ପୁଲିସ୍‌କୁ ଚକ୍‌ମା ଦେଲା ନାବାଳକ, ଏକ୍‌ଜଷ୍ଟ ଫ୍ୟାନ୍‌ ଭାଙ୍ଗି ଥାନାରୁ ଚମ୍ପଟ

0

କାମାକ୍ଷାନଗର : ବୁଧବାର ବିଳମ୍ବିତ ରାତ୍ରିରେ ଚୋରି ଘଟଣାରେ ସଂପୃକ୍ତ ଜଣେ ନାବାଳକ ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ଭିତରୁ ଚମ୍ପଟ ମାରିଛି। ତିନିଜଣ ପୁଲିସ କର୍ମଚାରୀ ଜଗିଥିବା ସତ୍ତ୍ବେ ସେ ଖସିଯିବାରେ ସଫଳ ହୋଇଛି। ଏହି ଘଟଣା ଅଞ୍ଚଳରେ ଚର୍ଚାର ବିଷୟ ହୋଇଥିବାବେଳେ ନିଜ ଦାୟିତ୍ବ ପ୍ରତି ପୁଲିସ କେତେ ସଚେତନ ତାହା ଜଣାପଡ଼ିଛି।

ପୁଲିସ ସୂତ୍ରରୁ ପ୍ରକାଶ, କାମାକ୍ଷାନଗର ଏନ୍‌ଏସି ମୁଣ୍ଡିଦେଉଳି ଅଞ୍ଚଳର ଅର୍ଜୁନ ଖୁଣ୍ଟିଆଙ୍କ ଘରୁ ଗତ ୨ ତାରିଖ ରାତିରେ କିଛି ସୁନା ଅଳଙ୍କାର ଓ ପୂଜା ସାମଗ୍ରୀ ଚୋରି ହୋଇଥିଲା। ତାଙ୍କ ଅଭିଯୋଗ କ୍ରମେ ପୁଲିସ କେସ୍‌ ନମ୍ବର ୭୩/୨୦୧୯ ଦଫା ୪୫୭, ୩୮୦ରେ ଏକ ମାମଲା ରୁଜୁ କରିଥିଲା। କାମାକ୍ଷାନଗର ଏନ୍‌ଏସି ଅଞ୍ଚଳର ଜଣେ ୧୬ ବର୍ଷ ବୟସ୍କ ନାବାଳକ ଏହି ଚୋରିରେ ସଂପୃକ୍ତ ଥିବା ପୁଲିସ ସଂଦେହ କରିଥିଲା। ଗତକାଲି ସଂଧ୍ୟାରେ ଉକ୍ତ ନାବାଳକକୁ ଥାନାକୁ ଆଣି ପୁଲିସ ପଚରାଉଚରା କରିବା ସହ ତାହାଠାରୁ ପୂଜା ସାମଗ୍ରୀ ଉଦ୍ଧାର କରିଛି। ଅଧିକ ତଦନ୍ତ ପାଇଁ ଥାନା ଭିତରେ ଥିବା ମହିଳା, ଶିଶୁ ଅଭିଯୁକ୍ତଙ୍କ ପାଇଁ ଉଦ୍ଦିଷ୍ଟ ପ୍ରକୋଷ୍ଠରେ ଗତକାଲି ରାତିରେ ସଂପୃକ୍ତ ନାବାଳକକୁ ରଖାଯାଇଥିଲା। ଜଣେ କନେଷ୍ଟବଳ ଓ ଦୁଇଜଣ ହୋମ୍‌ଗାର୍ଡ ମୁତୟନ ହୋଇଥିଲେ। ଉକ୍ତ ପ୍ରକୋଷ୍ଠ ସଂଲଗ୍ନ ପାଇଖାନା ଏକଜିଟ୍ ଫ୍ୟାନ୍ ଭଙ୍ଗାଯାଇଥିବା ଓ ନାବାଳକ ଜଣକ ସେଠାରେ ନଥିବା ଆଜି ସକାଳେ ଜଣାପଡ଼ିଥିଲା।

ସମ୍ପୃକ୍ତ ନାବାଳକ ବିରୋଧରେ ଗତ ବର୍ଷ କାମାକ୍ଷାନଗର ଥାନାରେ ୩ଟି ମାମଲା ଥିବାବେଳେ ଚଳିତ ବର୍ଷ କଙ୍କଡ଼ାହାଡ଼ ଥାନାରେ ଗୋଟିଏ ମାମଲା ରହିଛି। ସେ ଥାନାରୁ ଫେରାର ହୋଇଯିବାରୁ ଆଜି ପୁଲିସ ଆଉ ଏକ ମାମଲା ରୁଜୁକରିଛି। ନାବାଳକକୁ ରଖାଯାଇଥିବା କୋଠରିକୁ ଲାଗି କମୋଡ ପାଇଖାନା ଥିଲା। ସେଥିରେ ଚଢ଼ି ଫ୍ୟାନ୍‌ (ଏକ୍‌ଜଷ୍ଟ ଫ୍ୟାନ୍‌) ଭାଙ୍ଗି ସେ ପଳାଇଯାଇଥିବା ପୁଲିସ ସଂଦେହ କରିଛି।

ସମ୍ବନ୍ଧିତ ଖବର

Leave A Reply

Your email address will not be published.