ସୁନା ପାହାଡ଼ ଉପରେ ଆନ୍ଧ୍ରର ଆଖି
କୋରାପୁଟ : ଓଡ଼ିଶା ଭିତରେ ଧସେଇ ପଶି କୋଟିଆକୁ ଅକ୍ତିଆର କରିବାକୁ ଷଡ୍ଯନ୍ତ୍ର କରିଛି ଆନ୍ଧ୍ର। ବିଭିନ୍ନ ବାଗରେ ଲୋକଙ୍କୁ ପ୍ରଲୋଭିତ କରି ଆନ୍ଧ୍ରରେ ମିଶାଇବାକୁ ବି ଚାଲିଛି ଜୋରଦାର ଉଦ୍ୟମ। ଟଙ୍କା ଓ କମ୍ବଳ ବାଣ୍ଟିବା ସହ ଜନଶୁଣାଣି କରି ବିବାଦୀୟ କୋଟିଆରେ ନିଜ କର୍ତ୍ତୃତ୍ୱ ଜାହିର କରିଛି। ଆନ୍ଧ୍ରର ଏମିତି ଦାଦାଗିରି ଯେତିକି ମାରାତ୍ମକ ଏହା ପଛରେ ଥିବା କାରଣ ସେତିକି ସାଂଘାତିକ। କୋଟିଆ ପଞ୍ଚାୟତ ଖଣିଜ ସଂପଦରେ ଭରପୂର ଥିବାରୁ ଏହା ଉପରେ ଆନ୍ଧ୍ର ଲୋଲୁପ ଦୃଷ୍ଟି ପକାଇଛି। ବିଶେଷକରି ସେମ୍ଭି ଗାଁ ନିକଟରେ ଥିବା ସୁନା ପାହାଡ଼ ଦଖଲ କରିବାକୁ ଆନ୍ଧ୍ର ଏହି ଖେଳ ଆରମ୍ଭ କରି ଦେଇଛି।
Sambad is now on WhatsApp
Join and get latest news updates delivered to you via WhatsApp
ଦେଓମାଳି ପର୍ବତ ନିକଟରେ ଥିବା ଏହି ଗ୍ରାମଗୁଡିକରେ ଅନେକ ପାହାଡ଼ ପର୍ବତ ହୋଇ ରହିଛି। ଆଉ ସବୁ ପାହାଡରେ ରହିଛି ପ୍ରଚୁର ଖଣିଜ ସଂପଦ। କେନ୍ଦ୍ର ସରକାରଙ୍କ ପକ୍ଷରୁ ହୋଇଥିବା ସର୍ଭେ ଅନୁସାରେ ଏହି ପାହାଡ଼ଗୁଡ଼ିକରେ ସୀସା, ଲୁହା ପଥର, ବକ୍ସାଇଟ ଓ ଅଭ୍ର ରହିଛି। ଏସବୁର ମୂଲ୍ୟ ହଜାର ହଜାର କୋଟି ଟଙ୍କା ହେବ। ଏପଟେ ସେମ୍ଭି ନିକଟରୁ କୋଟିଆ ଦେଇ ତଳ ଗଂଜେଇପଦର ପର୍ଯ୍ୟନ୍ତ ଲମ୍ବିଛି ସୁନା ପାହାଡ଼। ଲୋକଙ୍କ କହିବାନୁଯାୟୀ, ଏହି ପାହାଡ଼ରେ ସୁନା ଖଣି ରହିଛି। ଏବେ ବି ଖରା ପଡିଲେ ଏହି ପାହାଡ଼ ଚକ୍ଚକ ଦିଶେ। ଏହି ପାହାଡ଼କୁ ନିଜ ଅକ୍ତିଆରକୁ ନେବା ପାଇଁ ଯେନତେନ ଉପାୟରେ ଚେଷ୍ଟା କରୁଛି ଆନ୍ଧ୍ର।
ପୂର୍ବତନ ସାଂସଦ ତଥା କୋଟିଆ ପଞ୍ଚାୟତର ବାସିନ୍ଦା ଜୟରାମ ପାଙ୍ଗୀ ଏ ନେଇ କହନ୍ତି, ଓଡ଼ିଶା ସରକାର ଚୁପ୍ ବସିଥିବାରୁ ଏହି ଖଣିଜଭରା ଅଞ୍ଚଳକୁ ନିଜ ଦଖଲକୁ ନେବା ପାଇଁ ଆନ୍ଧ୍ରର ଅଧିକାରୀମାନେ ଲୋକଙ୍କୁ ପ୍ରଲୋଭିତ କରିବାକୁ ଚେଷ୍ଟା କରୁଛନ୍ତି। କୋଟିଆ ପଞ୍ଚାୟତର ପଞ୍ଚାୟତ ସମ୍ପ୍ରସାରଣ ଅଧିକାରୀ ତିଳକ ଖେମୁଣ୍ଡୁଙ୍କ କହିବାନୁଯାୟୀ, ଏହି ଅଂଚଳରେ ଆନ୍ଧ୍ର ପକ୍ଷରୁ କୌଣସି ଭିତ୍ତିଭୂମି ନିର୍ମାଣ କରାଯାଇନି। ଲୋକଙ୍କୁ ସୁବିଧା ଦେବା ପାଇଁ କୌଣସି ଖାସ୍ ଯୋଜନା କରାଯାଇନି। କେବଳ ମଝିରେ ମଝିରେ ସେମାନେ ଆସି କିଛି ସାମଗ୍ରୀ ଓ ଟଙ୍କା ବାଣ୍ଟି ଚାଲି ଯାଉଛନ୍ତି। ଲୋକଙ୍କୁ ପ୍ରଲୋଭିତ କରି ଏହି ଅଂଚଳରେ ଥିବା ମୂଲ୍ୟବାନ ସାମଗ୍ରୀକୁ ଲୁଟିବାକୁ ଚାଲ ଚଳାଇଛନ୍ତି।