ମାଲକାନଗିରି ସୀମାରେ ନକ୍ସଲଙ୍କ ବର୍ବରକାଣ୍ଡ : ଗଳାକାଟି ଠିକାଦାରଙ୍କୁ ହତ୍ୟା
ମାଲକାନଗିରି : ମାଲକାନଗିରି ସୀମାନ୍ତ ଛତିଶଗଡ଼ର ସୁକମା ଜିଲ୍ଲାରେ ଆଜି ପୁଣି ବର୍ବରକାଣ୍ଡ ଘଟାଇଛନ୍ତି ନକ୍ସଲ। ଜଣେ ଠିକାଦାରଙ୍କୁ ଅତି ନିର୍ମମ ଭାବେ ହତ୍ୟା କରିବା ସହ ରାସ୍ତା କାମରେ ନିୟୋଜିତ ହୋଇଥିବା ୬ଟି ଗାଡ଼ିକୁ ପୋଡ଼ି ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ମାଲକାନଗିରି ସୀମାକୁ ଲାଗି ରହିଥିବା ଦୋରନାପାଲ ଅଞ୍ଚଳର ଉପମପାଲ୍ଲୀ ଗାଁରେ ରାସ୍ତା କାମ ଚାଲିଛି। ଠିକାଦାର ହରି ଶଙ୍କର ସାହୁ ଏହି କାମ କରୁଥିଲେ। ନକ୍ସଲଙ୍କ ବିରୋଧ ସତ୍ତ୍ବେ ଏହି କାମ ଚାଲିଥିଲା। ତେଣୁ ଆଜି ଅପରାହ୍ନରେ ସଶସ୍ତ୍ର ନକ୍ସଲ ଉପମପାଲ୍ଲୀ ପହଞ୍ଚିଥିଲେ। କାମରେ ନିୟୋଜିତ ହୋଇଥିବା ଶ୍ରମିକଙ୍କୁ ନିସ୍ତୁକ ମାଡ଼ ମାରିବା ସହ ୬ଟି ଗାଡ଼ିରେ ନିଆଁ ଲଗାଇ ଦେଇଥିଲେ। ଏହାପରେ ଠିକାଦାର ହରି ଶଙ୍କରଙ୍କୁ ଅପହରଣ କରିନେଇ ଜଙ୍ଗଲରେ ନିସ୍ତୁକ ମାଡ଼ ମାରି ଗଳା କାଟି ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଛାଡ଼ି ଚାଲି ଯାଇଥିଲେ। ଘଟଣାସ୍ଥଳରେ ହିଁ ହରି ଶଙ୍କରଙ୍କ ମୃତ୍ୟୁ ହୋଇଯାଇଥିଲା। ଖବର ପାଇ ସିଆରପିଏଫ ଯବାନ ଏବଂ ପୁଲିସ ଘଟଣା ସ୍ଥଳରେ ପହଞ୍ଚିଥିଲେ। ନିଆଁ ଲିଭାଇବାକୁ ଚେଷ୍ଟା କରିଥିଲେ ବି ବିଫଳ ହୋଇଥିଲେ। ତେବେ ଘଟଣା ପରେ ଆଖପାଖ ଅଞ୍ଚଳରେ କମ୍ବିଂ ଅପରେସନକୁ ଜୋରଦାର କରାଯାଇଛି।