ଇନ୍ଦୋର ଟେଷ୍ଟରେ ମୟଙ୍କ ଅଗ୍ରଓ୍ଵାଲଙ୍କ ଆକର୍ଷଣୀୟ ଦ୍ୱିଶତକ, ଦୃଢ ସ୍ଥିତିରେ ଭାରତ
ଇନ୍ଦୋର : : ଇନ୍ଦୋରର ହୋଲକର କ୍ରିକେଟ ଷ୍ଟାଡିୟମଠାରେ ଚାଲିଥିବା ଭାରତ ବାଂଲାଦେଶ ପ୍ରଥମ ଟେଷ୍ଟ ମ୍ୟାଚରେ ଭାରତ ନିଜର ସ୍ଥିତି ସୁଦୃଢ କରିଛି । ଆଜି ଭାରତୀୟ ଇନିଂସର ସବୁଠାରୁ ବଡ଼ ଆକର୍ଷଣ ହେଲା ଓପନର ମୟଙ୍କ ଅଗ୍ରଓ୍ଵାଲଙ୍କ ଦ୍ୱିଶତକ । ଏହା ଫଳରେ ଭାରତ ଏପର୍ଯ୍ୟନ୍ତ ୪ ଓ୍ଵିକେଟ ହରାଇ ୩୭୬ ରନ ସଂଗ୍ରହ କରିଛି ଓ ବାଂଲା ଠାରୁ ୨୨୬ ରନରେ ଆଗୁଆ ଅଛି ।
Sambad is now on WhatsApp
Join and get latest news updates delivered to you via WhatsApp
ଗତ କାଲି ରୋହିତ ଶର୍ମାଙ୍କ ସହ ବ୍ୟାଟିଂ ଓପନ କରିଥିବା ମୟଙ୍କ ଚେତେଶ୍ୱର ପୂଜାରାଙ୍କ ସହ ମିଶି ଦଳର ସ୍ଥିତିକୁ ସୁଧାରିଥିଲେ । ପୂଜାରାଙ୍କ ଆଉଟ ପରେ ଅଧିନାୟକ ବିରାଟ କୋହଲୀ ମଧ୍ୟ ଶୂନରେ ଆଉଟ ହୋଇଯାଇଥିଲେ । ତେବେ ମୟଙ୍କ ଗୋଟିଏ ପଟେ ସତର୍କତାର ସହ ବ୍ୟାଟିଂ ଅବ୍ୟାହତ ରଖିଥିଲେ । ବିରାଟଙ୍କ ପରେ ଆସିଥିବା ଅଜିଙ୍କ୍ୟ ରାହାଣେଙ୍କ ସହ ମିଶି ଦଳୀୟ ସ୍ଥିତିକୁ ସୁଦୃଢ କରିଥିଲେ । ଅଜିଙ୍କ୍ୟ ୮୬ ରନ କରି ଆଉଟ ହୋଇଥିଲେ ।
ଗତକାଲି ବାଂଲାଦଳ ଟସ ଜିଣି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ତେବେ ଦଳର କୌଣସି ବ୍ୟାଟସମ୍ୟାନ ଭାରତୀୟ ବୋଲରଙ୍କ ସମ୍ମୁଖୀନ ହୋଇପାରିନଥିଲେ । ଦଳ ପକ୍ଷରୁ ମୁସ୍ତାଫିଜୁର ରହିମ ସର୍ବାଧିକ ୪୩ ଓ ମୋମିନୁଲ ହକ ୩୭ ରନ କରିଥିଲେ । ଭାରତ ପକ୍ଷରୁ ମହମ୍ମଦ ସାମୀ ୩ଟି, ଉମେଶ ଯାଦବ, ଇଶାନ୍ତ ଶର୍ମା ଓ ଆର.ଅଶ୍ୱୀନ ୨ଟି ଲେଖାଏଁ ଓ୍ଵିକେଟ ନେଇଥିଲେ । ଗତ ସପ୍ତାହରେ ଅନୁଷ୍ଠିତ ଟି-୨୦ ସିରିଜରେ ଭାରତ ବାଂଲାଦେଶକୁ ୨-୧ ରେ ପରାସ୍ତ କରିଥିଲା ।