କଇଁଛବାହାଳରେ ଜଳ-ସଂଘର୍ଷ : ରାତିରେ କୂଅ ମୂଳେ ଶୋଉଛନ୍ତି ଗ୍ରାମବାସୀ

ବଅଁରପାଳ : ଗାଁ ଲୋକେ ଅପେକ୍ଷା କରନ୍ତି କେତେବେଳେ କୂଅରୁ ପାଣି ଝରିବ। ଏମିତିକି ରାତିରେ କୂଅ ଚାନ୍ଦିନୀରେ ଶୋଇବାକୁ ପଡେ ଗ୍ରାମବାସୀଙ୍କୁ। ଥରକୁ ଥର ଟର୍ଚ ମାରି ଦେଖନ୍ତି ପାଣି ଝରିଲା ନା ନାହିଁ। ଭୋର୍‌ ୩ଟା ବେଳକୁ ବାଲ୍‌ଟି ବୁଡ଼ିବା ଭଳି ପାଣି ହୋଇଗଲେ କୂଅ ମୂଳେ ଶୋଇଥିବା ଲୋକ ଗରା ବାଲଟି ଧରି ଆରମ୍ଭ କରିଦିଅନ୍ତି ଜଳ ସଂଗ୍ରହ। ଚାହୁଁ ଚାହୁଁ ଲମ୍ବିଯାଏ ଗାଁ ଯାକର ଗରା, ବାଲ୍‌ଟି କୂଅ ଚାରିପାଖେ। କୂଅରୁ ଝରୁଥିବା ପାଣି କଢାଯିବା ପରେ ସମସ୍ତଙ୍କୁ ବାଣ୍ଟି ଦିଆଯାଏ। ଖାଦ୍ୟ ରନ୍ଧାରନ୍ଧି ଓ ପିଇବା ପାଇଁ ନିଇତି ଦହଗଞ୍ଜ ହୋଇ ପାଣି ସଂଗ୍ରହ କରିବାକୁ ପଡ଼ୁଛି ଗ୍ରାମବାସୀଙ୍କୁ।

ଏହା କୌଣସି ଅପନ୍ତରା ଗାଁର ଚିତ୍ର ନୁହେଁ, ଶିଳ୍ପ ସମୃଦ୍ଧ ଅନୁଗୁଳ ଜିଲ୍ଲା ମୁଖ୍ୟାଳୟଠାରୁ ମାତ୍ର ୧୨ କିଲୋମିଟର ତଥା ଏସିଆର ଦ୍ୱିତୀୟ ବୃହତ୍ତମ ପାଓ୍ଵାର ଗ୍ରିଡ଼୍‍ଠାରୁ ୨ କିଲୋମିଟର ଦୂର ବଅଁରପାଳ ବ୍ଲକ୍‌ ଫୁଲପଡ଼ା ପଞ୍ଚାୟତ କଇଁଛବାହାଳ ଗାଁର ଇଏ ହେଉଛି ନିତ୍ୟନୈମିତିକ ଘଟଣା। ପାନୀୟ ଜଳ ପାଇଁ ଗାଁର ଏକମାତ୍ର ଖୋଲା କୂଅ ହିଁ ଭରସା। ପାହାନ୍ତାରୁ ଗାଁ ଲୋକଙ୍କୁ କୂଅ ପାଖରେ ଧାଡ଼ି ଲମ୍ବାଇବାକୁ ପଡ଼େ ଓ ରାତିରେ କୂଅ ପାଖରେ ଶୋଇବାକୁ ହୁଏ ବୋଲି ଗାଁର ବଦନୀ ବେହେରା, ପାର ବେହେରା, କୁମୁଦିନୀ ବେହେରା, ବାସନ୍ତୀ ବେହେରା, ନୟନୀ ବେହେରା ପ୍ରମୁଖ କହିଛନ୍ତି। ଗ୍ରୀଷ୍ମ ପ୍ରଭାବରେ ଜଳସ୍ତର ବହୁ ତଳକୁ ଖସିଯାଇଛି। କୂଅରେ ପାଣି ଝରିବାକୁ ବିଳମ୍ବ ହେଉଛି। ଅପେକ୍ଷା ସତ୍ତ୍ୱେ ବେଳେ ବେଳେ ପାଣି ସରିଯିବାରୁ ନିରାଶ ହୋଇ ଫେରିବାକୁ ପଡ଼େ। ପାଣି ପାଇଁ ଅନେକ ସମୟରେ ଝଗଡ଼ା ବି ହେଉଛି। ଗାଧୁଆପାଧୁଆ ପାଇଁ ଗାଁଠାରୁ ୩ କିଲୋମିଟର ଦୂର ପୋଖରୀକୁ ଯିବାକୁ ପଡ଼ୁଛି ବୋଲି ଗ୍ରାମବାସୀ କ୍ଷୋଭର ସହ ପ୍ରକାଶ କରିଛନ୍ତି। ଫୁଲପଡ଼ା ପାଓ୍ଵାର ଗ୍ରିଡ଼୍‍ର ପାରିପାର୍ଶ୍ୱିକ ଅଞ୍ଚଳ ଭିତରେ ରହିଛି ଏହି ଗାଁ। ନା ପାଓ୍ଵାର ଗ୍ରିଡ଼୍‍, ନା ପ୍ରଶାସନ କେହି ଗାଁର ଜଳାଭାବ ମେଣ୍ଟାଇବାକୁ ଦୃଷ୍ଟି ଦେଉନାହାନ୍ତି। ଭାଗ୍ୟକୁ ଆଦରିବା ବ୍ୟତୀତ ଅନ୍ୟ ଗତି ନାହିଁ ବୋଲି କହିଛନ୍ତି କଇଁଛବାହାଳ ଗ୍ରାମବାସୀ।

ସମ୍ବନ୍ଧିତ ଖବର