ଭୁବନେଶ୍ବରରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିିଵାଲ୍ : କେନ୍ଦ୍ର, ରାଜ୍ୟ ଉପରେ ବର୍ଷିଲେ
ଓଡ଼ିଶାରେ ୟୁନିଟ୍ ପିଛା ୫ ଟଙ୍କା କାହିଁକି?
ଭୁବନେଶ୍ବର : ୭୦ବର୍ଷ ତଳେ ଦେଶକୁ ସ୍ବାଧୀନତା ମିଳିଛି ସତ, କିନ୍ତୁ ଭାରତଠୁ ପଛରେ ସ୍ବାଧୀନତା ପାଇଥିବା ରାଷ୍ଟ୍ରମାନେ ଆଜି ସବୁ ଦିଗରେ ବିକଶିତ ହୋଇପାରିଛନ୍ତି। ବିକାଶ ନାଁରେ ଦୀର୍ଘ ବର୍ଷ ଧରି ଏ ଦେଶକୁ ଶାସନ କରୁଥିବା କଂଗ୍ରେସ,ବିଜେପି କେବଳ ଲୋକଙ୍କ ସହ ପ୍ରତାରଣା କରିଆସିଛନ୍ତି । ଆଉ ଓଡ଼ିଶାରେ ଶାସନ ଖଣି ମାଫିଆଙ୍କ କବ୍ଜାରେ ଅଛି । କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ଏପରି ବର୍ଷିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିଵାଲ ।
Sambad is now on WhatsApp
Join and get latest news updates delivered to you via WhatsApp
ଆଜି ଭୁବନେଶ୍ବର ଲୋୟର ପିଏମଜିରେ ସାମାଜିକ ନ୍ୟାୟ ଅଭିଯାନ ଓଡ଼ିଶା ପକ୍ଷରୁ ଆୟୋଜିତ ସଭାରେ ଶ୍ରୀ କେଜ୍ରିୱାଲ ଯୋଗ ଦେଇଥିଲେ। ରାଜ୍ୟରେ ନବୀନ ପଟ୍ଟନାୟକଙ୍କ ସରକାରଙ୍କୁ ଟାର୍ଗେଟ କରି ସେ କହିଥିଲେ ଯେ , ଓଡ଼ିଶାରେ ମିଳିତ ମେଣ୍ଟ ସରକାର ଚାଲିଛି। ବିଜେପି ପକେଟରେ ବିଜେଡି, ଆଉ ବିଜେଡି ପକେଟରେ କଂଗ୍ରେସ ଅଛି । ସେଥିପାଇଁ ଓଡ଼ିଶାରେ କୌଣସି ବିରୋଧୀ ଦଳ ନାହିଁ, ମିଳିମିଶି ଓଡ଼ିଶାକୁ ଲୁଟ୍ କରୁଛନ୍ତି। ୫ବର୍ଷରେ ଥରେ ଲୋକ ଦେଖାଣିଆ ନିର୍ବାଚନ ଲଢ଼ି କିଏ କେତେ ସିଟ୍ ନେବ ନିଜ ନିଜ ଭିତରେ ଭାଗ ବାଣ୍ଟି ନେଉଛନ୍ତି । କିନ୍ତୁ ଏବେ ପରିବର୍ତ୍ତନର ସମୟ ଆସିଛି । ଆଉ ଏ ପରିବର୍ତ୍ତନ ଓଡ଼ିଶାବାସୀଙ୍କ ହାତରେ ରହିଛି । ଦିଲ୍ଲୀରେ ଯେଭଳି ପରିବର୍ତ୍ତନ ହୋଇଛି ତାହା ଓଡ଼ିଶାରେ ସମ୍ଭବପର ହେବ । କିନ୍ତୁ ଆମ ଆଦ୍ମୀ ପାର୍ଟି ଏଠି ନିର୍ବାଚନ ଲଢ଼ିବ କି ନାହିଁ ସେ ନିଷ୍ପତ୍ତି ରାଜ୍ୟବାସୀ ନେବେ ।
ତାଙ୍କ ସରକାରଙ୍କ ସଫଳତା ବଖାଣିବାକୁ ଯାଇ କେଜ୍ରିଵାଲ କହିଛନ୍ତି, ଓଡ଼ିଶାରେ ଦୀର୍ଘ ୨୦ ବର୍ଷ ଧରି ବିଜେଡି ଶାସନ କରୁଥିଲେ ବି ଶିକ୍ଷା ଓ ସ୍ୱାସ୍ଥ୍ୟ ସେବାରେ ସୁଧାର ଆସିପାରିନି । ସିଧାସିଧା କହିଛନ୍ତି, ଦିଲ୍ଲୀରେ ତାଙ୍କ ସରକାର ଆସିବା ପୂର୍ବରୁ ସରକାରୀ ସ୍କୁଲ ଗୁଡ଼ିକରେ କେହି ବି ଅଭିଭାବକ ସେମାନଙ୍କ ପିଲାଙ୍କୁ ପାଠ ପଢ଼ଉନଥିଲେ । ଘରୋଇ ସ୍କୁଲ ଗୁଡ଼ିକ ପ୍ରତିବର୍ଷ ଫି ବୃଦ୍ଧି କରି ପିଲାଙ୍କ ବାପାମାଙ୍କୁ ଶୋଷଣ କରୁଥିଲେ । କିନ୍ତୁ ଆମ୍ ଆଦମୀ ପାର୍ଟି କ୍ଷମତାକୁ ଆସିବା ପରେ ସେ ଅବସ୍ଥା ଆଉ ନାହିଁ । ଏବେ ଅଭିଭାବକମାନେ ଘରୋଇ ସ୍କୁଲ ଛାଡ଼ି ସରକାରୀ ସ୍କୁଲରେ ସେମାନଙ୍କ ପିଲାଙ୍କ ନାମ ଲେଖାଉଛନ୍ତି । ଘରୋଇ ସ୍କୁଲ ତୁଳନାରେ ସରକାରୀ ସ୍କୁଲର ଫଳାଫଳ ମଧ୍ୟ ୧୦ ପ୍ରତିଶତ ଅଧିକ ହେଉଛି । ଗତ ୪ବର୍ଷ ମଧ୍ୟରେ ଘରୋଇ ସ୍କୁଲର ଫି’ ବୃଦ୍ଧି ହୋଇନି ଆଉ ଶୀଲା ଦୀକ୍ଷିତ ସରକାର ସମୟରେ ଯେଉଁ ଘରୋଇ ସ୍କୁଲ ଗୁଡ଼ିକ ଫି ବୃଦ୍ଧି କରିଥିଲେ ତାକୁ ମଧ୍ୟ ଫେରସ୍ତ ଦେବା କାର୍ଯ୍ୟ ଦିଲ୍ଲୀ ସରକାର କରିଛି ।
ସେହିପରି, ତାଙ୍କ ସରକାର କ୍ଷମତାକୁ ଆସିବା ପରେ ଦିଲ୍ଲୀରେ ବିଦ୍ୟୁତ ୟୁନିଟ୍ ପିଛା ୧ଟଙ୍କାରେ ଉପଲବ୍ଧ କରାଉଛି । ଦିଲ୍ଲୀ ବିଦ୍ୟୁତ ଉତ୍ପାଦନ ନକରି ମାତ୍ର ୧ଟଙ୍କାରେ ଗ୍ରାହକଙ୍କୁ ବିଦ୍ୟୁତ୍ ଯୋଗାଉଥିବାବେଳେ ଓଡ଼ିଶାରେ ବିଦ୍ୟୁତ ଉତ୍ପାଦନ ହୋଇ ବି ଓଡ଼ିଶାର ଗ୍ରାହକଙ୍କୁ କାହିଁକି ୟୁନିଟ୍ ପିଛା ୫ ଟଙ୍କା ୭୦ ପଇସା ଦେବାକୁ ପଡ଼ୁଛି ବୋଲି ସେ ପ୍ରଶ୍ନ କରିଛନ୍ତି।
ଏହି ସମାବେଶରେ କଂଗ୍ରେସରୁ ବିତାଡ଼ିତ ହୋଇଥିବା ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା ଓ ପୂର୍ବତନ କୋରାପୁଟ ବିଧାୟକ କୃଷ୍ଣଚନ୍ଦ୍ର ସଗରିଆ ଯୋଗଦେଇ ମୋଦୀ ଓ ନବୀନ ସରକାରଙ୍କୁ ସମାଲୋଚନା କରିଥିଲେ। ସାମାଜିକ ନ୍ୟାୟ ଅଭିଯାନ ପକ୍ଷରୁ ଆୟୋଜିତ ଏହି ସମାବେଶରେ ହଜାରେରୁ ଉର୍ଦ୍ଧ୍ବ ଆମ ଆଦମୀ ପାର୍ଟି କର୍ମୀ ଯୋଗଦେଇଥିଲେ ।