ମେସିଙ୍କ ସମକକ୍ଷ ହେଲେ ଛେତ୍ରୀ
କେନିଆ ବିପକ୍ଷ ଅନ୍ତମହାଦେଶୀୟ କପ୍ ଫାଇନାଲରେ ଦୁଇଟି ଗୋଲ୍ ଦେବା ସହ ଭାରତୀୟ ଅଧିନାୟକ ସୁନୀଲ ଛେତ୍ରୀ ଅନ୍ତର୍ଜାତୀୟ ଗୋଲ୍ ସଂଖ୍ୟାରେ ଆର୍ଜେଣ୍ଟିନାର ମହାନ ଖେଳାଳି ଲିଓନେଲ୍ ମେସିଙ୍କ ସହ ସମକକ୍ଷ ହୋଇଛନ୍ତି। ଉଭୟ ମେସି ଓ ଛେତ୍ରୀ ଏବେ ୬୪ ଲେଖାଏଁ ଗୋଲ୍ ଦେଇ ଅନ୍ତର୍ଜାତୀୟ ଫୁଟ୍ବଲରେ ସର୍ବାଧିକ ସଂଖ୍ୟକ ଗୋଲ୍ ଦେବା ତାଲିକାରେ ଯୁଗ୍ମ ଦ୍ୱିତୀୟ ସ୍ଥାନରେ ରହିଛନ୍ତି। ଛେତ୍ରୀ ୧୦୧ ମ୍ୟାଚ୍ରୁ ୬୪ ଗୋଲ୍ ଦେଇଛନ୍ତି। ଅନ୍ୟ ପକ୍ଷରେ ମେସି ୧୨୪ ମ୍ୟାଚ୍ ଖେଳି ସେହି ୬୪ ଗୋଲ୍ ଅର୍ଜନ କରିଛନ୍ତି। ସେହି ଦୃଷ୍ଟିରୁ ଦେଖିଲେ ଛେତ୍ରୀ ତାଙ୍କ ଆଗରେ ରହିବେ। ଛେତ୍ରୀ ଅନ୍ତଃମହାଦେଶୀୟ କେନିଆ କପ୍ର ବିପକ୍ଷ ଲିଗ୍ ପର୍ଯ୍ୟାୟ ମ୍ୟାଚ୍ରେ ଦୁଇଟି ଗୋଲ୍ ଦେଇ ନିଜ ଗୋଲ୍ ସଂଖ୍ୟା ୬୨ରେ ପହଞ୍ଚାଇଥିଲେ। ଆଜି ଆଉ ଦୁଇଟି ଗୋଲ୍ ଦେଇ ମେସିଙ୍କ ସ୍ତରକୁ ଚାଲି ଯାଇଥିଲେ। ଏ କ୍ଷେତ୍ରରେ ସଂପ୍ରତି ପର୍ତୁଗାଲ ତାରକା କ୍ରିଷ୍ଟିଆନ ରୋନାଲଡୋ (୧୫୦ ମ୍ୟାଚ୍, ୮୧ ଗୋଲ୍) ପ୍ରଥମ ସ୍ଥାନରେ ରହିଛନ୍ତି।