ଭୁବନେଶ୍ୱର: ଗୁଣାତ୍ମକ ଶିକ୍ଷାର ଅଭିବୃଦ୍ଧି ପାଇଁ ନିତି ଆୟୋଗର ‘ସାଥ୍’ ଯୋଜନାକୁ କାର୍ଯ୍ୟକାରୀ କରିବା ଲାଗି ବିଦ୍ୟାଳୟ ଓ ଗଣଶିକ୍ଷା ବିଭାଗ ଏବଂ ନିତି ଆୟୋଗଙ୍କ ମଧ୍ୟରେ ବୁଝାମଣାପାତ୍ର ସ୍ୱାକ୍ଷର ହୋଇଛି। ନୂଆଦିଲ୍ଲୀଠାରେ ଗଣଶିକ୍ଷା ବିଭାଗ ସଚିବ ପ୍ରଦୀପ୍ତ କୁମାର ମହାପାତ୍ର, ଓପେପା ନିର୍ଦେଶକ ମହେନ୍ଦ୍ର କୁମାର ମଲ୍ଲିକ ଓ ନିତି ଆୟୋଗର ପରାମର୍ଶଦାତା ଆଲୋକ କୁମାରଙ୍କ ମଧ୍ୟରେ ଏହି ବୁଝାମଣା ହୋଇଛି। ତାହାକୁ ଦୃଷ୍ଟିରେ ରଖି ବିଭାଗୀୟ ସଚିବ ଶ୍ରୀ ମହାପାତ୍ରଙ୍କ ଅଧ୍ୟକ୍ଷତାରେ ଭୁବନେଶ୍ୱରରେ ଅନୁଷ୍ଠିତ ଏକ କର୍ମଶାଳାରେ ଚୂଡ଼ାନ୍ତ କାର୍ଯ୍ୟକ୍ରମ ସ୍ଥିର କରାଯାଇଛି। ବିଦ୍ୟାଳୟ ଓ ଗଣଶିକ୍ଷା, ବିଜ୍ଞାନ ଓ ପ୍ରଯୁକ୍ତି ବିଭାଗ ମନ୍ତ୍ରୀ ବଦ୍ର୍ରି ନାରାୟଣ ପାତ୍ର କର୍ମଶାଳାକୁ ଉଦ୍ଘାଟନ କରିଥିବା ବେଳେ ବିଭାଗର ନିର୍ଦେଶକମାନେ, ୩୦ଟି ଜିଲ୍ଲାର ଶିକ୍ଷା ଅଧିକାରୀ, ସର୍ବଶିକ୍ଷା ଅଭିଯାନର ପ୍ରକଳ୍ପ ସଂଯୋଜକ ଓ ବ୍ଲକ ଶିକ୍ଷା ଅଧିକାରୀ ଏଥିରେ ଯୋଗଦେଇ ମାନସମନ୍ଥନ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଶିକ୍ଷା କ୍ଷେତ୍ରରେ ପରିବର୍ତନ ଲାଗି ‘ସାଥ୍’ ଯୋଜନାର ଅବଧି ୩୦ ମାସ ଧାର୍ଯ୍ୟ ହୋଇଛି। ବୋଷ୍ଟନ୍ କନ୍ସଲ୍ଟିଂ ଗ୍ରୁପ୍ ଓ ପିରାମଲ୍ ଫାଉଣ୍ଡେସନ୍ ଅଫ୍ ଏଜୁକେସନ ଲିଡରସିପ୍ ଏବଂ ବିଦ୍ୟାଳୟ ଓ ଗଣଶିକ୍ଷା ବିଭାଗ ମିଳିତ ଭାବେ ଏହି ଯୋଜନାକୁ ଓଡ଼ିଶାରେ କାର୍ଯ୍ୟକାରୀ କରିବେ। ୩୦ ମାସ ମଧ୍ୟରୁ ପ୍ରଥମ ୬ ମାସ ଶିକ୍ଷା କ୍ଷେତ୍ରରେ ସାମ୍ପ୍ରତିକ ସ୍ଥିତି ଅନୁଧ୍ୟାନ, ସମସ୍ୟା ଚିହ୍ନଟ, ଲକ୍ଷ୍ୟ ଧାର୍ଯ୍ୟ ଓ ଫଳପ୍ରଦ କାର୍ଯ୍ୟସୂଚୀର ରୋଡ୍ ମ୍ୟାପ୍ କରାଯିବ। ପରବର୍ତୀ ୨୪ ମାସରେ କାର୍ଯ୍ୟକ୍ରମଗୁଡ଼ିକର ଆବଶ୍ୟକ ସ୍ଥଳେ ଢାଞ୍ଚାଗତ ପରିବର୍ତନ କରାଯାଇ ନିର୍ଦିଷ୍ଟ ପଦକ୍ଷେପ ନିଆଯିବ। ଯୋଜନାର ସୁଫଳ ନେଇ ତୃତୀୟ ପକ୍ଷ ଦ୍ୱାରା ମୂଲ୍ୟାୟନ ହେବ।