ଦୁବାଇ: ଚଳିତ ଏସିଆ କପ୍ କ୍ରିକେଟ୍ ପ୍ରତିଯୋଗିତାର ସର୍ବବୃହତ୍ ମୁକାବିଲା ବୁଧବାର ଅନୁଷ୍ଠିତ ହେବ। ଆସନ୍ତାକାଲି ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ମୁହାଁମୁହିଁ ହେବେ। ସେଥିପାଇଁ ଏହି ବହୁ ପ୍ରତୀକ୍ଷିତ କ୍ରିକେଟ୍ ଲଢ଼େଇ ମହାମୁକାବିଲାର ମାନ୍ୟତା ଲାଭ କରିଛି। ଶେଷ ଥର ପାଇଁ ଭାରତ ଏବଂ ପାକିସ୍ତାନ ଗତବର୍ଷ ଇଂଲଣ୍ଡରେ ଆୟୋଜିତ ଚାମ୍ପିଅନ୍ସ ଟ୍ରଫିର ଫାଇନାଲରେ ସାମ୍ନାସାମ୍ନି ହୋଇଥିଲେ। ସେଥର ପାକିସ୍ତାନ ବାଜି ମାରି ନେଇଥିଲା। ଭାରତ ସମସ୍ତଙ୍କର ପସନ୍ଦର ଦଳ ଭାବେ ପଡ଼ିଆକୁ ଓହ୍ଲାଇଥିଲା। ତେବେ ପାକିସ୍ତାନ ବଡ଼ ବିପର୍ଯ୍ୟୟ ସୃଷ୍ଟି କରି ୧୮୧ ରନ୍ର ବଡ଼ ବ୍ୟବଧାନରେ ଭାରତକୁ ଧରାଶାୟୀ କରି ବିଜେତା ମୁକୁଟ ପିନ୍ଧିଥିଲା। ଦୁବାଇରେ ମଧ୍ୟ ପାକିସ୍ତାନ ଏହି ବିଜୟ ଧାରାକୁ ଆଗେଇ ନେବା ଲକ୍ଷ୍ୟରେ ରହିବ। ଏସିଆ କପ୍ କଥା ଯଦି ବିଚାରକୁ ନିଆଯାଏ, ତା’ହେଲେ ଭାରତ ଅବଶ୍ୟ ୬ ଥର ପାକିସ୍ତାନକୁ ପରାସ୍ତ କରିଛି। ଅନ୍ୟପକ୍ଷରେ ପାକିସ୍ତାନ ପାଞ୍ଚ ଥର ଭାରତକୁ ମାତ୍ ଦେଇଛି। ସେହିଦୃଷ୍ଟିରୁ ପାକିସ୍ତାନ ପୁରୁଣା ପ୍ରତିଦ୍ୱନ୍ଦ୍ୱୀ ଭାରତ ବିପକ୍ଷରେ ନିଜ ଏସିଆ କପ୍ ବିଜୟ ସଂଖ୍ୟାକୁ ଅଧଡଜନେକୁ ବଢ଼ାଇବାକୁ ଚାହିଁବ। ସେପଟେ ଗତଥରର ବିଜେତା ଭାରତ ବୁଧବାର ଚାମ୍ପିଅନ୍ସ ଟ୍ରଫି ପରାଜୟର ପ୍ରତିଶୋଧ ସହ ସୁପରଫୋର୍ରେ ସ୍ଥାନ ସୁରକ୍ଷିତ କରିବା ଲକ୍ଷ୍ୟରେ ରହିବ।
Sambad is now on WhatsApp
Join and get latest news updates delivered to you via WhatsApp
ସମ୍ଭାବ୍ୟ ଭାରତ: ରୋହିତ ଶର୍ମା (ଅଧିନାୟକ), ଶିଖର ଧାଓ୍ଵନ, ଲୋକେଶ ରାହୁଲ, ଅମ୍ବାତି ରାୟୁଡୁ, ମନୀଷ ପାଣ୍ଡେ, କେଦାର ଯାଦବ, ମହେନ୍ଦ୍ର ସିଂହ ଧୋନି, ଦୀନେଶ କାର୍ତିକ, ହାର୍ଦିକ ପାଣ୍ଡ୍ୟା, କୁଲଦୀପ ଯାଦବ, ୟୁଜବେନ୍ଦ୍ର ଚହଲ, ଭୁବନେଶ୍ୱର କୁମାର, ଖଲିଲ ଅହମ୍ମଦ, ଯସପ୍ରୀତ ବୁମରା।
ସମ୍ଭାବ୍ୟ ପାକିସ୍ତାନ: ସର୍ଫରାଜ ଅହମ୍ମଦ (ଅଧିନାୟକ), ଆସିଫ ଅଲ୍ଲୀ, ବାବର ଆଜମ, ଫହୀମ ଅଶରଫ, ଫଖର ଜମନ, ହାରିସ୍ ସୋହେଲ, ହସନ ଅଲ୍ଲୀ, ଇମାମ ଉଲ୍ ହକ୍, ମହମ୍ମଦ ଆମିର, ସଦାବ ଖାନ୍, ସୋଏବ ମଲ୍ଲିକ, ଉସ୍ମାନ ଖାନ୍, ଜୁନୈଦ ଖାନ୍।
କୋହଲିଙ୍କ ବିନା ଭାରତ
ନିୟମିତ ଅଧିନାୟକ ବିରାଟ କୋହଲିଙ୍କ ବିନା ଭାରତ ଏସିଆ କପ୍ ଖେଳୁଛି। ପାକିସ୍ତାନ ବିପକ୍ଷରେ ତାଙ୍କ ଅନୁପସ୍ଥିତି ନିଶ୍ଚିତ ଭାବେ ଅନୁଭୂତ ହେବ। ପାକିସ୍ତାନ କିନ୍ତୁ ଶାନ୍ତିର ନିଶ୍ୱାସ ମାରିଥିବ। କାମଚଳା ଅଧିନାୟକ ରୋହିତ ଶର୍ମାଙ୍କ ଦାୟିତ୍ୱ କିନ୍ତୁ ବଢ଼ିଯାଇଛି। ତାଙ୍କୁ ରନ୍ କରିବା ସହ ବଳିଷ୍ଠ ନେତୃତ୍ୱର ପ୍ରମାଣ ଦେବାକୁ ପଡ଼ିବ।
ମଧ୍ୟକ୍ରମ ଚିନ୍ତା
ଶୀର୍ଷକ୍ରମରେ ଭାରତ ବେଶ୍ ଶକ୍ତିଶାଳୀ। ହେଲେ ମଧ୍ୟକ୍ରମକୁ ନେଇ ଅଧିନାୟକ ରୋହିତ ଶର୍ମା ଚିନ୍ତାରେ ଅଛନ୍ତି। ବିଶେଷ କରି ଚତୁର୍ଥ ଏବଂ ଷଷ୍ଠ ସ୍ଥାନରେ କିଏ ଖେଳିବ ତା’ହା ଏବେବି ଅସ୍ପଷ୍ଟ ରହିଛି। ହଂକଂ ବିପକ୍ଷରେ ଦୀନେଶ କାର୍ତିକ ଚତୁର୍ଥରେ ଖେଳିଥିଲେ। ପାକିସ୍ତାନ ବିପକ୍ଷରେ ଏହି ଧାରା ବଦଳିପାରେ।
ପାକିସ୍ତାନର ଶକ୍ତିିଶାଳୀ ଶୀର୍ଷକ୍ରମ
ପାକିସ୍ତାନର ଶୀର୍ଷକ୍ରମ ମଧ୍ୟ ଭାରତ ଭଳି ବେଶ୍ ଶକ୍ତିଶାଳୀ। ବାବର ଆଜମ, ଫଖର ଜମନ ଚାମ୍ପିଅନ୍ସ ଟ୍ରଫି ଫାଇନାଲରେ ଚମତ୍କାର ବ୍ୟାଟିଂ କରିଥିଲେ। ଇମାମ-ଉଲ୍-ହକ୍ ମଧ୍ୟ ଭଲ ଫର୍ମରେ ଅଛନ୍ତି। ଜମନ ନିକଟରେ ଜିମ୍ବାେଓ୍ଵ ବିପକ୍ଷରେ ଦ୍ୱିଶତକ ଅର୍ଜନ କରିଛନ୍ତି। ହଂକଂ ବିପକ୍ଷରେ ଉମାମ ଅର୍ଧଶତକ ହାସଲ କରିଛନ୍ତି। ଏମାନେ ଭାରତକୁ ଚିନ୍ତାରେ ପକାଇ ପାରନ୍ତି।
ବୋଲିଂ ବିବିଧତା
ଭଲ ବ୍ୟାଟ୍ସମ୍ୟାନ୍ ଥିଲେ ମଧ୍ୟ ବୋଲିଂ ହେଉଛି ପାକିସ୍ତାନର ଅସଲ ଦକ୍ଷତା। ବୋଲରଙ୍କ ବଳରେ ହିଁ ଚାମ୍ପିଅନ୍ସ ଟ୍ରଫିରେ ଭାରତକୁ ଏହି ଦଳ ପାଣି ପିଆଇ ଦେଇଥିଲା। ପାକିସ୍ତାନର ବୋଲିଂ ମୁଖ୍ୟତଃ ହାସନ ଅଲ୍ଲୀ ଏବଂ ମହମ୍ମଦ ଆମିରଙ୍କ ଉପରେ ନିର୍ଭରଶୀଳ ରହିବ। ଯୁବ ବୋଲର ଉସମାନ୍ ଖାନ୍ ମଧ୍ୟ ନିଜ ପ୍ରଦର୍ଶନରେ ଢେର ପ୍ରଭାବିତ କରିଛନ୍ତି। ହଂକଂ ବିପକ୍ଷରେ ସେ ତିନିଟି ଓ୍ଵିକେଟ୍ ଅକ୍ତିଆର କରିଥିଲେ। ଲେଗ୍ ସ୍ପିନର ସଦାବ ଖାନ୍ ମଧ୍ୟ କିଛି କମ୍ ନୁହନ୍ତି। ପୂର୍ବତନ ଅଧିନାୟକ ସୋଏବ ମଲ୍ଲିକ ମଧ୍ୟ ସ୍ପିନ୍ ବୋଲିଂ କରିପାରିବେ। ପାକିସ୍ତାନ ଖେଳାଳିଙ୍କୁ ଉତ୍ସାହିତ କରିବା ଲାଗି ବୁଧବାର ଦୁବାଇ ଅନ୍ତର୍ଜାତୀୟ ଷ୍ଟାଡିୟମର ଭିଆଇପି ଗ୍ୟାଲେରିରେ ପ୍ରଧାନମନ୍ତ୍ରୀ ତଥା ବିଶ୍ୱ ବିଜୟୀ ଅଧିନାୟକ ଇମ୍ରାନ୍ ଖାନ ଉପସ୍ଥିତ ରହିବେ।