କଟକ : ସଂଦୀପ ଆଚାର୍ଯ୍ୟ ଓରଫ ରାଜା ଆଚାର୍ଯ୍ୟଙ୍କ ଜାମିନ ରଦ୍ଦ ପାଇଁ କମିସନରେଟ୍ ପୁଲିସ୍ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ତାଙ୍କୁ ୨୦୧୦ ମସିହାର ଲିଙ୍ଗରାଜ ଥାନା ମାମଲାରେ ରାଜାଙ୍କୁ ଏପ୍ରିଲ ୨୦ରେ ହାଇକୋର୍ଟ ପ୍ରଦାନ କରିଥିବା ଜାମିନ ରଦ୍ଦ କରାଯାଉ ବୋଲି ଦର୍ଶାଇ ପୁଲିସ ପକ୍ଷରୁ ହାଇକୋର୍ଟରେ ଆବେଦନ ଦାୟର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମାମଲାର ବିବରଣୀରୁ ପ୍ରକାଶ ଯେ ୨୦୧୦, ଏପ୍ରିଲ ୧୩ରେ ଜ୍ୟୋତି ମୋଟର୍ସ କର୍ମଚାରୀଙ୍କୁ ଅପହରଣ ଓ ଆକ୍ରମଣ ଅଭିଯୋଗକୁ ନେଇ ଲିଙ୍ଗରାଜ ଥାନାରେ ଆଇପିସିର ଦଫା ୪୫୨, ୩୬୪-କ, ୧୨୦-ଖ, ୩୪ ଓ ଆର୍ମସ୍ ଆକ୍ଟର ଧାରା ୨୫, ୨୭ରେ ମାମଲା ରୁଜୁ ହୋଇଥିଲା। ଏହି ଘଟଣାରେ ରାଜା ମାଷ୍ଟର ମାଇଣ୍ଡ ଥିଲେ ବୋଲି ଅଭିଯୋଗ ହୋଇଥିଲା। ପୁଲିସ ତଦନ୍ତ କରି ଚାର୍ଜସିଟ ଦାଖଲ କରିବା ପରେ ଭୁବନେଶ୍ୱରସ୍ଥିତ ଅତିରିକ୍ତ ଦୌରା ଜଜ୍ ଅଦାଲତରେ ମାମଲାର ଶୁଣାଣି ଚାଲିଥିଲା। ଏହି ମାମଲା ବିଚାରାଧୀନ ଥିବା ବେଳେ ଜୁଡୋ କୋଚ୍ ବିରଞ୍ଚି ଦାସ ହତ୍ୟା ମାମଲାରେ ସୁପ୍ରିମକୋର୍ଟରୁ ରାଜା ଜାମିନ ପାଇଥିଲେ। କିନ୍ତୁ ଏହି ମାମଲାରେ ତାଙ୍କୁ ଜାମିନ ମିଳି ପାରି ନଥିବାରୁ ରାଜା ଜେଲରୁ ମୁକୁଳି ପାରି ନଥିଲେ। ଏହି ମାମଲାରେ ତାଙ୍କ ଜାମିନ ଦୌରା ଜଜ୍ ଅଦାଲତ ଖାରଜ କରିବା ପରେ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏପ୍ରିଲ ୨୦ରେ ହାଇକୋର୍ଟ ମାମଲାର ଶୁଣାଣି କରି ରାଜାଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଥିଲେ। ଏହାପରେ ରାଜା ଜାମିନରେ ମୁକୁଳିଥିଲେ।