ଆଜିଠୁ ସିବିଏସ୍ଇ ଦଶମ ପରୀକ୍ଷା, ଓଡ଼ିଶା ବନ୍ଦକୁ ନେଇ ପରୀକ୍ଷାର୍ଥୀ ଚିନ୍ତିତ
ଭୁବନେଶ୍ବର : ସେଣ୍ଟ୍ରାଲ ବୋର୍ଡ ଅଫ୍ ସେକେଣ୍ଡାରି ଏଜୁକେସନ(ସିବିଏସ୍ଇ) ଦ୍ବାରା ପରିଚାଳିତ ବିଦ୍ୟାଳୟଗୁଡ଼ିକର ଦଶମ ଶ୍ରେଣୀ ପରୀକ୍ଷା ଗୁରୁବାରଠାରୁ ଆରମ୍ଭ ହେବାକୁ ଯାଉଛି। ପରୀକ୍ଷାର ପ୍ରଥମ ଦିନ ଇ-ପବ୍ଲିସିଂ ଆଣ୍ଡ ଇ-ଅଫିସ୍ ବିଷୟର ପରୀକ୍ଷା ଅନୁଷ୍ଠିତ ହେବ। ପୂର୍ବାହ୍ନ ୧୦ଟା ୩୦ରୁ ମଧ୍ୟାହ୍ନ ୧୨ଟା ୩୦ ପର୍ଯ୍ୟନ୍ତ ପରୀକ୍ଷା ଚାଲିବ। ବିଧିବଦ୍ଧ ଭାବେ ସାରା ଦେଶରେ ଦଶମ ଶ୍ରେଣୀ ପରୀକ୍ଷା ଗୁରୁବାରଠାରୁ ଆରମ୍ଭ ହେଉଥିଲେ ମଧ୍ୟ ମାର୍ଚ୍ଚ ୨ରୁ ପ୍ରମୁଖ ବିଷୟଗୁଡ଼ିକର ପରୀକ୍ଷା ଅନୁଷ୍ଠିତ ହେବ। ୨ ତାରିଖରେ ଆଇଟି ବିଷୟର ପରୀକ୍ଷା ରହିଛି। ଏହି ପରୀକ୍ଷା ମାର୍ଚ୍ଚ ୨୯ ତାରିଖ ପର୍ଯ୍ୟନ୍ତ ଚାଲୁ ରହିବ। ପୂର୍ବାହ୍ନ ୧୦ଟା ୩୦ରୁ ପରୀକ୍ଷା ହେବାକୁ ଥିବାବେଳେ ୧୦ଟାରୁ ୧୦ଟା ୧୫ ଭିତରେ ପରୀକ୍ଷାର୍ଥୀଙ୍କୁ ଉତ୍ତର ଖାତା ପ୍ରଦାନ କରାଯିବ। ୧୦ଟା ୧୫ରେ ପ୍ରଶ୍ନପତ୍ର ଦିଆଯିବ। ଏହାପରେ ୧୫ ମିନିଟ୍ ଧରି ପରୀକ୍ଷାର୍ଥୀମାନେ ପ୍ରଶ୍ନପତ୍ର ପଢ଼ିବେ। ଠିକ୍ ୧୦ଟା ୩୦ରେ ଉତ୍ତର ଲେଖିବା ଆରମ୍ଭ କରିବେ।
Sambad is now on WhatsApp
Join and get latest news updates delivered to you via WhatsApp
ସିବିଏସ୍ଇର ଭୁବନେଶ୍ବରସ୍ଥିତ ଆଞ୍ଚଳିକ ଜୋନ୍ ପକ୍ଷରୁ ସୂଚନା ଦିଆଯାଇଛି ଯେ ୨୧ ତାରିଖରୁ ପରୀକ୍ଷା ଆରମ୍ଭ ହେଉଥିଲେ ମଧ୍ୟ ଓଡ଼ିଶାରେ ବହୁ କମ୍ ପିଲା ଏହି ଅପ୍ସନାଲ୍ ବିଷୟର ପରୀକ୍ଷା ଦେଉଛନ୍ତି। ମାର୍ଚ୍ଚ ୨ରୁ ପ୍ରମୁଖ ବିଷୟ ପରୀକ୍ଷା ଆରମ୍ଭ ହେବ। ଏଥର ଜୋନ୍ରେ ୫୫ ହଜାରରୁ ଅଧିକ ପରୀକ୍ଷାର୍ଥୀ ଦଶମ ପରୀକ୍ଷା ଦେବାକୁ ନାମ ପଞ୍ଜୀକରଣ କରିଛନ୍ତି। ଓଡ଼ିଶାର ୧୮ ହଜାରରୁ ଅଧିକ ଛାତ୍ରଛାତ୍ରୀ ରହିଛନ୍ତି।
ଅନ୍ୟପକ୍ଷରେ ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଗୁରୁବାର ଓଡ଼ିଶା ବନ୍ଦ ଡାକରା ଦିଆଯାଇଥିବାରୁ ସିବିଏସ୍ଇ ପରୀକ୍ଷା ଉପରେ ତାହାର ପ୍ରଭାବ ପଡ଼ିବାର ଆଶଙ୍କା ସୃଷ୍ଟି ହୋଇଛି। ଛାତ୍ରଛାତ୍ରୀ, ସ୍କୁଲ ବସ୍କୁ ଆନ୍ଦୋଳନରୁ ବାଦ ଦିଆଯିବାକୁ ନବ ନିର୍ମାଣ କୃଷକ ସଙ୍ଗଠନ ଘୋଷଣା କରିଥିଲେ ମଧ୍ୟ ବନ୍ଦକୁ ନେଇ ଛାତ୍ରଛାତ୍ରୀ ଦ୍ବନ୍ଦ୍ବରେ ଅଛନ୍ତି।