ପୁରୀ: ମହାପ୍ରଭୁ ଶ୍ରୀଜଗନ୍ନାଥଙ୍କୁ ମାଉସୀ ଘର ନେଇ ଯିବାକୁ ନନ୍ଦିଘୋଷ, ଦର୍ପଦଳନ ଓ ତାଳଧ୍ୱଜ ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ପହଞ୍ଚିଛି। ଶ୍ରୀମନ୍ଦିରରୁ ଆଜ୍ଞାମାଳ ଆସିବା ପରେ ତିନି ରଥକୁ ଦକ୍ଷିଣ ମୋଡ଼ କରାଯାଇଛି। ପରେ ପରଂପରା ଅନୁସାରେ ରଥଗୁଡ଼ିକୁ ପୂଜାର୍ଚ୍ଚନା କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଶ୍ରୀକ୍ଷେତ୍ରରେ ଆଜି ହଜାର ହଜାର ଭକ୍ତ ଓ ଶ୍ରଦ୍ଧାଳୁ ମହାପ୍ରଭୁଙ୍କ ନବଯୌବନ ଦର୍ଶନ କରିଛନ୍ତି। ରାତି ପାହିଲେ ଘୋଷଯାତ୍ରା ହେବ। ମାଉସୀ ମନ୍ଦିରକୁ ରଥ ଗଡ଼ିବା ପୂର୍ବରୁ ରଥ-ପଥକୁ ପ୍ରସ୍ତୁତ କରାଯାଇଛି। ଭକ୍ତି ଭାବନାରେ ଭକ୍ତମାନେ ବଡ଼ ଦାଣ୍ଡରେ ହଜିବେ। ଏଥିପାଇଁ ପୁରୀରେ ଲକ୍ଷାଧିକ ଭକ୍ତ ପହଞ୍ଚି ସାରିଥିବା ବେଳେ ସକାଳ ପାହିଲା ବେଳକୁ ବଡ଼ଦାଣ୍ଡ, ରେଳଷ୍ଟେସନ, ବେଳାଭୂମି, ମଠ-ମନ୍ଦିର ପରିସର ଲୋକାରଣ୍ୟରେ ପରିଣତ ହେବ।
ମହାପ୍ରଭୁଙ୍କ ନବଯୌବନ ଦର୍ଶନ ଅବସରରେ ଶ୍ରୀମନ୍ଦିରରେ ସ୍ୱତନ୍ତ୍ର ନୀତି କ୍ରାନ୍ତି ଅନୁଷ୍ଠିତ ହୋଇଥିଲା। ଭକ୍ତମାନେ ପରିମାଣିକ ଦର୍ଶନ ପରେ ସାହାଣମେଲା ଦର୍ଶନ କରିଥିଲେ। ଶ୍ରୀଜିଉଙ୍କ ଗୁପ୍ତନୀତି ଚାଲିଛି। ଶ୍ରୀମନ୍ଦିର ପ୍ରଶାସନ ଓ ପୁଲିସ କର୍ମଚାରୀଙ୍କ ଦ୍ୱାରା ରଥଗୁଡ଼ିକୁ ଦକ୍ଷିଣମୋଡ଼ କରାଯାଇଛି।