ଭୋଟ ପୂର୍ବରୁ ଘସିପୁରା ରାଜନୀତି ସରଗରମ୍‌ : ଭାଇଙ୍କ ସହ ପୂର୍ବତନ ପୌର ଉପାଧ୍ୟକ୍ଷ ଗିରଫ

ଥାନାରେ ପୁଲିସକୁ ମାଡ଼ ମାରିବା ଅଭିଯୋଗ, ମିଛ ଅଭିଯୋଗରେ ଗିରଫ କରାଯାଇଛି: କଂଗ୍ରେସ, ଆଜି ଥାନା ଘେରାଉ, ଯୋଗଦେବେ ପିସିସି ସଭାପତି

0

ଆନନ୍ଦପୁର : ଏଥର ଘସିପୁରାରେ ରାଜ୍ୟ ରାଜନୀତିର ଦୁଇ ହେଭିୱେଟ୍ ନେତା ମନ୍ତ୍ରୀ ବଦ୍ରି ପାତ୍ରଙ୍କ ସହ ପିସିସି ସଭାପତି ନିରଞ୍ଜନ ପଟ୍ଟନାୟକ ମୁହାଁମୁହିଁ ହେବାକୁ ଯାଉଛନ୍ତି। ତେବେ ଭୋଟ ପୂର୍ବରୁ ଘସିପୁରା ରାଜନୀତି ସରଗରମ୍ ହୋଇ ଉଠିଛି। ଥାନାରେ ପଶି ପୁଲିସକୁ ମାଡ଼ ମାରିବା ଅଭିଯୋଗରେ ଘସିପୁରା ପୁଲିସ ଆନନ୍ଦପୁର ମ୍ୟୁନିସିପାଲିଟିର ପୂର୍ବତନ ପୌରାଧ୍ୟକ୍ଷ ସୁରେଶ ସାହୁ ଓ ତାଙ୍କ ସାନ ଭାଇ ସାମ୍ବାଦିକ ଜିତେନ୍ଦ୍ର ସାହୁଙ୍କୁ ଗିରଫ କରି କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଜେଲ୍‌ ହାଜତକୁ ପଠାଇ ଦିଆଯାଇଛି। ଅନ୍ୟପଟେ ଅଭିଯୋଗ ସମ୍ପୂର୍ଣ୍ଣ ମିଥ୍ୟା। ଶାସକ ଦଳ ଚାପରେ ମି‌ଛ ମାମଲା ରୁଜୁ କରାଯାଇ ସେମାନଙ୍କୁ ଗିରଫ କରାଯାଇଛି ବୋଲି ସୁରେଶ କହିଛନ୍ତି। ପୁଲିସର ଏଭଳି ଆକ୍ରୋଶମୂଳକ କାର୍ଯ୍ୟାନୁଷ୍ଠାନକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଏହାର ପ୍ରତିବାଦରେ ଆସନ୍ତାକାଲି କଂଗ୍ରେସ ଘସିପୁରା ଥାନା ଘେରାଉ କରିବ ବୋଲି ‌ଚେତାବନୀ ଦେଇଛି।

ପ୍ରାପ୍ତ ସୂଚନା ଅନୁସାରେ, ଘସିପୁରା ଅଷ୍ଟପ୍ରହର ନାମଯଜ୍ଞ ସ୍ଥଳରେ ସୁରେଶଙ୍କ ସାନଭାଇ ରାଜେନ୍ଦ୍ର ଉପସ୍ଥିତ ଥିଲେ। ଗତକାଲି ରାତି ସାଢେ ୧୧ଟା ବେଳେ ଘସିପୁରା ଥାନା ଆଇଆଇସି ବିର‌ଞ୍ଚି ବାଗ୍ ସେଠାକୁ ଯାଇ ରାଜେନ୍ଦ୍ରଙ୍କୁ ଥାନାକୁ ଉଠାଇ ଆଣିଥିଲେ। ଖବର ପାଇ ସୁରେଶ ଓ ଜିତେନ୍ଦ୍ର ରାତି ପ୍ରାୟ ୧୨ଟା ବେଳେ ଥାନାରେ ପହଞ୍ଚିଥିଲେ। ରାଜେନ୍ଦ୍ରଙ୍କୁ ଥାନାକୁ କାହିଁକି ଅଣାଯାଇଛି ବୋଲି ଉଭୟ‌ ଜଣେ ଏସ୍‌ଆଇଙ୍କୁ ପଚାରିଥିଲେ। ଏହାକୁ ନେଇ ସେମାନଙ୍କ ମଧ୍ୟରେ କଥା କଟାକଟି ହୋଇଥିଲା। କିଛି ସମୟ ପରେ ଆଇଆଇସି ଶ୍ରୀ ବାଗ୍‌ ଥାନାରେ ପହଞ୍ଚି ସୁରେଶ ଓ ଜିତେନ୍ଦ୍ରଙ୍କୁ ଅଟକ ରଖିଥିଲେ। ସକାଳୁ ଏଏସ୍‌ଆଇ ତ୍ରିଲୋଚନ ଦେହୁରୀଙ୍କ ଏତଲା କ୍ରମେ ସେମାନଙ୍କ ବିରୋଧରେ ବିଭିନ୍ନ ସଂଗିନ ଦଫାରେ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଥିଲା। ଘସିପୁରା ଗ୍ରାମ୍ୟ ନ୍ୟାୟାଳୟରେ ସୁରେଶ ଓ ଜିତେନ୍ଦ୍ରଙ୍କୁ ହାଜର କରାଯାଇଥିଲା। ଜାମିନ ନାମଞ୍ଜୁର ହେବାରୁ ସେମାନଙ୍କୁ ଜେଲ୍‌ ହାଜତକୁ ପଠାଇ ଦିଆଯାଇଛି।

ତେବେ ସୁରେଶ ପୁଲିସ ବିରୋଧରେ ପ‌ାଲଟା ଅଭିଯୋଗ ଆଣିଛନ୍ତି। ଥାନାରେ ପଶି ପୁଲିସ କର୍ମଚାରୀଙ୍କୁ ମାଡ଼ ମାରିଥିବା ନେଇ ସେମାନଙ୍କ ବିରୋଧରେ ପୁଲିସ ମିଛ ମାମଲା ରୁଜୁ କରିଛି ବୋଲି ସୁରେଶ କହିଛନ୍ତି। ପୁଲିସ ତାଙ୍କୁ ଓ ତାଙ୍କ ଭାଇଙ୍କୁ ଦୁର୍ବ୍ୟବହାର କରିଛି। ସାନଭାଇ ରାଜେନ୍ଦ୍ରଙ୍କୁ ଥାନାକୁ ଆଣିବା ବେଳେ ଓ ଥାନାରେ ପୁଲିସ ନିସ୍ତୁକ ମାଡ଼ ମାରିଛି ବୋଲି ସୁରେଶ ଅଭିଯୋଗ କରିଛନ୍ତି। ଶାସକ ଦଳର ଚାପରେ ପୁଲିସ ଏଭଳି କରିଛି ବୋଲି ସେ କହିଛନ୍ତି।

ସୁରେଶଙ୍କ ଗିରଫ ଖବର ପାଇବା ପରେ ଥାନା ଓ କୋର୍ଟ ପରିସରରେ କଂଗ୍ରେସ ନେତାଙ୍କ ଭିଡ଼ ଜମିଥିଲା। ପୂର୍ବତନ ପିସିସି ସଭାପତି ଜୟଦେବ ଜେନା, କେନ୍ଦୁଝର ଜିଲ୍ଲା କଂଗ୍ରେସ କାର୍ଯ୍ୟକାରୀ ସଭାପତି ରତିକାନ୍ତ ବରାଳ, ନିକୁଞ୍ଜ ବିହାରୀ ମିଶ୍ର, ସଂଗ୍ରାମ ଜେନା, ମନୋଜ ସ୍ବାଇଁ, ଅଧ୍ୟାପକ ପଞ୍ଚାନନ ରାଉତ, ଜୟନ୍ତ ସାହୁ, ସୁରେଶ ପୃଷ୍ଟି ପ୍ରମୁଖ କୋର୍ଟ ନିକଟରେ ପହ‌ଞ୍ଚିଥିଲେ। ପୁଲିସର ଏଭଳି କାର୍ଯ୍ୟାନୁଷ୍ଠାନକୁ ନେଇ ଆନନ୍ଦପୁର କଂଗ୍ରେସ ପ୍ରାର୍ଥୀ ଜୟଦେବ ଜେନା ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ପୁଲିସ ଶାସକ ଦଳକୁ ସୁହାଇବା ଭଳି କାମ କରୁଛି ବୋଲି ଶ୍ରୀ ଜେନା ଅଭିଯୋଗ କରିଛନ୍ତି। ଘସିପୁରା ଆଇଆଇସିଙ୍କ ବିରୋଧରେ କାର୍ଯ୍ୟାନୁଷ୍ଠାନ ସାଙ୍ଗକୁ ତାଙ୍କୁ ଅନ୍ୟତ୍ର ସ୍ଥାନାନ୍ତର ଦାବିରେ ଆସନ୍ତାକାଲି ଥାନା ଘେରାଉ କରାଯିବ ବୋଲି କଂଗ୍ରେସ ପକ୍ଷରୁ ସ୍ଥିର କରାଯାଇଛି। ଏହି ଘେରାଉରେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ସମେତ ଆନନ୍ଦପୁର ଓ ଘସିପୁରା ନିର୍ବାଚନ ମଣ୍ତଳୀର ହଜାର ହଜାର ସମର୍ଥକ ସାମିଲ ହେବେ ବୋଲି ଜିଲ୍ଲା କଂଗ୍ରେସ କାର୍ଯ୍ୟକାରୀ ସଭାପତି ରତିକାନ୍ତ ବରାଳ ସୂଚନା ଦେଇଛନ୍ତି।

ଅନ୍ୟପକ୍ଷରେ କାର୍ଯ୍ୟରତ ସାମ୍ବାଦିକଙ୍କୁ ଗିରଫ କରିବା ଘଟଣାକୁ ନେଇ ଗଣମାଧ୍ୟମ ପ୍ରତିନିଧିମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ଗିରଫର କାରଣ ସମ୍ପର୍କରେ ଜାଣିବା ପାଇଁ କିଛି ଗଣମାଧ୍ୟମ ପ୍ରତିନିଧି ଥାନାକୁ ଯାଇଥିବା ବେଳେ ଆଇଆଇସି ଶ୍ରୀ ବାଗ୍‌ ‌ସେମାନଙ୍କୁ ମଧ୍ୟ ଗାଳିଗୁଲଜ କରିଥିବା ଅଭିଯୋଗ ହୋଇଛି। ଏ ସମ୍ପର୍କିତ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ପୁଲିସର ଏଭଳି କାର୍ଯ୍ୟକୁ ବିଭିନ୍ନ ମହଲରେ ନିନ୍ଦା କରାଯାଇଛି।

ସମ୍ବନ୍ଧିତ ଖବର

Leave A Reply

Your email address will not be published.