ପୁରୀ: ବୁଧବାର ସକାଳେ ପେଣ୍ଠକଟା ମେରାଇନ୍ ଥାନା ଅନ୍ତର୍ଗତ ଗୋପାଳପୁର ଗ୍ରାମ ନିକଟରେ ଥିବା ଏକ ଡ୍ରେନ୍ରୁ ଜଣେ ବାଳକର ଶବ ଉଦ୍ଧାର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଗଣେଶ ନାମକ ସେ ୭ ବର୍ଷିୟ ବାଳକ ହେଉଛି ଗୋପାଳପୁର ଗ୍ରାମ ନିବାସୀ ପ୍ରକାଶ ନାୟକଙ୍କ ପୁଅ। ଗତକାଲି ସନ୍ଧ୍ୟା ପ୍ରାୟ ୭ଟା ବେଳେ ଗଣେଶକୁ ତା’ର ମାଆ ଚା ପତି କିଣିବାକୁ ସେ ଅଞ୍ଚଳରେ ଥିବା କୌଣସି ଦୋକାନକୁ ପଠାଇଥିଲେ। କିନ୍ତୁ, ସେ ଆଶା କରାଯାଉଥିବା ସମୟ ମଧ୍ୟରେ ନ ଫେରିବାରୁ, କେଉଁଠି ଖେଳକୁଦ କରୁଥିବ ବୋଲି ପରିବାର ଲୋକେ ଭାବିଥିଲେ। ରାତି ବଢ଼ି ଚାଲିଲା ତଥାପି ଗଣେଶ ନ ଫେରିବାରୁ ଘର ଲୋକେ ସ୍ଥାନୀୟ ଅଞ୍ଚଳରେ ଖୋଜାଖୋଜି କରିଥିଲେ ମଧ୍ୟ ତା’ର ଟେର୍ ପାଇ ନ ଥିଲେ।
ଆଜି ସକାଳେ ସ୍ଥାନୀୟ ଲୋକେ ସେ ଅଞ୍ଚଳର ଏକ ଡ୍ରେନ୍ରେ ଗଣେଶର ଶବ ଦେଖି ତାକୁ ଖୋଜୁଥିବା ତା’ର ବାପା ମାଆଙ୍କୁ ଖବର ଦେଇଥିଲେ।
ଗଣେଶ ଅଙ୍ଗନବାଡ଼ିରେ ପଢୁଥିଲା।
ଡ୍ରେନ୍ରୁ ଶବ ଉଦ୍ଧାର କରାଯିବା ପରେ ସ୍ଥାନୀୟ ଲୋକେ ଏ ଭଳି ବିୟୋଗାନ୍ତ ଘଟନାରେ ଶୋକାଭିଭୂତ ହେବା ସହ ଉତ୍ତେଜିତ ହୋଇ ପଡ଼ିଛନ୍ତି।
ଡ୍ରେନ୍ କାହିଁକି ଦିନ ଦିନ ଧରି ଖୋଲା ରହିଛି ଏବଂ ବାଳକଟିର ମୃତ୍ୟୁ ନିମନ୍ତେ ପରିବାରକୁ କ୍ଷତିପୂରଣ ଦେବା ପାଇଁ ସ୍ଥାନୀୟ ଲୋକେ ବାଲିଘାଟ ଛକରେ ଟାୟାର୍ ଜାଳି ରାସ୍ତା ଅବରୋଧ କରିଛନ୍ତି।
ଖବର ପାଇ ପେଣ୍ଠକଟା ମେରାଇନ୍ ପୁଲିସ ଘଟଣାସ୍ଥରେ ପହଞ୍ଚିଛି, କିନ୍ତୁ ଏ ଯାବତ୍ କୌଣସି ପ୍ରଶାସନିକ ଅଧିକାରୀ ଘଟନାସ୍ଥଳକୁ ଯାଇ ନାହାନ୍ତି।