ପୁରୀ: ଲକ୍ଷ ଲକ୍ଷ ଭକ୍ତଙ୍କ ଭାବନକୁ ଆଘାତ ଦେଇ ମଙ୍ଗଳବାର ବି ଶ୍ରୀମନ୍ଦିରରେ ମହାପ୍ରସାଦ ବନ୍ଦ କରିଦେଇଛନ୍ତି ସେବାୟତ । ପ୍ରଶାସନ ଓ ସେବାୟତଙ୍କ ମଧ୍ୟରେ ବିବାଦକୁ ନେଇ ଏଭଳି ପରିସ୍ଥିତି ସୃଷ୍ଟି ହୋଇଛି । ଗତକାଲିର ପ୍ରାୟ ୫୦ ଲକ୍ଷ ଟଙ୍କାର ମହାପ୍ରସାଦକୁ ଆଜି କୋଇଲି ବୈକୁଣ୍ଠରେ ପୋତି ଦିଆଯାଇଛି । ଶ୍ରୀମନ୍ଦିର ଆଗରେ ଧାରଣା ଦେଇ ସେବାୟତ ତୁରନ୍ତ କ୍ଷତିପୂରଣ ଦେବାକୁ ପ୍ରଶାସନକୁ ଦାବି କରିଛନ୍ତି । ଗତକାଲି ଠାକୁରଙ୍କ ସେବାରେ ବଡ ଧରଣର ବିଭ୍ରାଟ ଦେଖାଦେଇଥିଲା । ଏପରିକି ରାତି ତମାମ ପହଡ ବି ପକାଇ ନଥିଲେ ସେବାୟତ । ଆଜି ମଧ୍ୟ ଏହି ବିବାଦର ସମାଧାନ ହୋଇପାରିନାହିଁ । ତେବେ ନୀତିକାନ୍ତି ଠିକ ସମୟରେ କରିବା ପାଇଁ ସହମତି ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସିଂହଦ୍ୱାର ଆଗରେ ଧାରଣା ଦେଇ ସେବାୟତ ଜିଦ ଧରିଛନ୍ତି ପ୍ରଶାସନ ସେମାନଙ୍କୁ କ୍ଷତିପୂରଣ ଦେଉ ଏବଂ ଏଭଳି କ୍ଷତି ଯେଭଳି ଆଗକୁ ନହେବ ସେଥିପାଇଁ ପ୍ରତିଶୃତି ଦିଅନ୍ତୁ। ଏହି ବିବାଦ ଆରମ୍ଭ ହୋଇଛି ଓଡିଶା ହାଇକୋର୍ଟଙ୍କ ରାୟରୁ । ୧୬ ତାରିଖରେ ଜଗମୋହନ ଖୋଲିବା ପାଇଁ ହାଇକୋର୍ଟ ନିର୍ଦ୍ଦେଶ ଦେବା ସହ ଗର୍ଭଗୃହ ଭିତରକୁ ପାଳିଆ ସେବାୟତଙ୍କ ଛଡା ଆଉ କେହି ପ୍ରବେଶ କରିପାରିବେ ନାହିଁ ବୋଲି ନିର୍ଦ୍ଦେଶ ଦେଇଥିଲେ । ପାଳିଆ ସେବାୟତର ଅର୍ଥ ହେଉଛି ଯାହାର ପାଳି ଥିବ କେବଳ ସେହି ସେବାୟତ ହିଁ ଗର୍ଭଗୃହରେ ପ୍ରବେଶ କରିପାରିବେ । ଗର୍ଭଗୃହକୁ ଯିବା ପାଇଁ ହାଇକୋର୍ଟଙ୍କ କଟକଣାକୁ ଗ୍ରହଣ କରିପାରିନାହାନ୍ତି ସେବାୟତ । ତେଣୁ ସୋମବାର ଜଗମୋହନ ଖୋଲିବାକୁ ନେଇ ମଧ୍ୟ ନୀତିକାନ୍ତିରେ ବିଳମ୍ବ ହେଲା ଏବଂ ପରିସ୍ଥିତି ଏତେ ଉକ୍ରଟ ହେଲା ଯେ, ମହାପ୍ରଭୁ ଉପାସରେ ରହିଲେ ଏବଂ ରାତିତମାମ ପହଡ ମଧ୍ୟ ପଡିଲାନାହିଁ ।