କନ୍ଧମାଳକୁ ବାହାର ଫେରନ୍ତାଙ୍କ ପାଇଁ ପ୍ରଶାସନର ଚିନ୍ତା ବଢୁଛି : ୪ହଜାର ୭୭୭ ଜଣ ଆସିଲେଣି, ଆହୁରି ଆସୁଛନ୍ତି; ଖୋଲିଲା ୭ ଅସ୍ଥାୟୀ ଚିକିତ୍ସାଳୟ ଓ ୭ ଆସୋଲେସନ କେନ୍ଦ୍ର
ଫୁଲବାଣୀ : ରାଜ୍ୟ ବାହାରେ ଓ ବାହାର ଦେଶରେ ରହୁଥିବା କନ୍ଧମାଳର ଲୋକମାନେ ନିଜ ନିଜ ଘରକୁ ଆସୁଛନ୍ତି। ଆଜି ସୁଦ୍ଧା ସମୁଦାୟ ୪ହଜାର ୭୭୭ ଜଣ ଆସିଲେଣି। ସେଥି ମଧ୍ୟରୁ ୪ହଜାର ୭୭୪ ଜଣ ବିଭିନ୍ନ ରାଜ୍ୟରୁ ଆସିଥିବା ବେଳେ ବିଦେଶରୁ ୩ ଜଣ ଆସିଛନ୍ତି। ଫେରନ୍ତାଙ୍କ ସଂଖ୍ୟା ବଢି ଚାଲିଥିବାରୁ ଏହାକୁ ନେଇ ଜିଲ୍ଲା ପ୍ରଶାସନର ଚିନ୍ତା ବଢି ଯାଇଛି। ଫେରନ୍ତା ୪ହଜାର ୭୭୭ ମଧ୍ୟରୁ ୪ ଜଣ ଜିଲ୍ଲା ମୁଖ୍ୟ ଚିକିତ୍ସାଳୟରେ ଥିବା ବେଳେ ବାକି ସମସ୍ତେ ହୋମ କ୍ବାରେଣ୍ଟାଇନରେ ଅଛନ୍ତି। କରୋନାକୁ ପ୍ରତିହତ କରିବା ନିମନ୍ତେ କେନ୍ଦ୍ର ଓ ରାଜ୍ୟ ସରକାରଙ୍କ ନିର୍ଦ୍ଦେଶମତେ ଜିଲ୍ଲା ପ୍ରଶାସନ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଓ ପଦକ୍ଷେପ ଜାରି ରହିଛି। ଏହି ପରିପ୍ରେକ୍ଷୀରେ ଜିଲ୍ଲାରେ ୭ଟି ଅସ୍ଥାୟୀ ଚିକିତ୍ସାଳୟ ଓ ୭ଟି ଆସୋଲେସନ କେନ୍ଦ୍ର ଖୋଲା ଯାଇଛି।
Sambad is now on WhatsApp
Join and get latest news updates delivered to you via WhatsApp
ଫୁଲବାଣୀ ଅନ୍ବେଷା ହଷ୍ଟେଲ, ଶଙ୍କରଖୋଲ ସରକାରୀ ବାଳିକା ହାଇସ୍କୁଲ, କୋଟଗଡ ସରକାରୀ ହାଇସ୍କୁଲ, ଦାରିଙ୍ଗବାଡି ଉଚ୍ଚମାଧ୍ୟମିକ ସ୍କୁଲ ଓ ସରକାରୀ ହାଇସ୍କୁଲ, ରାଇକିଆ ସରକାରୀ ବାଳିକା ହାଇସ୍କୁଲ ଓ ବଡଗାଁ ସରକାରୀ ବାଳିକା ହାଇସ୍କୁଲକୁ ଅସ୍ଥାୟୀ ଚିକିତ୍ସାଳୟ କରାଯାଇଛି। ସେହିଭଳି ଫୁଲବାଣୀ ବିଜୁ ସ୍ମୃତି କଲ୍ୟାଣ ମଣ୍ଡପ, ବସଷ୍ଟାଣ୍ଡ ଓ ପିଅନପଡା ପ୍ରାଥମିକ ସ୍କୁଲ, ବାଲିଗୁଡା ଟାଉନ ହଲ ଓ କଲ୍ୟାଣ ମଣ୍ଡପ ଏବଂ ଜି.ଉଦୟଗିରି ଟାଉନ ହଲ ଓ କଲ୍ୟାଣ ମଣ୍ଡପକୁ ଆସୋଲେସନର କେନ୍ଦ୍ର କରାଯାଇଛି। ଏହି ସବୁ କେନ୍ଦ୍ରରେ ଜଣେ ବି କରୋନା ଆକାନ୍ତ ନଥିବା ଜଣା ପଡିଛି। ଗରୀବ ଓ ଅସହାୟଙ୍କୁ ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ଏଥି ସହ ସହରାଞ୍ଚଳରେ ଯେ କେହି ଫୋନ କଲେ ଘରେ ରନ୍ଧା ଖାଦ୍ୟ ପହଞ୍ଚାଇବାର ବ୍ୟବସ୍ଥା କରାଯାଉଛି। ଅତ୍ୟାବଶ୍ୟକ ସାମଗ୍ରୀ ବିକ୍ରିବଟା ନିମନ୍ତେ ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଥିବା ବେଳେ ଆଳୁ ଓ ପିଆଜ ହୋମ ଡେଲିଭରି ପାଇଁ ୨ଟି ସ୍ବୟଂସହାୟକ ଗୋଷ୍ଠୀକୁ ଦାୟିତ୍ବ ଦିଆଯାଇଥିବା ପ୍ରଶାସନ ପକ୍ଷରୁ ଏକ ପ୍ରେସ ଇସ୍ତାହାରରେ ଜଣା ଯାଇଛି।