ତାଳଚେର: ଆଜି ସକାଳେ ଅନୁଗୁଳ ଜିଲ୍ଲାର ତାଳଚେର ନିକଟବର୍ତ୍ତୀ ଗୁରୁଜାଙ୍ଗୁଲି ଛକ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏଥିରେ ଜଣେ ବିବାହିତା ଯୁବତୀ ପ୍ରାଣ ହରାଇଥିବା ଜଣାଯାଇଛି। ମୃତ ବିବାହିତା ଯୁବତୀଙ୍କ ନାଆଁ ପ୍ରୀତିମୟୀ ବେହେରା(୩୦) ବୋଲି ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନାନୁସାରେ, ଆଜି ସକାଳେ ଜଣେ ସଂପର୍କୀୟଙ୍କ ସ୍କୁଟିରେ ବସି ପ୍ରୀତିମୟୀ ବେହେରା ତାଳଚେର ରୋଡ୍ ଷ୍ଟେସନ ଅଭିମୁଖେ ଯାଉଥିଲେ । ସେହି ସମୟରେ ଏକ ଅଜଣା ଗାଡି ସ୍କୁଟିକୁ ଧକ୍କା ଦେଇଥିଲା । ଫଳରେ ଦୁହେଁ ରାସ୍ତା ଉପରେ ଛିଟିକି ପଡିଥିଲେ । ଏଥିରେ ପ୍ରୀତିମୟୀ ମୁଣ୍ଡରେ ଶକ୍ତ ଆଘାତ ଲାଗିଥିଲା । ଘଟଣାସ୍ଥଳରେ ସେ ମୃତ୍ୟୁବରଣ କରିଥିଲେ । ଏତତ୍ ବ୍ୟତୀତ ବ୍ୟକ୍ତିଜଣଙ୍କ ମଧ୍ୟ ଗୁରୁତର ଆହତ ହୋଇଛନ୍ତି ।
ପ୍ରୀତିମୟୀ ଗତକାଲି ସରାଙ୍ଗ ଇଞ୍ଜିନିଅରିଂ କଲେଜକୁ ସାର୍ଟିଫିକେଟ୍ ନେବାଲାଗି ଆସିଥିଲେ । ସେ ଗତକାଲି ନିଜର ଜଣେ ସଂପର୍କୀୟଙ୍କ ଘରେ ରହିଥିଲେ। ସେ ଭୁବନେଶ୍ବରରେ ରହନ୍ତି ବୋଲି ଜଣାଯାଇଛି। ଏହି ଦୁର୍ଘଟଣାପରେ ସ୍ଥାନୀୟ ଲୋକେ ଅଭିଯୁକ୍ତକୁ ଗିରଫ ଏବଂ ମୃତକଙ୍କ ପରିବାରକୁ କ୍ଷତିପୂରଣ ଦାବି କରି ରାସ୍ତାରୋକ କରିଥିବା ଜଣାଯାଇଛି।