ଆସନ୍ତା ଅଲିମ୍ପିକ୍ସରେ ଦେଖିବାକୁ ମିଳିବେ ନାହିଁ ଋଷିଆର ଖେଳାଳି, କାରଣ ଜାଣନ୍ତୁ
ମଣ୍ଟ୍ରିଲ (କାନାଡା) : ବିଶ୍ୱ ଡୋପିଂ ନିରୋଧୀ ସଂଗଠନ ଓ୍ଵାଡା ୪ ବର୍ଷ ପାଇଁ ଋଷିଆ ଉପରେ ନିଷେଧାଜ୍ଞା ଲଗାଇଛି । ଏହା ଫଳରେ ଆସନ୍ତା ୪ ବର୍ଷ ପର୍ଯ୍ୟନ୍ତ ଋଷିଆ କୌଣସି ଅନ୍ତର୍ଜାତୀୟ କ୍ରୀଡା ପ୍ରତିଯୋଗିତାରେ ଭାଗନେଇପାରିବ ନାହିଁ । ଏପରିକି ଅଲିମ୍ପିକ୍ସ, ବିଶ୍ୱ ଆଥଲେଟ, ବିଶ୍ୱକପ ଫୁଟବଲରେ ମଧ୍ୟ ଋଷିଆର ଜାତୀୟ ପତାକା ଦେଖିବାକୁ ମିଳିବ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଋଷିଆର ଆଣ୍ଟି ଡୋପିଂ ଏଜେନ୍ସି ଦ୍ୱାରା ପରୀକ୍ଷା ତଥ୍ୟକୁ ବଦଳାଯାଉଥିବା ଅଭିଯୋଗ ପ୍ରମାଣିତ ହେବା ପରେ ଓ୍ଵାଡା ଏହି ପଦକ୍ଷେପ ନେଇଛି । ଓ୍ଵାଡା କାର୍ଯ୍ୟନିର୍ବାହୀ କମିଟି ପକ୍ଷରୁ ସର୍ବସମ୍ମତି କ୍ରମେ ଏହି ନିଷ୍ପତ୍ତି ନିଆଯାଇଛି । ଆଜି ସ୍ୱିଜରଲାଣ୍ଡର ଲୁଇସାନଠାରେ ଅନୁଷ୍ଠିତ ଏକ ବୈଠକରେ ୧୨ ସଦସ୍ୟ ବିଶିଷ୍ଟ କାର୍ଯ୍ୟନିର୍ବାହୀ କମିଟି ଇଣ୍ଡିପେଣ୍ଡେନ୍ସ କମ୍ପ୍ଲିଆନ୍ସ ରିଭ୍ୟୁ କମିଟି ( ସିଆରସି)ର ସୁପାରିଶକୁ ଗ୍ରହଣ କରିଥିଲା ।
ଗତ ୨୦୧୫ରୁ ଋଷିଆର ଖେଳାଳିମାନେ ଡୋପିଂ (ବେଆଇନ ଶକ୍ତିବର୍ଦ୍ଧକ ଔଷଧ) ସେବନ ବିବାଦରେ ଫସିରହିଛନ୍ତି । ଏପରିକି ଋଷୀୟ ଖେଳାଳିମାନଙ୍କ ଉପରେ ନଜର ରଖିବା ଦାୟିତ୍ୱରେ ଥିବା ସଂସ୍ଥା ଖେଳାଳିମାନଙ୍କ ପରୀକ୍ଷା ରିପୋର୍ଟରେ ହସ୍ତକ୍ଷେପ କରୁଥିବା ନଜରକୁ ଆସିବା ପରେ ସ୍ଥିତିକୁ ଗୁରୁତ୍ୱର ସହ ନେଇଥିଲା ଓ୍ଵାଡା ।