ନୂଆଦିଲ୍ଲୀ: ମାଲେସିଆର ଆଲୋର୍ ସେତାରରେ ଚାଲିଥିବା ଏସିଆ ଦଳଗତ ବ୍ୟାଡ୍ମିଣ୍ଟନ ପ୍ରତିଯୋଗିତାରେ ଭାରତର ଉଭୟ ପୁରୁଷ ଓ ମହିଳା ଦଳ କ୍ୱାର୍ଟର ଫାଇନାଲ୍ ପ୍ରବେଶ କରିଛନ୍ତି। ପୁରୁଷ ଦଳ ପ୍ରଥମ ମ୍ୟାଚ୍ରେ ଫିଲିପାଇନ୍ସକୁ ଏବଂ ଦ୍ୱିତୀୟ ମ୍ୟାଚ୍ରେ ମାଳଦୀପକୁ ସମାନ ୫-୦ ଲେଖାଏଁ ବ୍ୟବଧାନରେ ପରାସ୍ତ କରି କ୍ୱାର୍ଟର ଫାଇନାଲ୍ ସ୍ଥାନ ପକ୍କା କରିନେଇଛି। ତେବେ କ୍ୱାର୍ଟର ଫାଇନାଲ୍ ପୂର୍ବରୁ ପୁରୁଷ ଦଳ ତୃତୀୟ ତଥା ଶେଷ ଗ୍ରୁପ୍ ମ୍ୟାଚ୍ରେ ଶକ୍ତିଶାଳୀ ଇଣ୍ଡୋନେସିଆକୁ ଭେଟିବ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ପ୍ରଥମ ମ୍ୟାଚ୍ରେ ହଂକଂକୁ ୩-୨ରେ ପରାସ୍ତ କରିଥିବା ମହିଳା ଦଳ ଦ୍ୱିତୀୟ ମ୍ୟାଚ୍ କିନ୍ତୁ ହାରିଯାଇଛି। ତାରକା ଖେଳାଳି ପିଭି ସିନ୍ଧୁଙ୍କ ବିଜୟ ସତ୍ତ୍ୱେ ଭାରତ ୧-୪ରେ ଜାପାନ ନିକଟରୁ ପରାସ୍ତ ହୋଇଛି। ତଥାପି ଜାପାନଠୁ ହାରିବା ସତ୍ତ୍ୱେ ଭାରତ ମହିଳା ଦଳ କ୍ୱାର୍ଟର ଫାଇନାଲ୍ରେ ପହଞ୍ଚିଯାଇଛି। ବିଶେଷକରି ଜାପାନ ତା’ର ପ୍ରଥମ ମ୍ୟାଚ୍ରେ ହଂକଂକୁ ୫-୦ରେ ପରାସ୍ତ କରିଥିବାରୁ ଭାରତକୁ ଫାଇଦା ମିଳିଥିଲା। ଗୋଟିଏ ବିଜୟ ଓ ଗୋଟିଏ ପରାଜୟ ସହ ଭାରତ ଗ୍ରୁପ୍ରେ ଦ୍ୱିତୀୟ ସ୍ଥାନ ପାଇ କ୍ୱାର୍ଟରକୁ ଉନ୍ନୀତ ହୋଇଛି। ଜାପାନ ବିପକ୍ଷରେ ସିନ୍ଧୁ ୨୧-୧୯ ଓ ୨୧-୧୫ରେ ବିଶ୍ୱ ମାନ୍ୟତାର ଦ୍ୱିତୀୟ ଅକାନେ ୟାମାଗୁଚିଙ୍କୁ ପରାସ୍ତ କରିଥିଲା ବେଳେ ଶ୍ରୀକୃଷ୍ଣପ୍ରିୟା କୁଦାରଭଲ୍ଲୀ ୧୨-୨୧, ୧୦-୨୧ରେ ସାୟାକା ସାଟୋଙ୍କଠାରୁ ହାରି ଯାଇଥିଲେ। ଏହାପରେ ଯୁଗଳ ବିଶେଷଜ୍ଞ ଅଶ୍ୱିନୀ ପୋନାପ୍ପା ୧୪-୨୧, ୧୨-୨୧ରେ ଆୟା ଓହରିଙ୍କ ନିକଟରୁ, ସାନ୍ୟୋଗୀତା ଘୋରପୋଡେ ଓ ପ୍ରଜକ୍ତା ସାଓ୍ଵନ୍ତ ୧୭-୨୧, ୧୭-୨୧ରେ ସିହୋ ଟନକା-କୋହାରୁ ୟୋନେମୋଟୋଙ୍କଠୁ ଏବଂ ଶେଷରେ ଅଶ୍ୱିନୀ-ଏନ୍ ସିକ୍କି ରେଡ୍ଡୀ ଯୋଡ଼ି ୧୮-୨୧, ୧୮-୨୧ରେ ମିସାକି ମାସୁଟୋମୋ-ଆୟାକା ଟାକାହାସିଙ୍କଠାରୁ ହାରିଯାଇଥିଲେ।