ଡାକ୍ତର ଦାମୋଦର ରାଉତ ଓ ପୁଅ ସମ୍ବିତ ରାଉତରାୟଙ୍କୁ ନେଇ ଚର୍ଚ୍ଚାରେ ଜଗତସିଂହପୁର ଜିଲ୍ଲା ରାଜନୀତି : ପୁଅ ବିରୋଧରେ ପ୍ରଚାର କରିବେ କି ଦାମ ?
ଜଗତସିଂହପୁର : ବିଜେପି କ୍ୟାମ୍ପରେ ବାପା । ବିଜେଡି ଶିବିରରେ ପୁଅ । ଦାମ-ସମ୍ବିତଙ୍କୁ ନେଇ ଚର୍ଚ୍ଚା । ରାଜ୍ୟ ରାଜନୀତିର ଅନ୍ୟତମ ଚର୍ଚ୍ଚିତ ଚେହେରା ଡାକ୍ତର ଦାମୋଦର ରାଉତ ଓ ପୁଅ ସମ୍ବିତ ରାଉତରାୟଙ୍କୁ ନେଇ ଜୋରଦାର ଚର୍ଚ୍ଚା । କାରଣ ଗୋଟିଏ ପରିବାରର ଏହି ଦୁଇ ସଦସ୍ୟ ଏବେ ଭିନ୍ନଭିନ୍ନ ରାଜନୈତିକ ଦଳର ବିଧାୟକ ପ୍ରାର୍ଥୀ । ନିଜ ତୁଣ୍ଡ ପାଇଁ ଚର୍ଚ୍ଚାରେ ରହିଆସୁଥିବା ଦାମ ବାବୁ, ପୁଅ ସମ୍ବିତଙ୍କ ବିରୋଧରେ ପ୍ରଚାର କରିବେ କି ? ପୁଅ ବିରୋଧରେ କ’ଣ କହିବେ ବାପା ? ନବୀନ ସରକାରକୁ ହଟାଇବା ପାଇଁ ଆହ୍ୱାନ ଦେଉଥିବା ଦାମ ବାବୁ, ପୁଅ ବିରୋଧରେ ଚୁପ୍ ରହିବା ସମ୍ଭବ କି ? ଏଭଳି କେତେକ ଗୁରୁତ୍ୱପୂର୍ଣ୍ଣ ପ୍ରଶ୍ନ ଚାରିପାଖରେ ଘୁରିବୁଲୁଛି ଜଗତସିଂହପୁର ଜିଲ୍ଲା ରାଜନୀତି ।
Sambad is now on WhatsApp
Join and get latest news updates delivered to you via WhatsApp
ବିଜେଡି ରାଜନୀତିରେ ଥିଲାବେଳେ ପ୍ରତିପକ୍ଷଙ୍କ ବିରୋଧରେ ଶାଣିତ ଟିପ୍ପଣୀ କରୁଥିବା ଦାମୋଦର ରାଉତ, ଏବେ ବିଜେପି ଶିବିରରେ ରହି ବିଜେଡି ବିରୋଧରେ ବର୍ଷୁଛନ୍ତି । ବିଶେଷ କରି ବାଲିକୁଦା-ଏରସମାରୁ ପ୍ରାର୍ଥୀ ହେବା ପରେ ନବୀନ ସରକାରକୁ ହରାଇବା ଲାଗି ଆକ୍ରମଣକୁ ଜୋରଦାର କରିଛନ୍ତି । ସେପଟେ ପାରାଦୀପରେ ବିଜେଡିକୁ ପ୍ରତିନିଧିତ୍ୱ କରୁଛନ୍ତି ପୁଅ ସମ୍ବିତ ରାଉତରାୟ ।
ଡାକ୍ତର ଦାମୋଦର ରାଉତ । ବିଜେପି ବାଲିକୁଦା-ଏରସମା ପ୍ରାର୍ଥୀ । ୨୦୧୯ ନିର୍ବାଚନରେ ଜଗତସିଂହପୁର ରାଜନୀତିରେ ସଂପୂର୍ଣ୍ଣ ନୂଆ ସମୀକରଣ ଦେଖିବାକୁ ମିଳିଛି । ଦିନେ ବିଜେଡିର ଛାମୁଆ ନେତା ଭାବେ ପରିଚିତ ଡାକ୍ତର ଦାମୋଦର ରାଉତ ଏବେ ବିଜେପିର ବାଲିକୁଦା-ଏରସମା ବିଧାୟକ ପ୍ରାର୍ଥୀ । ଅନ୍ୟପକ୍ଷରେ କିଛିମାସ ତଳେ ଜଗତସିଂହପୁର ଜିଲ୍ଲା ବିଜେପି ରାଜନୀତିରେ ସକ୍ରିୟ ଥିବା ରଘୁନନ୍ଦନ ଦାସ ଏହି ନିର୍ବାଚନୀ କ୍ଷେତ୍ରରେ ଦାମ ବାବୁଙ୍କ ପ୍ରତିଦ୍ୱନ୍ଦ୍ୱୀ । କୁହାଯାଉଛି ରଘୁନନ୍ଦନ ବିଜେପି ସଂଗଠନର ଜଣେ ଟାଣୁଆ ନେତା ଥିବାରୁ ତାଙ୍କୁ ଭରସା କରି ଦାମ ବାବୁ ପଦ୍ମଫୁଲ ଧରି ଜିଲ୍ଲାରେ ନୂଆ ଇନିଂସ ଆରମ୍ଭ କରିବାକୁ ଗୋଡ କାଢିଥିଲେ । ପ୍ରଶାନ୍ତ ମୁଦୁଲିଙ୍କୁ ଲକ୍ଷ୍ୟ କରି ବାଲିକୁଦା-ଏରସମା ଉପରେ ଆଖି ପକାଇଥିଲେ । ହେଲେ ଦାମଙ୍କୁ ଚେକ୍ ଦେବାଲାଗି ନୂଆ ଚାଲ ଖେଳିଛି ବିଜେଡି । ପ୍ରଶାନ୍ତ ମୁଦୁଲିଙ୍କ ଆସନ ବଦଳାଇ ରଘୁନନ୍ଦନଙ୍କୁ ନିଜ କ୍ୟାମ୍ପରେ ସାମିଲ କରିବା ସହ ଏହି ଆସନରେ ମୈଦାନକୁ ଓହ୍ଲାଇଛି ।
ସମ୍ବିତ ରାଉତରାୟ । ବିଜେଡି ପାରାଦ୍ୱୀପ ପ୍ରାର୍ଥୀ । ବାପା ବିଜେଡି ଛାଡି ବିଜେପି ଚାଲିଯିବା ସତ୍ୱେ ନବୀନଙ୍କ ପ୍ରତି ନିଜ ଆନୁଗତ୍ୟରେ ଉଣା କରିନଥିଲେ ପୁଅ ସମ୍ବିତ ରାଉତରାୟ । ଯେଉଁଥିପାଇଁ ସମ୍ବିତଙ୍କୁ ମିଳିଛି ବଡ ପୁରସ୍କାର । ବାପା ଦାମ ରାଉତଙ୍କ ଗତ ନିର୍ବାଚନୀ କ୍ଷେତ୍ର ପାରାଦ୍ୱୀପରେ ତାଙ୍କୁ ବିଧାୟକ ପ୍ରାର୍ଥୀ କରିଛି ବିଜୁ ଜନତା ଦଳ । ଅର୍ଥାତ ସଂପର୍କରେ ବାପା-ପୁଅ ହୋଇଥିଲେ ମଧ୍ୟ ନିର୍ବାଚନୀ ଲଢେଇରେ ଦୁହିଁଙ୍କ ରାସ୍ତା ଅଲଗା । ବାପାଙ୍କ ପୂର୍ବ ଆସନ ପାରାଦ୍ୱୀପରୁ ଶଙ୍ଖ ଚିହ୍ନରେ ଲଢିବେ ପୁଅ ସମ୍ବିତ ।
ଗୋଟିଏ ଛାତତଳେ ରହୁଥିଲେ ମଧ୍ୟ ଏବେ ରାଜନୀତିର ହାୱା ଅଲଗା କରିଦେଇଛି ନୀତି, ନେତାଗିରି ଓ ଆଦର୍ଶକୁ । ରାଜନୈତିକ ଫଇଦା ପାଇଁ ବିଜେଡି ଫନ୍ଦ କରୁଥିବା ଅଭିଯୋଗ କରି ପୁଅ ବିରୋଧରେ ପ୍ରଚାର କରିବେ ନାହିଁ ବୋଲି କହିଛନ୍ତି ଦାମ । ଅବଶ୍ୟ ପୁଅ ପାଇଁ ନୁହେଁ ବରଂ ପାର୍ଟି ପାଇଁ ପ୍ରଚାର କରିବେ ବୋଲି କହିଛନ୍ତି । ଅନ୍ୟପକ୍ଷରେ କେବଳ ଘରର ଚାରିକାନ୍ଥ ଭିତରେ ବାପା-ପୁଅର ସଂପର୍କ ବୋଲି ସ୍ପଷ୍ଟ କରିଦେଇଛନ୍ତି ସମ୍ବିତ । କେଉଁଠି ପ୍ରତିଶୋଧର ରାଜନୀତି ତ ଆଉ କେଉଁଠି ଟିକେଟର ଲୋଭ, ରକ୍ତର ସଂପର୍କକୁ ପର କରିଦେଇଛି । ଗୋଟିଏ ଛାତ ତଳେ ରହି ମଧ୍ୟ ଅଲଗା ଅଲଗା ଦଳ ପାଇଁ ନିର୍ବାଚନ ଲଢିବାକୁ ଅଂଟା ଭିଡିଛନ୍ତି ପରିବାର ସଦସ୍ୟ । ରାଜନୀତିରେ ସୁବିଧାବାଦ ଓ ସତାର ମୋହରୁ ବାପ-ପୁଅଙ୍କ ମଧ୍ୟରେ ଲଢେଇ ହେଉଛି ।