କେନ୍ଦୁଝର: ମାସେ କି ବର୍ଷେ ନୁହେଁ ଦୀର୍ଘ ୪୦ ବର୍ଷ ହେବ ରାସ୍ତା ଉପରେ ଚାଲିଛି ଅଙ୍ଗନୱାଡି କେନ୍ଦ୍ର । ହେଲେ ଏଥିପ୍ରତି କାହାର କାହାର ନଜର ନାହିଁ । ସବୁଠାରୁ ବିଡମ୍ବନାର ବିଷୟ ହେଲା ଏମିତି ଖବର ଆସିଛି କେନ୍ଦୁଝର ଶୁଆକାଟୀସ୍ଥିତ ଗନ୍ଧମାର୍ଦ୍ଦନ ଓଏମସି ଖଣି ସଂଲଗ୍ନ ଅଂଚଳରୁ । ଖଣି ପାଇଁ ସର୍ବାଧିକ କ୍ଷତିଗ୍ରସ୍ତ ଗ୍ରାମ ତାଲିକାରେ ରହିଛି ଏହି ଅଂଚଳ । ହେଲେ ଏଠି ବିକାଶ ଅପହଂଚ । ଖଣି ପ୍ରଭାବିତ ଅଂଚଳର ସର୍ବାଙ୍ଗୀନ ବିକାଶ ପାଇଁ ଅର୍ଥର ଅଭାବ ନ ଥିବା ବେଳେ ପ୍ରଶାସନିକ ଉଦାସୀନତା ବେଶ ବାରି ହୋଇପଡୁଛି ।
Sambad is now on WhatsApp
Join and get latest news updates delivered to you via WhatsApp
କୁନି କୁନି ପିଲା ରାସ୍ତା ଉପରେ ବସି ପାଠ ପଢୁଛନ୍ତି, ସେହି ରାସ୍ତା କଡରେ ବସି ଅଙ୍ଗନବାଡି କେନ୍ଦ୍ରରେ ଦିଆଯାଉଥିବା ଖାଦ୍ୟ ବି ଖାଉଛନ୍ତି । ୧୯୮୧ ମସିହାରୁ ଏମିତି ଚାଲିଛି କେନ୍ଦୁଝର ବାଂଶପାଳ ବ୍ଲକ ଶୁଆକାଟୀ ଗନ୍ଧମାର୍ଦ୍ଦନ ଖଣି ସଂଲଗ୍ନ ଉରୁମୁଣ୍ଡା ଅଙ୍ଗନୱାଡି କେନ୍ଦ୍ର । ନିଜସ୍ୱ ଘରଟିଏ ନଥିବାରୁ କେନ୍ଦ୍ର ଖୋଲିବା ଦିନରୁ ପିଲାମାନେ ରାସ୍ତା ଉପରେ ବସି ପାଠ ପଢୁଥିବା ବେଳେ କେନ୍ଦ୍ରର ପାଚିକା ନିଜ ଘରେ ରୋଷେଇ କରି ଆଣନ୍ତି ମଧ୍ୟାହ୍ନ ଭୋଜନ । ଆଉ ରାସ୍ତା ଉପରେ ବସି ଖାଆନ୍ତି ଛାତ୍ରଛାତ୍ରୀ । ଉରୁମୁଣ୍ଡା ଅଙ୍ଗନୱାଡି କେନ୍ଦ୍ର ପାଇଁ ଘର ଟିଏ କରି ଦେବାକୁ ଜିଲ୍ଲାପାଳ ଓ ଓଏମସି ଖଣି ଅଧିକାରୀଙ୍କୁ ଅନୁରୋଧ କରାଯାଇଛି, ହେଲେ କେହି ଶୁଣୁନଥିବା କହିଛନ୍ତି ଅଙ୍ଗନବାଡି କର୍ମୀ ଓ ସ୍ଥାନୀୟ ବାସିନ୍ଦା ।
ଖଣି ପ୍ରଭାବିତ ଅଂଚଳର ବିକାଶ ପାଇଁ ବହୁ ପୁର୍ବରୁ ସିଏସଆର ଅର୍ଥ ସହ ଏବେ ଡିଏମ୍ଏଫ ପାଣ୍ଠି ରହିଛି । ଆଉ ଏହି ପାଣ୍ଠିରେ ଲକ୍ଷ ଲକ୍ଷ ଟଙ୍କା ବି ରହିଛି । କିନ୍ତୁ ଖଣି ସଂଲଗ୍ନ ଗାଁ ବିକଳ ଚିତ୍ର ଦେଖିଲେ ଯେକେହି ବି ପ୍ରଶାସନ ଉପରେ ଅଙ୍ଗୁଳି ନିର୍ଦ୍ଦେଶ କରିବ । ସେପଟେ ଜିଲ୍ଲା ସମାଜ କଲ୍ୟାଣ ଅଧିକାରୀ କହିଛନ୍ତି ଯେ, ୪୦ବର୍ଷର ଏହି ସମସ୍ୟା ବାବଦରେ ସରକାର ଅବଗତ ଅଛନ୍ତି । ଯଥାଶୀଘ୍ର ପଦକ୍ଷେପ ନେଇ ନିଜସ୍ୱ ଘର ନିର୍ମାଣ କରାଯିବ ବୋଲ କହିଛନ୍ତି ଜିଲ୍ଲା ସମାଜ କଲ୍ୟାଣ ଅଧିକାରୀ ।