରାସ୍ତ କରି ପ୍ରଥମ ଦଳ ଭାବେ ସେମିଫାଇନାଲ ପ୍ରବେଶ କରିଥିଲା। ଗୋରଖପୁର ଦଳ ପ୍ରଥମାର୍ଧରେ ୨ ଗୋଲ୍ରେ ଅଗ୍ରଣୀ ଥିବା ସତ୍ତ୍ୱେ ପାନପୋଷ ଚମତ୍କାର ପ୍ରତ୍ୟାବର୍ତନ କରି ମ୍ୟାଚ୍ ଛଡ଼ାଇ ନେଇଥିଲା। ଚତୁର୍ଥ ମିନିଟ୍ରେ ବାସନ୍ତୀ କଚ୍ଛପ ଓ ୨୦ ମିନିଟ୍ରେ କୋମଳ ସାହାନି ପେନାଲ୍ଟି କର୍ଣ୍ଣରରେ ଗୋଲ୍ କରି ଗୋରଖପୁର ଦଳକୁ ଆଗୁଆ କରିଥିଲେ। ତେବେ ମଧ୍ୟାନ୍ତର ପରେ ପାନପୋଷ ଦଳ ଲାଗଲାଗ ୪ ଗୋଲ୍ ଲଦିଦେଇଥିଲା। ଜାହ୍ନବୀ ପ୍ରଧାନ (୩୬ ଓ ୪୭ ମିନିଟ୍) ଦୁଇଟି ପେନାଲ୍ଟି କର୍ଣ୍ଣର ଗୋଲ୍ କରି ସ୍ଥିତି ସମାନ କରିଦେବା ପରେ ୬୫ ମିନିଟ୍ରେ ନୀମାବତୀ ସିଂ ଏବଂ ୬୯ ମିନିଟ୍ରେ ରୋଜିତା କୁଜୁର ଗୋଟିଏ ଲେଖାଏଁ ଗୋଲ୍ ଯୋଡ଼ିଥିଲେ।
Sambad is now on WhatsApp
Join and get latest news updates delivered to you via WhatsApp
ବର୍ଗ-ବିରେ ଭୁବନେଶ୍ୱର କ୍ରୀଡ଼ା ଛାତ୍ରବାସ ୩-୧ ଗୋଲ୍ରେ ଚଣ୍ଡିଗଡ଼ ୟୁକୋ ବ୍ୟାଙ୍କ ଦଳକୁ ପରାସ୍ତ କରିଥିଲା। ମଧ୍ୟାନ୍ତର ସୁଦ୍ଧା ଉଭୟ ଦଳ ୧-୧ ଗୋଲ୍ କରିଥିଲେ। ଭୁବନେଶ୍ୱର ପକ୍ଷରୁ ଏଲିମା ମିଞ୍ଜ ୨୩ ମିନିଟ୍ରେ ପ୍ରଥମ ଗୋଲ କରିଥିବା ବେଳେ ଚଣ୍ଡିଗଡ଼ ପକ୍ଷରୁ ମନୀଷା ଧବଲ ୨୮ ମିନିଟ୍ରେ ଗୋଲ୍ ଶୁଝି ଦେଇଥିଲେ। ଦ୍ୱିତୀୟାର୍ଧରେ ଦୀପ୍ତି ଲାକ୍ରା ଏବଂ ସଂଗୀତା ରୋଜ କୁଲ୍ଲ ଆଉ ଦୁଇଟି ଗୋଲ୍ କରିବାରୁ ଭୁବନେଶ୍ୱର ଦଳ ୩-୧ରେ ବିଜୟୀ ହୋଇଥିଲା।
ବର୍ଗ-ଏର ଏକ ମ୍ୟାଚ୍ରେ ଷ୍ଟିଲ୍ ପ୍ଲାଣ୍ଟ ବୋର୍ଡ଼ (ଭିଲାଇ) ଦଳ ୭-୨ ଗୋଲ୍ରେ ହକି ଏକାଡ଼େମି ନାଗପୁରକୁ ପରାସ୍ତ କରିଛି। ଭିଲାଇ ପକ୍ଷରୁ ଅଞ୍ଜଳୀ ମହିୟୋ, ତରସିଲା ବେକ୍ ଏବଂ ଗାୟତ୍ରୀ କିସାନ ପ୍ରତ୍ୟେକ ୨ ଲେଖାଏଁ ଓ ପ୍ରିୟାଂଶୀ ଗୋଟିଏ ଗୋଲ୍ କରିଥିଲେ। ନାଗପୁର ପକ୍ଷରୁ ଶଶୀ ଲାକ୍ରା ପେନାଲ୍ଟି କର୍ଣ୍ଣରରେ ୨ଟି ଗୋଲ୍ କରିଥିଲେ। ସେହିଭଳି ଗୁରୁବାରର ଶେଷ ମ୍ୟାଚ୍ରେ ଉତ୍ତର-କେନ୍ଦ୍ରୀୟ ରେଳବାଇ (ଆଲ୍ଲାହାବାଦ୍) ଦଳ ୩-୧ଗୋଲ୍ରେ ଧାନବାଦ୍ ପୂର୍ବ-କେନ୍ଦ୍ରୀୟ ରେଳବାଇ ଦଳକୁ ପରାସ୍ତ କରିଥିଲା। ଆଲ୍ଲାହାବାଦ୍ ପକ୍ଷରୁ ଅନୁବାଲା, ସବିତା ଏବଂ ପୁଜା କିଣ୍ଡୋ ଗୋଟିଏ ଲେଖାଏଁ ଗୋଲ୍ କରିଥିବା ବେଳେ ଧାନବାଦ୍ ଦଳ ପକ୍ଷରୁ ମରିୟମ୍ ଚାମ୍ପିଆ ଏକମାତ୍ର ଗୋଲ୍ କରିଥିଲେ।