କଟକ: ସୁବ୍ରତ ଦାସ ପୁଣି ଥରେ ରାଜ୍ୟ ବିଲିୟାର୍ଡ୍ସ ବିଜେତା ହୋଇଛନ୍ତି। କଟକ କ୍ଲବ୍ରେ ଶୁକ୍ରବାର ଖେଳାଯାଇଥିବା ସଂଘର୍ଷପୂର୍ଣ୍ଣ ଫାଇନାଲରେ ସୁବ୍ରତ କନିଷ୍ଠ ବିଲିଆର୍ଡ୍ସ ଉପବିଜେତା କୁନାଲ ଅଗ୍ରଓ୍ଵାଲକୁ ୪-୩ରେ ପରାସ୍ତ କରିଥିଲେ। ପ୍ରଥମ ଦୁଇଟି ସେଟ୍ (୧୨୭-୧୫୧ ଓ ୧୩୭-୧୫୨) ହାରିଯିବା ସତ୍ତ୍ୱେ ସୁବ୍ରତ ଚମତ୍କାର ପ୍ରତ୍ୟାବର୍ତନ କରି ପରବର୍ତ୍ତୀ ଦୁଇଟି ସେଟ୍କୁ (୧୫୨-୪୮, ୧୫୦-୨୭) ଜିତି ନେଇଥିଲେ। ଏହାସତ୍ତ୍ୱେ କୁନାଲ ବି ସହଜରେ ବାଟ ଛାଡ଼ିନଥିଲେ। ସେ ପଞ୍ଚମ ସେଟ୍କୁ ୧୫୦-୯୬ରେ ଜିତି ପୁଣି ଥରେ ଆଗୁଆ ହୋଇଯାଇଥିଲେ। ଏହାପରେ ସୁବ୍ରତ ୧୫୦-୧୩୦ରେ ଷଷ୍ଠ ସେଟ୍ ଜିତି ପୁନର୍ବାର ସ୍ଥିତି ସମାନ କରିଦେବା ପରେ ନିର୍ଣ୍ଣାୟକ ସେଟ୍କୁ ୧୫୦-୧୩୯ରେ ଜିତି ଟ୍ରଫି ହାତେଇଥିଲେ। ଫଳରେ ସପ୍ତମ ଥର ପାଇଁ ସୁବ୍ରତ ବରିଷ୍ଠ ବିଲିଆର୍ଡ୍ସ ଟ୍ରଫି ହାତେଇବାରେ ସଫଳ ହୋଇଥିଲେ। ଶନିବାରଠୁ ୨୪ତମ ବରିଷ୍ଠ ସ୍ନକର ପ୍ରତିଯୋଗିତା ଆରମ୍ଭ ହେବ। ଏଥିରେ ୩୨ ପ୍ରତିଯୋଗୀ ଅଂଶଗ୍ରହଣ କରିବେ। ୨୨ ତାରିଖରେ ଫାଇନାଲ ମ୍ୟାଚ୍ ଖେଳାଯିବ।