ନୀଳଗିରି : ବାଲେଶ୍ବର ଜିଲ୍ଲା ନୀଳଗିରି ଉପଖଣ୍ଡସ୍ଥ କୁଲଡିହା ଅଭୟାରଣ୍ୟରେ ପୁଣି ପଶୁ ଶିକାର କରାଯାଇଛି। ଗତକାଲି ଶିକାର କରି ଫେରୁଥିବା ବେଳେ ବନ ବିଭାଗ ୫ ଜଣ ଶିକାରୀଙ୍କୁ ଗିରଫ କରିଛି। ଏମାନଙ୍କଠାରୁ ୧୦ କେଜି ମାଂସ, ଗୋଟିଏ ହରିଣ ମୁଣ୍ଡ, ଦୁଇଟି ଦେଶୀ ବନ୍ଧୁକ, ୪ଟି ଅଫୁଟା ଗୁଳି, ୨ଟି ଧନୁ ତୀର ସହ ମାରଣାସ୍ତ୍ର ଜବତ କରାଯାଇଛି। ତେବେ ଅନ୍ୟ ୩ ଜଣ ଅଭିଯୁକ୍ତ ଫେରାର ହୋଇଯାଇଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଗତକାଲି ରାତି ପ୍ରାୟ ୩ଟା ୨୦ ମିନିଟ୍ ସମୟରେ ଅଭୟାରଣ୍ୟର କୁଲଡିହା ବିଟ୍ ହାଉସ୍ ନିକଟ ସିନ୍ଦୁର ଗୌରାଠାରେ ୮ ଜଣ ଶିକାରୀ ୨୦ କେଜିରୁ ଊର୍ଦ୍ଧ୍ବ ଓଜନର ହରିଣ ଶିକାର କରିଥିଲେ। ଖବରପାଇ ବନକର୍ମଚାରୀଙ୍କ ସହ ସବୁଜ ବାହିନୀ ସିନ୍ଦୁର ଗୌରାଠାରେ ଚଢ଼ଉ କରିଥିଲେ। ଶିକାରୀ ତେଣ୍ଡା ଗ୍ରାମର ସାଇବ ସିଂ(୪୫), ବୁଦ୍ଧିରାମ ସିଂ(୨୮)ଙ୍କୁ ଘଟଣାସ୍ଥଳରୁ ଗିରଫ କରିବା ସହ ମାଂସ ଓ ମାରଣାସ୍ତ୍ର ଜବତ କରିଥିଲେ। ଅନ୍ୟ ଶିକାରୀମାନେ ଘଟଣାସ୍ଥଳରୁ ପଳାଇ ଯାଇଥିଲେ। ବିଭାଗକୁ ଏନେଇ ଅବଗତ କଲାପରେ ବିଭାଗୀୟ କର୍ମଚାରୀମାନେ ସିଆଡ଼ିମାଳ ପଞ୍ଚାୟତର ଭୁଟା ସିମୁଳି ଗ୍ରାମର ହାଡ଼ୁ ସିଂ(୪୫)ଙ୍କଠାରୁ ୧ ଦେଶୀ ବନ୍ଧୁକ ଓ ବଡ଼ନାଳ ଗ୍ରାମର ଟେମ୍ପ ସିଂ(୩୩)ଙ୍କଠାରୁ ଧନୁତୀର ଜବତ କରି ସେମାନଙ୍କୁ ଗିରଫ କରିଥିଲେ।
ଅପରପକ୍ଷରେ ବାଲିଆନାଳ ବିଟ୍ ହାଉସ ନିକଟସ୍ଥ ଶୀତଳବାଙ୍କ ପୋଖରୀ ନିକଟରୁ କେସିପୁର ପଞ୍ଚାୟତ ବୁଦ୍ଧୁସାହି ଗ୍ରାମର ସତ୍ୟବାନ ସିଂଙ୍କ ପୁଅ ରୂଗା(୫୩)ଙ୍କଠାରୁ ଧନୁତୀର, ୨ ଗୁଳି ଜବତ କରି ଗିରଫ କରିଥିଲେ। ଏନେଇ ବିଭାଗ ପକ୍ଷରୁ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି।