ଶ୍ରୀମନ୍ଦିର ଚତୁଃପାର୍ଶ୍ବ ଉଚ୍ଛେଦ : ଏବେ ଭଙ୍ଗା ହେବନି ମଠ, ସୌନ୍ଦର୍ଯ୍ୟୀକରଣରେ ବ୍ୟସ୍ତ ପ୍ରଶାସନ, ଖାଲି ହେଲା ମଙ୍ଗୁ ମଠ ଦୋକାନ ଘର

ପୁରୀ : ଶ୍ରୀମନ୍ଦିର ଚତୁଃପାର୍ଶ୍ବରୁ ୭୫ ମିଟର ଉଚ୍ଛେଦ କ୍ରମରେ ଲଙ୍ଗୁଳି ମଠ, ଏମାର ମଠ ଓ ବଡ଼ଆଖଡ଼ା ମଠ ଭଙ୍ଗାଯିବା ପରେ ଏବେ ଜିଲ୍ଲା ପ୍ରଶାସନ ସୌନ୍ଦର୍ଯ୍ୟୀକରଣକୁ ଗୁରୁତ୍ବ ଦେଇଛି। ମଠ କୋଠାର ଭଗ୍ନାବଶେଷକୁ ଅନ୍ୟତ୍ର ସ୍ଥାନାନ୍ତର ପରେ ବର୍ତ୍ତମାନ ଟାଇଲ୍ ବିଛାଠାରୁ ଆରମ୍ଭ କରି ଆଲୋକୀକରଣକୁ ଗୁରୁତ୍ବ ଦେଇଛି। ଏହି ଦୃଷ୍ଟିରୁ କିଛି ଦିନ ପାଇଁ ପ୍ରଶାସନ ଉଚ୍ଛେଦ କାର୍ଯ୍ୟକୁ ସ୍ଥଗିତ ରଖିଥିବା ଜଣାପଡ଼ିଛି। ଆଇନଗତ ଦିଗ ବି ଏଥିରେ କିଛିଟା ପ୍ରତିବନ୍ଧକ ସୃଷ୍ଟି କରିଛି। ଅନ୍ୟପଟେ ସୌନ୍ଦର୍ଯ୍ୟୀକରଣ କାମ ‌ଶେଷ ପରେ ପ୍ରଶାସନ ମଙ୍ଗୁ ମଠ ଓ ସାନଛତା ମଠକୁ ଭାଙ୍ଗିବାକୁ ସ୍ଥିର କରିଛି। ଏଥି ପାଇଁ ଆଜିଠାରୁ ମଙ୍ଗୁ ମଠ ଓ ସାନଛତା ମଠ କୋଠାରେ ଥିବା ଦୋକାନୀମାନେ ନିଜ ନିଜ ଆସବାବପତ୍ର ଖାଲି କରିବା ଆରମ୍ଭ କରିଛନ୍ତି।

ଗତ ଅଗଷ୍ଟ ୨୭ରୁ ଶ୍ରୀମନ୍ଦିର ଚାରିପଟୁ ଉଚ୍ଛେଦ ଅଭିଯାନ ଆରମ୍ଭ କରିଥିବା ଜିଲ୍ଲା ପ୍ରଶାସନ ପ୍ରଥମେ ଲଙ୍ଗୁଳି ମଠକୁ ଭାଙ୍ଗିଥିଲା। ଏହା ପରେ ଏମାର ମଠ ଓ ବଡ଼ଆଖଡ଼ା ମଠ ଭଙ୍ଗାଯାଇଥିଲା। ଯାତାୟତରେ ସମସ୍ୟା ସୃଷ୍ଟି କରୁଥିବା ଏହି ତିନି ମଠ ଉଚ୍ଛେଦ ପରେ ଏବେ ଭକ୍ତଙ୍କ ଗମନାଗମନର ମାର୍ଗ ପ୍ରଶସ୍ତ ହୋଇଛି। ଅନ୍ୟପକ୍ଷରେ ପ୍ରଶାସନ ଉଚ୍ଛେଦ ସ୍ଥଳରେ ଟାଇଲ୍ ବିଛାଇବା ଆରମ୍ଭ କରିଛି। ବିଭିନ୍ନ ପ୍ରଜାତିର ଗଛ ଲଗାଇ ଶ୍ରୀମନ୍ଦିର ଚାରିପାର୍ଶ୍ବରେ ସବୁଜ ବଳୟ ଫେରାଇ ଆଣିବାକୁ ଉଦ୍ୟମ ହୋଇଛି। ଏମାର ମଠର ଉଚ୍ଛେଦ ସ୍ଥଳରେ ଆଲୋକ ସଂଯୋଗ କରାଯାଇଛି। ଯାହାଦ୍ବାରା ରାତିରେ ଶ୍ରୀମନ୍ଦିର ବେଢ଼ାରେ ଭିଡ଼ ଜମାଉଥିବା ଭକ୍ତମାନେ ବଡ଼ଦାଣ୍ଡରେ ବସି ଶ୍ରୀମନ୍ଦିର ଦର୍ଶନ କରୁଛନ୍ତି। ଏବେ ପ୍ରଶାସନ ବଡ଼ଆଖଡ଼ା ମଠର ଉଚ୍ଛେଦସ୍ଥଳକୁ ଫୋକସ୍ କରିଛି। ଏଠାରେ ଥିବା ଭଗ୍ନାବଶେଷଗୁଡ଼ିକୁ ଖାଲି କରିବା ପରେ ଟାଇଲ୍‌ ବିଛାଇବାକୁ ଯୋଜନା କରିଛି।

ସମ୍ବନ୍ଧିତ ଖବର