ଓଡ଼ିଶା ୧୧୧; ଛତିଶଗଡ଼ ୨୪୭/୫
ସିକେ ନାୟୁଡୁ ଟ୍ରଫି
ବଲାଙ୍ଗୀର: ସ୍ଥାନୀୟ ଗାନ୍ଧୀ ଷ୍ଟାଡିୟମରେ ଚାଲିଥିବା ଓଡ଼ିଶା-ଛତିଶଗଡ଼ ସିକେ ନାୟୁଡୁ ଟ୍ରଫି କ୍ରିକେଟର ତୃତୀୟ ଦିବସ ଶେଷରେ ଭ୍ରମଣକାରୀ ଦଳ ଅଗ୍ରଣୀ ନେଇଯାଇଛି। ଘରୋଇ ଓଡ଼ିଶାର ପ୍ରଥମ ପାଳିକୁ ମାତ୍ର ୧୧୧ ରନ୍ରେ ସୀମିତ ରଖିଦେବା ପରେ ଛତିଶଗଡ଼ ମଙ୍ଗଳବାର ଷ୍ଟମ୍ପ୍ସ ପ୍ରତ୍ୟାହାର ବେଳକୁ ୫ ଓ୍ଵିକେଟ୍ ବିନିମୟରେ ୨୪୭ ରନ୍ କରିନେଇଛି। ଫଳରେ ହାତରେ ୫ ଓ୍ଵିକେଟ୍ ଥାଇ ଏହି ଦଳ ୧୩୬ ରନ୍ରେ ଆଗୁଆ ରହିଛି। ଋଷଭ ଚୌବେ ଓ ଅନୁପମ ଟପ୍ପୋ ଛତିଶଗଡ଼ ପାଳି ଆରମ୍ଭ କରିଥିଲେ। ପ୍ରଥମ ଓ୍ଵିକେଟ୍ରେ ୫୮ ରନ୍ ଯୋଡ଼ିବା ପରେ ଅନୁପମ (୩୭) ସର୍ବଶ୍ୱେର ମହାନ୍ତିଙ୍କ ଥ୍ରୋ’ରେ ରନ୍ ଆଉଟ୍ ହୋଇଯାଇଥିଲେ। ଏହାପରେ ସଂଜିତ ଦେଶାଇ (୧୬), ଋଷଭ (୪୪), ଅଜୟ ମଣ୍ଡଳ (୧୧) ଓ ମୟଙ୍କ ଓ୍ଵାଧେର (୩୧) ପାଭିଲିୟନ୍ ଫେରିଯାଇଥିଲେ। ୧୯୮ ରନ୍ରେ ୫ ଓ୍ଵିକେଟ୍ ହରାଇଥିବା ଛତିଶଗଡ଼ ପାଇଁ ସାହବନ୍ ଖାନ୍ (୬୯*) ଓ ସାକିବ୍ ଅହମ୍ମଦ (୩୬*) ଅବିଭାଜିତ ଷଷ୍ଠ ଓ୍ଵିକେଟ୍ରେ ୪୯ ରନ୍ ଯୋଡ଼ି ଦଳକୁ ଭଲ ସ୍ଥିତିରେ ପହଞ୍ଚାଇ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶା ପାଇଁ ସ୍ପିନର୍ ଶୁଭମ ନାୟକ ୨, ଦେବବ୍ରତ ପ୍ରଧାନ ଓ ଜାମାଲା ଭଂଜ ମହାପାତ୍ର ଗୋଟିଏ ଲେଖାଏଁ ଓ୍ଵିକେଟ ନେଇଛନ୍ତି। ବୁଧବାର ଶେଷ ଦିନ ପାଳି ଘୋଷଣା କରି ଓଡ଼ିଶା ଉପରେ ଚାପ ପକାଇବାକୁ ଛତିଶଗଡ଼ ଲକ୍ଷ୍ୟ ରଖିଛି। ଆଉ ମ୍ୟାଚ୍ ଅମୀମାଂସିତ ରହିଲେ ବି ପାଳି ଆଗୁଆ ଭିତ୍ତିରେ ଛତିଶଗଡ ୩ ପଏଣ୍ଟ ହାତେଇବା ନିଶ୍ଚିତ ହୋଇଯାଇଛି।
ଏହା ପୂର୍ବରୁ ସୋମବାରର ସ୍କୋର୍ ୪/୭୯ରୁ ମଙ୍ଗଳବାର ଖେଳିଥିବା ଓଡ଼ିଶା ଦଳ ଛତିଶଗଡ ବୋଲର୍ଙ୍କ ଆଗରେ ହାର ମାନିଥିଲେ। ସୋମବାର ୪୨ ଓଭର ଖେଳିଥିବା ଓଡ଼ିଶା ମଙ୍ଗଳବାର ଆଉ ୧୬ ଓଭର ଖେଳି ଦଳୀୟ ସ୍କୋର୍ରେ ୩୨ ରନ୍ ଯୋଡ଼ିଥିଲା ବେଳେ ଅବଶିଷ୍ଟ ୬ ଓ୍ଵିକେଟ୍ ହରାଇଥିଲା। ଛତିଶଗଡ ପାଇଁ ଅଜୟ ମଣ୍ଡଳ ୨୨ ଓଭରରେ ୨୬ ରନ୍ ଦେଇ ୬ ଓ୍ଵିକେଟ ଅକ୍ତିଆର କରିଥିଲେ।