ଓଡ଼ିଶା ପାଖେଇଲାଣି ମୌସୁମୀ

ଭୁବନେଶ୍ବର : ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଉତ୍ତର ପଶ୍ଚିମ ବଙ୍ଗୋପସାଗର ଆଡ଼କୁ ଗତି କରୁଛି। ଏହା ଓଡ଼ିଶାରେ ମୌସୁମୀ ପ୍ରବେଶକୁ ତ୍ବରାନ୍ବିତର କରିବ। ଯାହାଦ୍ବାରା ଜୁନ୍ ୨୧ରେ ଅର୍ଥାତ୍ ଶୁକ୍ରବାର ଦକ୍ଷିଣ ପଶ୍ଚିମ ମୌସୁମୀ ବାୟୁ ଓଡ଼ିଶା ଛୁଇଁବ ବୋଲି ପାଣିପାଗ ବିଶେଷଜ୍ଞ ଶରତ ଚନ୍ଦ୍ର ସାହୁ କହିଛନ୍ତି।

ଶ୍ରୀ ସାହୁ କହିଛନ୍ତି ଯେ, ଦକ୍ଷିଣପଶ୍ଚିମ ମୌସୁମୀ ବାୟୁ ଏବେ ପୂର୍ବ-କେନ୍ଦ୍ରୀୟ ଏବଂ ଏହାର ସଂଲଗ୍ନ ଉତ୍ତର- ପୂର୍ବ ବଙ୍ଗୋପସାଗରରେ ସ୍ଥିର ଥିବାବେଳେ ଏହା ଉତ୍ତର ପଶ୍ଚିମ ବଙ୍ଗୋପସାଗର ଆଡ଼କୁ ଗତି କରି ଜୁନ୍ ୨୧ରେ ଓଡ଼ିଶାରେ ପ୍ରବେଶ କରିବ। ଏହା ପ୍ରଭାବରେ ୨୦ତାରିଖ ରାତିରୁ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବ। ମୌସୁମୀ ଛୁଇଁବା ପରେ ତିନି ଦିନ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବ ବୋଲି ଶ୍ରୀ ସାହୁ ପୂର୍ବାନୁମାନ କରିଛନ୍ତି।

ସେହିପରି ଭୁବନେଶ୍ବର ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍.ଆର୍‌ ବିଶ୍ବାସ କହିଛନ୍ତି ଯେ, ଆସନ୍ତା ଦୁଇରୁ ତିନି ଦିନ ମଧ୍ୟରେ ମୌସୁମୀ ଓଡ଼ିଶା ଛୁଇଁବ। ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଲଘୁଚାପରେ ପରିଣତ ହେବ। ଏହା ପ୍ରଭାବରେ ମୌସୁମୀ ବା‌ୟୁ ଓଡ଼ିଶାରେ ପ୍ରବେଶ କରିବ।

ଏଥର ମୌସୁମୀ ବାୟୁ ଓଡ଼ିଶା ଛୁଇଁବାରେ ବିଳମ୍ବ ହୋଇଥିଲେ ହେଁ ‌ମୌସୁମୀ ପ୍ରଭାବରେ ରାଜ୍ୟର ସ୍ବାଭାବିକ ବର୍ଷା ହେବ ବୋଲି ପାଣିପାଗ ବିଭାଗ କହିଛି।

ଅପରପକ୍ଷେ ଆଜି ବି ରାଜ୍ୟର ବିଭିନ୍ନ ସ୍ଥାନରେ ଗ୍ରୀଷ୍ମ ପ୍ରବାହ ଜାରି ରହିଛି। ଆଜି ଅନୁଗୁଳରେ ୪୦.୧, ଝାରସୁଗୁଡ଼ାରେ ୪୧.୪, ସମ୍ବଲପୁରରେ ୪୦.୮, ହୀରାକୁଦରେ ୪୦.୨, ମାଲକାନଗିରିରେ ୪୦.୫ଡିଗ୍ରି ତାପମାତ୍ରା ରେକର୍ଡ ହୋଇଛି। ଏହିଭଳି ୫ଟି ସ୍ଥାନରେ ଆଜି ୪୦ଡିଗ୍ରି ଉପରେ ତାପମାତ୍ରା ଥିବାବେଳେ ୭ଟି ସ୍ଥାନରେ ୩୮ଡିଗ୍ରି ଉପରେ ତାପମାତ୍ରା ଥିଲା।

ସେହିପରି ଚାନ୍ଦବାଲିରେ ୨୪ଘଣ୍ଟା ମଧ୍ୟରେ ୩୩.୬ମିମି ବର୍ଷା ହୋଇଥିଲେ ହେଁ ଆଜି ବର୍ଷା ହୋଇନି। ଆଜି ସଂଧ୍ୟା ସୁଦ୍ଧା ଗୋପାଳପୁରରେ ୧ମିମି ବର୍ଷା ହୋଇଛି।