ଭୁବନେଶ୍ୱର: ଆଜି ଦାରିଙ୍ଗିବାଡ଼ିରେ ସର୍ବନିମ୍ନ ତାପମାତ୍ରା ୧୪° ସେଲ୍ସିୟସ ରେକର୍ଡ ହୋଇଛି। ଏହା ସହିତ ରାଜ୍ୟର ଆଉ ୧୧ଟି ସ୍ଥାନର ସର୍ବନିମ୍ନ ତାପମାତ୍ରା ଖସିଛି ୨୦° ତଳକୁ। ଗତକାଲିଠାରୁ ଉତ୍ତର ଦିଗରୁ ଓଡ଼ିଶାକୁ ବହୁଥିବା ଥଣ୍ଡା ପବନ ପ୍ରକୋପରେ ଏଭଳି ଥଣ୍ଡା ଅନୁଭୂତ ହେଉଛି। କେବଳ ସର୍ବନିମ୍ନ ନୁହେଁ, ସର୍ବୋଚ୍ଚ ତାପମାତ୍ରା ଅର୍ଥାତ ଦିନବେଳାର ତାପମାନ ବି କମିବ। ଦିନେ ଦୁଇଦିନ ଭିତରେ ଏହା ଆହୁରି ୨° କମିବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁଯାୟୀ ଉତ୍ତର ପଶ୍ଚିମ, ଉତ୍ତର ପୂର୍ବ ଏବଂ ଉତ୍ତର ଦିଗରୁ ଥଣ୍ଡା ପବନ ବହିବା ଆରମ୍ଭ ହୋଇଛି। ଦୁଇଦିନ ତଳେ ପବନର ବେଗ ଘଣ୍ଟାକୁ ମାତ୍ର ୪/୫ କି.ମି. ଥିଲା। କିନ୍ତୁ ଆଜି ଏହା ୮/୧୦ କି.ମି.କୁ ବୃଦ୍ଧି ପାଇଛି। ତଦନୁଯାୟୀ ଥଣ୍ଡାର ପରିମାଣ ବି ବଢ଼ିଛି। ଦକ୍ଷିଣ ପଶ୍ଚିମ ଦିଗରୁ ସାମୁଦ୍ରିକ ବାୟୁର ଗତ ସେତେଟା ଅଧିକ ନାହିଁ। ଏହା ଓଡ଼ିଶା ଭିତରକୁ ଥଣ୍ଡା ପବନ ପଶିବାରେ ସହାୟକ ହେଉଛି। ପାଣିପାଗ କେନ୍ଦ୍ରର ସୂଚନା ମୁତାବକ ଗତ ୩/୪ ଦିନ ହେଲା ଟ୍ରଫ୍ ଲାଇନ ଥିଲେ ବି ତା’ର ପ୍ରଭାବ ଅନୁଭୂତ ହେଉନାହିଁ। ଏଣୁ ରାଜ୍ୟର ଅଧିକାଂଶ ସ୍ଥାନ ଶୁଖିଲା। ଏଣୁ ଆଗାମୀ ଦିନେ ଦୁଇଦିନ ମଧ୍ୟରେ ଥଣ୍ଡା ଆହୁରି ବଢ଼ିବ ଏବଂ ୧ ତାରିଖ ବେଳକୁ ସର୍ବନିମ୍ନ ତାପମାତ୍ରା ଆହୁରି ୨° କମିପାରେ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର।
ଆଜି ଦାରିଙ୍ଗିବାଡ଼ିକୁ ଛାଡ଼ିଦେଲେ, ଫୁଲବାଣୀରେ ସର୍ବନିମ୍ନ ତାପମାତ୍ରା ୧୪.୪° ରେକର୍ଡ ହୋଇଛି। ସେହିପରି ହୀରାକୁଦରେ ୧୪.୬°, କୋରାପୁଟରେ ୧୫.୪°, ଭବାନୀପାଟଣାରେ ୧୬°, ଝାରସୁଗୁଡ଼ାରେ ୧୬.୪°, କେନ୍ଦୁଝରରେ ୧୬.୫°, ସମ୍ବଲପୁରରେ ୧୭.୫°, ସୁନ୍ଦରଗଡ଼ରେ ୧୮°, ଅନୁଗୁଳ ଏବଂ ଟିଟିଲାଗଡ଼ରେ ୧୯°, ବଲାଙ୍ଗୀରରେ ୧୯.୫° ରହିଛି। ସର୍ବୋଚ୍ଚ ତାପମାତ୍ରା ୨୯°ରୁ ସର୍ବାଧିକ ୩୪.୫° ରହିଛି।