ଜୁନ୍‌ ୨୨ରୁ ମାଟ୍ରିକ୍‌ ସପ୍ଲିମେଣ୍ଟାରୀ; ୨୪ରୁୁ ଫର୍ମପୂରଣ

0 288

କଟକ : ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ପକ୍ଷରୁ ଚଳିତ ବର୍ଷର ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ଜୁନ୍‌ ୨୨ ତାରିଖରୁ ଆରମ୍ଭ ହେଇ ଜୁନ୍‌ ୨୯ତାରିଖରେ ଶେଷ ହେବ। ଏଥର ସପ୍ଲିମେଣ୍ଟାରୀ ପରୀକ୍ଷା ସୂଚୀରେ କିଛିଟା ପରିବର୍ତ୍ତନ ହୋଇଛି। ଆସନ୍ତା ପରୀକ୍ଷାରେ ଦୁଇଟି ପରୀକ୍ଷା ମଧ୍ୟରେ ଫାଙ୍କା ଦିନ ରଖାଯାଇ ନାହିଁ। ସେହିପରି ତୃତୀୟ ଭାଷା ହିନ୍ଦୀ ଓ ସଂସ୍କୃତ ପରୀକ୍ଷା ଗୋଟିଏ ଦିନରେ ନହୋଇ ପୃଥକ ପୃଥକ ଭାବେ ଦୁଇ ଦିନରେ ହେବ। ଗଣିତ ବ୍ୟତୀତ ସମସ୍ତ ପରୀକ୍ଷା ସକାଳ ୯ଟାରୁ ୧୧ଟା ୩୦ ପର୍ଯ୍ୟନ୍ତ ଚାଲିବ। ଗଣିତ ପରୀକ୍ଷା ପାଇଁ ପରୀକ୍ଷାର୍ଥୀଙ୍କୁ ଅତିରିକ୍ତ ୧୫ ମିନିଟ୍‌ ମିଳିବ। ସକାଳ ୯ଟାରୁ ୧୦ଟା ପର୍ଯ୍ୟନ୍ତ ଓଏମ୍‌ଆର୍‌(ସଂକ୍ଷିପ୍ତ ଉତ୍ତରମୂଳକ) ପରୀକ୍ଷା ଓ ୧୦ଟାରୁ ୧୧ଟା ୩୦ ପର୍ଯ୍ୟନ୍ତ ଦୀର୍ଘ ଉତ୍ତରମୂଳକ ପରୀକ୍ଷା ଅନୁଷ୍ଠିତ ହେବ। ଜୁନ୍‌ ୨୨ରେ ପ୍ରଥମ ଭାଷା, ଜୁନ୍‌ ୨୩ରେ ଦ୍ୱିତୀୟ ଭାଷା ଇଂରାଜୀ, ଜୁନ୍‌ ୨୪ ତାରିଖ ରବିବାରରେ ଭିଜୁଆଲ୍‌ ଆର୍ଟ, ଜୁନ୍‌ ୨୫ରେ ତୃତୀୟ ଭାଷା (ହିନ୍ଦୀ, ଓଡ଼ିଆ, ପାର୍ସି, ଭିଜୁଆଲ ଆର୍ଟ ଥିଓରି), ଜୁନ୍‌ ୨୬ରେ ତୃତୀୟ ଭାଷା ସଂସ୍କୃତ, ଜୁନ୍‌ ୨୭ରେ ଗଣିତ, ଜୁନ୍‌ ୨୮ରେ ସାଧାରଣ ବିଜ୍ଞାନ, ୨୯ରେ ସାମାଜିକ ବିଜ୍ଞାନ ପରୀକ୍ଷା ଅନୁଷ୍ଠିତ ହେବ ବୋଲି ବୋର୍ଡ କେନ୍ଦ୍ରୀୟ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ପରୀକ୍ଷା ନିୟନ୍ତ୍ରଣ ଡକ୍ଟର ନିହାର ରଞ୍ଜନ ମହାନ୍ତି ସୂଚନା ଦେଇଛନ୍ତି। ସପ୍ଲିମେଣ୍ଟାରୀ ପରୀକ୍ଷା ପାଇଁ ମେ’ ୨୪ ତାରିଖ ସକାଳ ୮ଟାରୁ ଅନ୍‌ଲାଇନ୍‌ରେ ଫର୍ମପୂରଣ ଆରମ୍ଭ ହୋଇ ମେ’ ୩୦ତାରିଖ ପର୍ଯ୍ୟନ୍ତ ଚାଲିବ। ପ୍ରାର୍ଥୀମାନେ ମେ ୩୦ ତାରିଖ ରାତି ୧୧ଟା ୪୫ପର୍ଯ୍ୟନ୍ତ ଫି ଦାଖଲ କରିପାରିବେ ଓ ମେ’ ୩୧ତାରିଖ ମଧ୍ୟରାତ୍ର ପର୍ଯ୍ୟନ୍ତ ଅନ୍‌ଲାଇନ୍‌ରେ ଫର୍ମ ଦାଖଲ କରିପାରିବେ। ସପ୍ଲିମେଣ୍ଟାରୀ ଫର୍ମପୂରଣ ସଂକ୍ରାନ୍ତ ସମସ୍ତ ସୂଚନା ବୋର୍ଡ େଓ୍ଵବ୍‌ସାଇଟ୍‌ www.bseodisha.ac.in ରେ ଉପଲବ୍ଧ ହେଉଛି। ରେଗୁଲାର ପରୀକ୍ଷାର୍ଥୀଙ୍କ ପାଇଁ ଅନୁଷ୍ଠାନର ମୁଖ୍ୟ ବା ପ୍ରଧାନଶିକ୍ଷକ ମାନେ ଫର୍ମ ପୂରଣ କରିବେ। ଏକ୍ସରେଗୁଲାର, ପତ୍ରବିନିମୟ ଛାତ୍ରଛାତ୍ରୀମାନେ ଜୋନାଲ୍‌ ଡେପୁଟି ସେକ୍ରେଟାରୀଙ୍କ ମାଧ୍ୟମରେ ଅଫ୍‌ଲାଇନ୍‌ରେ ଫର୍ମ ପୂରଣ କରିବେ। ରେଗୁଲାର ଛାତ୍ରଛାତ୍ରୀଙ୍କ ପାଇଁ ଫର୍ମପୂରଣ ଦେୟ ୩୮୩ ଟଙ୍କା ରହିଥିବା ବେଳେ ଅନ୍ୟମାନଙ୍କ ଏହି ଦେୟ ୪୭୫ ଟଙ୍କା ଧାର୍ଯ୍ୟ କରାଯାଇଛି ବୋଲି ପରୀକ୍ଷା ନିୟନ୍ତ୍ରକ ଡକ୍ଟର ମହାନ୍ତି ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ବୋର୍ଡ ସଭାପତି ପ୍ରଫେସର ଡକ୍ଟର ଜାହାନ୍‌ ଆରା ବେଗମ୍‌ ଓ ସଂପାଦକ ରାମାଶିଷ ହାଜରା ଉପସ୍ଥିତ ଥିଲେ।

ପ୍ରଥମ ଅର୍ଦ୍ଧବାର୍ଷିକ ଓଡ଼ିଆ ଭାଷା ପରୀକ୍ଷା ୨୬ରେ

ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ପକ୍ଷରୁ ଚଳିତ ବର୍ଷର ପ୍ରଥମ ଅଷ୍ଟମ ଷ୍ଟାଣ୍ଡାର୍ଡ ଅର୍ଦ୍ଧବାର୍ଷିକ ଓଡ଼ିଆ ଭାଷା ପରୀକ୍ଷା ଓ ଦଶମ ଷ୍ଟାଣ୍ଡାର୍ଡ ଏକକ ଭାଷା ଓଡ଼ିଆ ପରୀକ୍ଷା ମେ’ ୨୬ ତାରିଖ ସକାଳ ୮ଟାରୁ ଆରମ୍ଭ ହେବ। ପ୍ରଥମେ ଲିଖିତ ଓ ପରେ ମୌଖିକ ପରୀକ୍ଷା କରାଯିବ। ପରୀକ୍ଷା ମୋଟ ୧୩ଟି କେନ୍ଦ୍ରରେ ଅଫ୍‌ଲାଇନ କରାଯିବ ବୋଲି ବୋର୍ଡ ପରୀକ୍ଷା ନିୟନ୍ତ୍ରକ ଡକ୍ଟର ନିହାର ରଞ୍ଜନ ମହାନ୍ତି ସୂଚନା ଦେଇଛନ୍ତି।

ସମ୍ବନ୍ଧିତ ଖବର

Leave A Reply

Your email address will not be published.