କ୍ଷୟକ୍ଷତି ଭରଣା ଲାଗି ‘କେରଳ ମଡେଲ’ ଆପଣାଇବାକୁ ଟାସ୍କଫୋର୍ସ ଗଠିତ: ପୁରୀକୁ ଛାଡ଼ି ଅନ୍ୟ ସ୍ଥାନରେ ୯୯% ବ୍ୟାଙ୍କ କାର୍ଯ୍ୟକ୍ଷମ, ବ୍ୟାଙ୍କ ଋଣ ଓ ଇନସ୍ୟୁରାନ୍ସ କ୍ଲେମ ଲାଗି ନିୟମ କୋହଳ
ଭୁବନେଶ୍ବର: ବାତ୍ୟା ଫନିରେ ରାଜ୍ୟର ବ୍ୟାଙ୍କିଙ୍ଗ ବ୍ୟବସ୍ଥା ବିଶେଷ ଭାବେ ପ୍ରଭାବିତ ହୋଇଛି । ଏହାର ଭରଣା ପାଇଁ ଓଡିଶା ଆପଣେଇବ କେରଳ ମଡେଲ । ବ୍ୟାଙ୍କର୍ସ, ଇନସ୍ୟୁରାନ୍ସ ଓ ଟେଲିକମ କମ୍ପାନୀଙ୍କ ସହ କେନ୍ଦ୍ର ଏବଂ ରାଜ୍ୟ ସରକାରଙ୍କ ଅଧିକାରୀ ଏ ନେଇ ଆଜି ଭୁବନେଶ୍ୱରରେ ଆଲୋଚନା କରିଛନ୍ତି । କେରଳ ମଡେଲ ଆପଣେଇଲେ ଆଉ ଟିକିନିଖି କାଗଜପତ୍ର ଦରକାର ପଡିବନି । ସିମ୍ପଲ ଆପ୍ଲିକେଶନ ଫର୍ମରେ ଇନସ୍ୟୁରାନ୍ସ କ୍ଲେମ କରାଯାଇପାରିବ । ଏହାଦ୍ୱାରା କ୍ଷତି ସହିଥିବା ବ୍ୟବସାୟୀ ଓ ଉପଭୋକ୍ତା ସହଜରେ ବ୍ୟାଙ୍କ ଓ ଇନସ୍ୟୁରାନ୍ସ କମ୍ପାନିରୁ ସହାୟତା ଲାଭ କରିପାରିବେ। ରାଜ୍ୟରେ କେରଳ ମଡେଲ ଲାଗୁ ପାଇଁ ଟାସ୍କଫୋର୍ସ ଗଠନ ହୋଇଛି । ଆଜି ବୈଠକ ପରେ ଏ ନେଇ କେନ୍ଦ୍ର ସରକାରଙ୍କୁ ସୁପାରିସ କରାଯିବ। ଏହି ବୈଠକରେ ମୁଦ୍ରା ଯୋଜନାରେ ହୋଟେଲ ବ୍ୟବସାୟୀଙ୍କୁ ଋଣ ଦିଆଯିବା ସହ ସୁଧହାରକୁ କୋହଳ କରାଯିବା ଲାଗି ନିଷ୍ପତ୍ତି ହୋଇଛି।
Sambad is now on WhatsApp
Join and get latest news updates delivered to you via WhatsApp
ଏଥି ସହ ଏମଏସଏମଇ ଓ ଫସଲ ବୀମା କ୍ଷେତ୍ରରେ ଋଣ ଦେବା ସର୍ତକୁ କୋହଳ କରାଯିବା ସହ ଦୁଇଦିନ ଭିତରେ ଇନସ୍ୟୁରାନ୍ସ କ୍ଲେମ ଟଙ୍କା ଦେବାକୁ ବି ନିର୍ଦ୍ଦେଶ ଦିଆଯାଇଛି । ସେହିଭଳି କ୍ଲେମ କରିଥିବା ସଂସ୍ଥା ବା ବ୍ୟକ୍ତି ଇନସ୍ୟୁରାନ୍ସ ପାଇଁ ସବୁ ଡକୁମେଂଟ ନଦେଲେ ମଧ୍ୟ ତୁରନ୍ତ ଟଙ୍କା ଦିଆଯିବାକୁ କୁହାଯାଇଛି । ପ୍ରତି ଜିଲ୍ଲାର ଜିଲ୍ଲାପାଳଙ୍କୁ ଫସଲ ନଷ୍ଟ ରିପୋର୍ଟ ଦେବାକୁ କୁହାଯାଇଛି, ଏହା ଆଧାରରେ ହିତାଧିକାରୀଙ୍କ ପ୍ରାପ୍ତି ସ୍ଥିର କରାଯିବ। ଏହି ପ୍ରକ୍ରିୟାକୁ ତ୍ବରାନ୍ବିତ କରିବାକୁ ଆନ୍ଧ୍ରରୁ ଇନସ୍ୟୁରାନ୍ସ ସର୍ଭେ କରିବାକୁ ଅଫିସର ଆସିଛନ୍ତି ।
ଫନି ପରବର୍ତ୍ତୀ ବ୍ୟାଙ୍କିଙ୍ଗ ସେବାର ସମୀକ୍ଷା ଶେଷ ହୋଇଛି। ସମୀକ୍ଷା ପରେ କେନ୍ଦ୍ର ଅର୍ଥ ବିଭାଗ ଅତିରିକ୍ତ ସଚିବଙ୍କ ସୂଚନା ଅନୁସାରେ, ପୁରୀକୁ ଛାଡ଼ି ଅନ୍ୟ ସ୍ଥାନରେ ୯୯% ବ୍ୟାଙ୍କ କାର୍ଯ୍ୟକ୍ଷମ ହୋଇଛି। ବୀମାଧାରୀଙ୍କ ଆବେଦନକୁ ତୁରନ୍ତ ବିଚାର କରିବାକୁ କମ୍ପାନିଗୁଡ଼ିକୁ ନିର୍ଦେଶ ଦିଆଯାଇଛି। କଟକ, ଖୋର୍ଧା, ପୁରୀ, ଗଞ୍ଜାମ ଓ ଜଗତସିଂହପୁରରେ ୧୯୯୨ ବ୍ୟାଙ୍କରୁ ୧୯୩୪ଟି କାମ କରୁଛି । ପୁରୀରୁ ୨୭ରୁ ୨୮ ପ୍ରତିଶତ ବ୍ୟାଙ୍କ କାମ କରୁଛି । ଆଉ ସପ୍ତାହକ ମଧ୍ୟରେ ବିଜୁଳି ଆସିବା ପରେ ସମସ୍ତ ଏଟିଏମ କାର୍ଯ୍ୟକ୍ଷମ ହେବ।