ଇନ୍ଦୋର ଟି-୨୦: ରୋହିତଙ୍କ ବିସ୍ଫୋରକ ବ୍ୟାଟିଂ, ଶ୍ରୀଲଙ୍କାକୁ ୨୬୧ ରନ୍ ଟାର୍ଗେଟ ଦେଲା ଭାରତ
ହୋଲ୍କର ଷ୍ଟାଡିୟମର ପ୍ରଥମ ଟି-୨୦ ମ୍ୟାଚରେ ଛକା-ଚୌକା ବର୍ଷା
ଇନ୍ଦୋର: ଟିମ୍ ଇଣ୍ଡିଆର ଓପନର ତଥା ଅଧିନାୟକ ରୋହିତ ଶର୍ମା(୧୧୮ ରନ୍, ୧୨ଟି ଚୌକା ଓ ୧୦ଟି ଛକା) ଓ ସାଥି ଓପନର ଲୋକେଶ ରାହୁଲ(୮୯ ରନ୍, ୫ଟି ଚୌକା, ୬ଟି ଛକା)ଙ୍କ ବିସ୍ଫୋରକ ବ୍ୟାଟିଂ ବଳରେ ଭାରତ ନିର୍ଦ୍ଧାରିତ ଓଭରରେ ୪ଟି ଓ୍ଵିକେଟ ହରାଇ ୨୬୦ରନ୍ ସଂଗ୍ରହ କରିଛି। ଶ୍ରୀଲଙ୍କା ବିପକ୍ଷରେ ମଧ୍ୟପ୍ରଦେଶର ଇନ୍ଦୋରସ୍ଥିତ ହୋଲ୍କର ଷ୍ଟାଡିୟମରେ ଭାରତ ଶୁକ୍ରବାର ଆରମ୍ଭରୁ ଭଲ ପ୍ରଦର୍ଶନ କରିଥିଲା। ପ୍ରଥମ ଥର ପାଇଁ ଟି-୨୦ ଖେଳା ଯାଇଥିବା ମ୍ୟାଚରେ ଦର୍ଶକମାନେ ଛକା ଓ ଚୌକା ଦେଖିବାର ମଜା ନେଇଥିଲେ। ଭାରତର ବ୍ୟାଟ୍ସମ୍ୟାନ ସମୁଦାୟ ୨୧ଟି ଚୌକା ଓ ୨୧ଟି ଛକା ମାରିଛନ୍ତି।
Sambad is now on WhatsApp
Join and get latest news updates delivered to you via WhatsApp
୩ଟି ମ୍ୟାଚ୍ ବିଶିଷ୍ଟ ଶୃଙ୍ଖଳାର ୨ୟ ମ୍ୟାଚରେ ଟସ୍ ଜିଣି ଶ୍ରୀଲଙ୍କା ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଫଳରେ ଭାରତ ବ୍ୟାଟିଂ କରିଥିଲା। ଭାରତ ପ୍ରଥମ ଓ୍ଵିକେଟରେ ରୋହିତ ଶର୍ମାଙ୍କୁ ୧୬୫ ରନ୍(୧୨.୪ଓଭର)ରେ ହରାଇଥିଲା। ରୋହିତ ୪୩ଟି ବଲ ଖେଳି ଦୁଷ୍ମନ୍ତ ଚମିରାଙ୍କ ବଲ ଅକିଲ ଧନଞ୍ଜୟଙ୍କୁ କ୍ୟାଚ ଦେଇଥିଲେ। ୧୮.୩ ଓଭରରେ ଶ୍ରୀଲଙ୍କାର ୨ୟ ଶିକାର ହୋଇଥିଲେ ଲୋକେଶ ରାହୁଲ। ସେ ନୂଆନ ପ୍ରଦୀପଙ୍କ ବଲ ନିରୋସନା ଡିକଓ୍ଵାଲାଙ୍କୁ କ୍ୟାଚ ଦେଇଥିଲେ। ହାର୍ଦ୍ଦିକ ପାଣ୍ଡ୍ୟା ୩ଟି ବଲ ଖେଳି ୧୦ ରନ୍ ସଂଗ୍ରହ କରିବା ପରେ ନୂଅନ ପ୍ରଦୀପଙ୍କ ବଲ ସଦିରାଙ୍କୁ କ୍ୟାଚ ଦେଇଥିଲେ। ସେତେବେଳକୁ ଭାରତର ସ୍କୋର ୧୯ ଓଭରରେ ୨୫୩ ରନ୍ ଥିଲା। ସେହିପରି ଭାରତ ୪ର୍ଥ ଓ୍ଵିକେଟରେ ୨୫୪ ରନ୍ରେ ଶ୍ରେୟସ ଆୟାର ଏଲବିଡବ୍ଲୁ ହୋଇଥିଲେ। ଆୟାର ଥିରସା ପେରାରାଙ୍କ ଶିକାର ହୋଇଥିଲେ। ପେରାରା ଇନିଂସର ଶେଷ ଓଭରରେ ମହେନ୍ଦ୍ର ସିଂହ ଧୋନି(୨୮)ଙ୍କୁ ବୋଲ୍ଡ କରିଥିଲେ। ଦିନେଶ କାର୍ତ୍ତିକ ଶେଷ ୨ଟି ବଲରୁ ୫ ରନ୍ ସଂଗ୍ରହ କରି ଭାରତର ସ୍କୋରକୁ ୨୬୦ ରନ୍ରେ ପହଞ୍ଚାଇ ଥିଲେ।
ରୋହିତ କ୍ୟାରିୟରର ୨ୟ ଶତକ (୧୦୧ ରନ୍, ୩୫ ବଲ) ହାସଲ କରିଛନ୍ତି। ପୂର୍ବରୁ ସେ ୨୩ଟି ବଲରେ ଅର୍ଦ୍ଧଶତକ(୫୩ ରନ୍) ହାସଲ କରିଥିଲେ। ସେହିଭଳି ଲୋକେଶ ରାହୁଲ କ୍ୟାରିୟରର ୩ୟ ଅର୍ଦ୍ଧଶତକ(୫୧)କୁ ୩୫ଟି ବଲ୍ରେ ପୂରା କରିଥିଲେ। ଭାରତର ସ୍କୋର ୮.୪ ଓଭରରେ ୧୦୦ ରନ୍ ଓ ୧୫.୫ ଓଭରରେ ୨୦୦ ରନ୍ ସଂଗ୍ରହ କରିଥିଲା।
କଟକର ବାରବାଟୀ ଷ୍ଟାଡିୟମରେ ପରାଜିତ ହୋଇଥିବା ଶ୍ରୀଲଙ୍କା ଏହି ମ୍ୟାଚରେ ମିଳିଥିବା ବିଜୟ ଲକ୍ଷ୍ୟ ପୂରା କରି ଶୃଙ୍ଖଳାକୁ ୧-୧ରେ ଆଣିବାକୁ ଉଦ୍ୟମ କରିବ। ସେହିଭଳି ଭାରତ ଏହି ମ୍ୟାଚକୁ ନିଜର କରିବା ସହିତ ଶୃଙ୍ଖଳା ବିଜୟୀ ହେବାକୁ ଉଦ୍ୟମ କରିବ।