ଝୋଡ଼ିଆ ଆଦିବାସୀଙ୍କୁ ଜନଜାତି ତାଲିକାଭୁକ୍ତ କରାଯାଉ
ଭୁବନେଶ୍ବର : ଝୋଡ଼ିଆ ଆଦିବାସୀଙ୍କୁ ଜନଜାତି ତାଲିକାଭୁକ୍ତ କରିବାକୁ ଦାବି ହୋଇଛି। ଆଜି ଏ ନେଇ ଲୋକଶକ୍ତି ଅଭିଯାନ ପକ୍ଷରୁ ଲୋହିଆ ଏକାଡେମି ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ସଭାପତି ପ୍ରଫୁଲ୍ଲ ସାମନ୍ତରାୟ କହିଛନ୍ତି କି, ରାଜ୍ୟ ସରକାର ୭ ବର୍ଷ ପୂର୍ବେ କେନ୍ଦ୍ର ସରକାରଙ୍କୁ ଏହା ସୁପାରିସ କରିବା ସତ୍ତ୍ବେ କେନ୍ଦ୍ର ଏହାକୁ ଜନଜାତି ତାଲିକାଭୁକ୍ତ ନ କରିବା ଅନ୍ୟାୟ ଅଟେ। ତୁରନ୍ତ କେନ୍ଦ୍ର ସରକାର ଏହାକୁ କ୍ୟାବିନେଟ୍ରେ ଅନୁମୋଦିତ କରାଇ ସଂସଦରେ ଗୃହୀତ କରାନ୍ତୁ ବୋଲି ଦାବି ହୋଇଛି।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ସାମନ୍ତରାୟ କହିଛନ୍ତି କି, ୨୦୧୪ରୁ ଏ ପର୍ଯ୍ୟନ୍ତ ନରେନ୍ଦ୍ର ମୋଦୀଙ୍କ ସରାକାର ଆସାମ, ମଧ୍ୟପ୍ରଦେଶ, ଛତିଶଗଡ଼ ଓ ଝାରଖଣ୍ଡରେ ପ୍ରାୟ ୧୫ରୁ ଅଧିକ ସଂପ୍ରଦାୟକକୁ ଆଦିବାସୀ ତାଲିକାଭୁକ୍ତ କରିଥିଲେ ମଧ୍ୟ ଓଡ଼ିଶାର ଝୋଡ଼ିଆ ସମେତ ଅନ୍ୟ ୪ଟି ଆଦିବାସୀ ସମୁଦାୟକୁ ତାଲିକାଭୁକ୍ତ ନ କରିବା ଏକ ପ୍ରକାର ରାଜ୍ୟ ପ୍ରତି ଅବହେଳା ଅଟେ। ଓଡ଼ିଶାରୁ ଆଦିବାସୀ ମନ୍ତ୍ରଣାଳୟର କେନ୍ଦ୍ରମନ୍ତ୍ରୀ ଜୁଏଲ ଓରାମ ଥାଇ ସୁଦ୍ଧା ଏପରି ନ ହୋଇ ପାରିବା ଅତ୍ୟନ୍ତ ଦୁର୍ଭାଗ୍ୟଜନକ। କେନ୍ଦ୍ର ସରକାର ଆମ ଦାବି ନ ଶୁଣିଲେ ଆସନ୍ତା ସାଧାରଣ ନିର୍ବାଚନରେ ଭୋଟ ବର୍ଜନ କରିବାକୁ ବାଧ୍ୟ ହେବୁ ବୋଲି ସାମ୍ବାଦିକ ସମ୍ମିଳନୀରେ କୁହାଯାଇଛି। ଅନ୍ୟମାନଙ୍କ ମଧ୍ୟରେ ଆଦିବାସୀ ନେତ୍ରୀ ସୁମନି ଝୋଡ଼ିଆ, ମକରନ୍ଦ ମୁଦୁଲି, ଘାସିନି ଝୋଡ଼ିଆ, ଶିବରାମ ନାୟକ ପ୍ରମୁଖ ଉପସ୍ଥିତ ଥିଲେ।