ଡର୍ବାନ୍: ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟ୍ରେ ଶ୍ରୀଲଙ୍କା ପାଇଁ ବିଜୟ ସୁଯୋଗ ରହିଛି। ଭ୍ରମଣକାରୀ ଦଳ ସମ୍ମୁଖରେ ୩୦୪ ରନ୍ ବିଜୟ ଲକ୍ଷ୍ୟ ଧାର୍ଯ୍ୟ ହୋଇଛି। ତୃତୀୟ ଦିନ ଖେଳ ଆଲୋକ ଅଭାବରୁ ଆଗୁଆ ବନ୍ଦ ବେଳକୁ ଦିମୁଥ କରୁଣାରତ୍ନେଙ୍କ ଦଳ ୩ ୱିକେଟ୍ରେ ୮୩ ରନ୍ କରିଥିଲା। ବର୍ଷା ଓ ଆଲୋକ ଅଭାବରୁ ତୃତୀୟ ଦିନ ଖେଳ ସମ୍ପୂର୍ଣ୍ଣ ସମ୍ଭବ ହୋଇନଥିଲା। ପ୍ରାରମ୍ଭିକ ଯୋଡ଼ି ଥିରିମାନେ-କରୁଣାରତ୍ନେ ୪୨ ରନ୍ ଯୋଡ଼ିବା ପରେ ଲଗାତାର ବଲ୍ରେ ଆଉଟ୍ ହୋଇଯିବାରୁ ଦକ୍ଷିଣ ଆଫ୍ରିକା ମଧ୍ୟ ପ୍ରତ୍ୟାବର୍ତନ କରିଛି। ଶୁକ୍ରବାର ସକାଳେ ୧୨୬/୪ରୁ ଖେଳିଥିବା ଘରୋଇ ଦକ୍ଷିଣ ଆଫ୍ରିକା ଫାପ୍ ଡୁ ପ୍ଲେସିସ୍ (୯୦) ଏବଂ କ୍ବିଣ୍ଟନ୍ ଡି’କକ୍ (୫୫)ଙ୍କ ଅର୍ଧଶତକ ସତ୍ତ୍ବେ ୨୫୯ ରନ୍ କରିଥିଲା।
Sambad is now on WhatsApp
Join and get latest news updates delivered to you via WhatsApp
ସଂକ୍ଷିପ୍ତ ସ୍କୋର: ଦକ୍ଷିଣ ଆଫ୍ରିକା ପ୍ରଥମ ପାଳି-୨୩୫ (କ୍ବିଣ୍ଟନ୍ ଡି’କକ୍-୮୦, ବିଶ୍ବ ଫର୍ନାଣ୍ଡୋ-୪/୬୨, କାସୁନ ରଜିଥା-୩/୬୮)। ଶ୍ରୀଲଙ୍କା ପ୍ରଥମ ପାଳି-୧୯୧ (କୁଶାଲ ପେରେରା-୫୧, ଡେଲ୍ ଷ୍ଟେନ୍-୪/୪୮, ଭର୍ନାନ ଫିଲାଣ୍ଡର-୨/୩୨, କାଗିସୋ ରବାଦା-୨/୪୮)। ଦକ୍ଷିଣ ଆଫ୍ରିକା ଦ୍ବିତୀୟ ପାଳି- ୭୯.୧ ଓଭରରେ ୨୫୯ (ଫାଫ୍ ଡୁ’ପ୍ଲେସିସ୍-୯୦, କ୍ବିଣ୍ଟନ୍ ଡି’କକ୍-୫୫, ଡିନ୍ ଏଲଗର-୩୫, ଲସିତ ଏମ୍ବୁଲଦେନିଆ-୫/୬୬, ବିଶ୍ବ ଫର୍ନାଣ୍ଡୋ-୪/୭୧)। ଶ୍ରୀଲଙ୍କା ଦ୍ବିତୀୟ ପାଳି: ୨୮ ଓଭରରେ ୮୩/୩ (ଓସାଦା ଫର୍ନାଣ୍ଡୋ-୨୮*, କୁସାଲ ପେରେରା-୧୨*, ଓଲିଭର-୧/୩, ଫିଲାଣ୍ଡର-୧/୧୩, ରବାଦା-୧/୧୪)।